Marako 6 - Baibuli I Leb Kumam 2013

Jo me Nasaret Odagi Yesu

¹ Yesu oko yai ki kuno di eko dok i bomba me tur gi, josiao mege da oko lube.

² I Ceng Sabato en eko cako pwonyo jo i sinagoga. Jo kame bin owinyo pwony mere oko uro di kipenyere be, “Icuo ni ongeo gigi dedede ki tuai? Rieko kame komio icuo ni tin cal nadi? Cinge kom timo tice me twer!

³ En mam ebedo ngapac, wot ka Maria, kede omin me Yakobo, Jose, Yuda kede Simoni? Mam amiegu mege da tie kede wa kan?” Di do cuny gi oko dage.

⁴ Yesu oko waco ne gi be, “Jo me kabedo dedede woro enabi, kwanyo kenekene jo me bomba me tur gi, joawade mege kede jo me diakal mere.”

⁵ En likame eko timo tice me twer i kuno, do kenekene eketo cinge i wi jotuwo mogo anonok di en eko cango gi.

⁶ Yesu oko uro twatwal ekite kame jo oudo likame tie kede yei. Yesu oko ririmo calere di epwonyo jo.

Yesu Ooro Josiao mege Tomon kiwie Are

⁷ En eko lwongo josiao mege tomon kiwie are bute en eko cako oro gi are are di emio gi akarunikin me lono tipere areco.

⁸ En eko ciko gi be kur kimak gimoro kame kitie ot, kwanyo kenekene ebela; kioti abongo mako cam, abongo ikapu kede abongo sente i isaun gi,

⁹ do kingap amuka di likame kiko dooko egoe ace.

¹⁰ Doko en eko waco ne gi be, “Kame kogamo wu i paco moro, bedunu wele me paco nono kenekene tuno wun yai ki kuno.

¹¹ Do ka jo me kabedo moro oko dagi gamo wu arabo winyo kope wu, kame itienu yai ki kuno, tetengunu adae ki tienu dong kuno bala ijura kame pido gi.”

¹² Kikano, gin kiko ot cako pwonyo jo be kipoore swilaro.

¹³ Kiko riamo jwogi atot, doko kiko wiro jotuwo atot kede mo di kiko cango gi.

To ka Yokana Ngaibatis

¹⁴ Abaka Erode bin oko winyo gi kotimere, pien nying Yesu oudo odoko iruo. Jo mogo oudo waco be koyaruno Yokana Ngaibatis kikom jo oto, en komio etie kede twer acal kamano.

¹⁵ Do jo mogo oudo waco be, “Elia inonono.” Jo icegun oudo waco be, “En ebedo enabi, bala acel kikom inabin kariki sek.”

¹⁶ Do kakame Erode owinyo kede kop nono, en eko waco be, “Mano en Yokana Ngaibatis kame ngoce ango amio kongolo ngute, en kame bobo koyaruno!”

¹⁷ Pien Erode oudo omio komako Yokana di oko twene i otkol pi kop Erodia, dako komimere kame nyinge Pilipo, pien Erode oudo onyome.

¹⁸ Yokana Ngaibatis oudo owaco ne Erode be, “Iswil likame yei ni bedo kede dako ka omini di en pwodi ekuo.”

¹⁹ Pi mano, Erodia oko mako ading kede Yokana, di cunye mito neke. Do likame en eko karuno,

²⁰ pien Erode oudo lworo Yokana, en oudo engeo be Yokana obedo dano kacil doko epoore; pi mano en eko gwoko kuo mere kiber. En oudo cunye maro winyo kop ka Yokana, bed bala kop nogo oudo dubo wie tek kame ewinyo gi.

²¹ Do winyo oko mako Erodia i ceng kame Erode oudo tie tedo kede ebaga me yutuno ceng me nywale, kame oudo elwongo iye jotel me apugan, jodongo me isirikalen kede joadongo me piny me Galilaya.

²² Kikano, nyar ka Erodia oko donyo i ot me ebaga di eko miel adikinicel, en eko yomo cuny Erode kede wele mege; abaka oko waco ne be, “Penya gimoroni kenekene kame in imito di ako bino mini.”

²³ En eko kwongere di ewaco ne be, “Ateteni gimoroni dedede kame in ipenya abino mini, akadi dul me piny kame ango apugo.”

²⁴ Nyako nono oko donyo ooko, eko penyo toto mere be, “Apenye emia nyo?” Toto mere oko dwoko ne be, “Penye emi wi Yokana Ngaibatis.”

²⁵ Kikano nyako nono oko onyaro dok but abaka di eko waco ne be, “Amito imia wi Yokana Ngaibatis di tie i sinia abongo gal.”

²⁶ Gini oko cobo cuny abaka, do pi kite kame oudo etieko kwongere kede i nyim wele mege, omio likame doko oudo etwero twone.

²⁷ Cucuto abaka oko cwano sirikale acel kame dare, en eko mine dwan be eoti ekel wi Yokana Ngaibatis. Sirikale nono oko ot i otkol di eko ngolo ngut Yokana.

²⁸ En eko kelo wi Yokana di tie i sinia, eko mino i cing nyako nono, di do en eko tero ne toto mere.

²⁹ Kakame josiao ka Yokana bin owinyo kede kop noni, gin kiko ot kwanyo kome di kiko yiko.

Yesu Opito Ekodet Adwong me Jo

³⁰ Joor oko dwogo but Yesu di kiko tatamo ne gikame kitimo dedede kede kame kipwonyo.

³¹ Jo oudo tot kame bino di yai, omio Yesu kede josiao mege oudo likame tie kede kare me cam. Pi mano, en eko waco ne josiao mege be, “Ootunu karamoro kakame oromunu bedo iye kenwa di ikounu karuno wei pi kare moro acecek.”

³² Kikano gin kiko donyo i yi yee di kiko yai kioto kargi ken gi.

³³ Kakame oudo kitie yai kede, jo atot oko neno gi kiko ngeno gi, di kiko yai ki bomban dedede kame kio kede kuno, kiko ringo anyim. Di do gin en kame kiko cako tuno kakame Yesu kede josiao mege oudo tie ot iye.

³⁴ Di bin Yesu owok ooko, en eko neno ekodet me jo di eko bedo kede kisa i kom gi, pien oudo kical bala romini kame ngakwat gi li. En eko donyo pwonyo gi kope atot.

³⁵ Di do bin piny oyuto, josiao mege oko bino bute kiko waco ne be, “Neni, esawa okato, doko da kan oling,

³⁶ wac ne jo ot i miere kede i calere mogo kiyapiyapi kede kan, tetekeny kikaruno wilo gimoro me acama.”

³⁷ Do Yesu oko dwoko ne gi be, “Wun nogo miunu gi gimoro kicami.” Gin kiko penye be, “Mam imito be ooti owil cam kede denari tol are area gi, oko bino mino gi kicami?”

³⁸ Yesu oko penyo gi be, “Itienu kede mugati adi? Otunu ber inenunu.” Di do kitieko ngeno rom gi, kiko waco ne be, “Otie kede mugati kany kede deknam are.”

³⁹ Yesu oko waco ne jo pi bedo piny i wi lum i ikodeta.

⁴⁰ Gin kiko bedo piny i ikodeta me tol acel tol acel kede mogo me ot kany ot kany.

⁴¹ Yesu oko kwanyo mugati kany kede deknam are nogo, en eko neno malo di eko pwono Rubanga, eko tuturo mugati di eko mino josiao mege pi gabo jo. En eko bobo popoko deknam are nogo da ne jo dedede.

⁴² Gin dedede kiko cam di kiko yeng.

⁴³ Di josiao oko coko cam kame odong oko pongo ibukito tomon kiwie are.

⁴⁴ Cuo kame oudo tie i kom jo kocamo oudo romo tutumia kany.

Yesu Ooto ki wi Pii kede Tiene

⁴⁵ Cucuto nono, Yesu oko mino josiao mege odonyo i yi yee, di kiko telo ne yongayo pi ot loka Betesaida, di en ber edong cen pi peruno jo.

⁴⁶ Ingei en moto gi, Yesu oko do ot yito i wi moru pi lego.

⁴⁷ Kakame piny oyuto kede, josiao oudo tie i dier nam kede yee, di Yesu odong kene ooko i itela.

⁴⁸ En eko neno josiao mege di tie cane kwango yee, pien yamo oudo tie buko di wok ki tetu nyim gi. Tetu esawa me obai Yesu oko bino but gi di eoto ki wi pii kede tiene. En oudo etie mito kato gi akata.

⁴⁹ Do kakame gin kiko nene kede di eoto ki wi pii kede tiene, gin kiko paro be jwogi oudo inonono, omio kiko dwilao,

⁵⁰ pien gin dedede kinene di lworo oko mako gi. Cucuto Yesu oko waco ne gi be, “Bedunu kede nwangcuny, ango inononi, kur lworo maku.”

⁵¹ En eko donyo i yi yee but gi, yamo oko kwei. Josiao oko uro adikinicel,

⁵² pien gin oudo likame kiniang odocon gikame dwong me pito jo tutumia kany kede mugati nyuto i kom Yesu, pien wi gi oudo tek.

Yesu Ocango Jotuwo i Genesaret

⁵³ Kakame kitieko do ngolo kede nam, kiko wok itela i Genesaret, di kiko wano yee ooko.

⁵⁴ Kakame kiwok kede ki yee, jo oko susunyo ngeno Yesu;

⁵⁵ gin kiko ringo i adulion me kio, di kiko donyo diedielo jotuwo kede elago di kitero bute kakame gin oudo kiwinyo be etie iye.

⁵⁶ Kabedo dedede kame bin Yesu otuno iye, bala i calere, i bomban kede i miere, jo oudo kelo joe gi kame oudo tuwo di kiko keto gi i atalen, kiko donyo bako dog gi ne Yesu pi yei ne jotuwo mulo lak egoe mere. Jo dedede kame oko mulo egoe mere oko cango.