Marako 5 - Baibuli I Leb Kumam 2013

Yesu Ocango Icuo kame tie kede Jwogi

¹ Yesu kede josiao mege oko ngolo loka me nam me Galilaya i piny me Gerasene.

² Di do Yesu otieko wok ki yee, en eko riamo kede icuo kowok ki wi atesin, kame oudo tie kede tipo arac.

³ Icuo nono oudo maro bedo i wi atesin, doko oudo likame tie ngatamoro kame twero twene akadi kede eriko.

⁴ I kare atot oudo kosingo twene kede irikoi i tiene kede i cinge, do oudo ecocoto gi acocot. Likame oudo tie ngat kame tie kede teko kame bwono mere.

⁵ Iwor kede iceng icuo noni oudo kok i wi atesin kede i wi mori, doko di engongolo kome kede kide.

⁶ Kakame eneno kede Yesu i kakabor, en eko ringo bute di eko riondiko i nyime pi mine wor,

⁷ di ekok kede dwan amalo be, “Yesu, Wot ka Rubanga Ngamalo Twal! Nyo ber kame in imito timo nango? Akwai i nying Rubanga, kur icana.”

⁸ En eyamo kaman pien Yesu oudo owaco ne be, “In tipo arac, wok kikom icuo no!”

⁹ Di Yesu oko penye be, “In nyingi ngai?” En eko dwoko be, “Ango nyinga Ekodet me isirikalen; pien wan otot.”

¹⁰ En eko donyo bako doge kitek but Yesu be kur eriam gi tenge ki piny nono.

¹¹ Esipan me ipegei oudo tie kuno cam i bad moru.

¹² Di do tipo areco nogo oko donyo bako dog gi but Yesu be, “Cwai wan i kom ipegei ka, wek ooti odony i kom gi.”

¹³ Yesu oko yei ne gi, di gin kiko wok tenge kikom icuo nono kiko donyo i kom ipegei nogo. Wel me ipegei dedede kame oudo tie kuno oudo romo tutumia are. Gin dedede kiko lor piny kiko donyo i yi nam, di kiko mwony i pii.

¹⁴ Jo kame oudo kwao ipegei nogo oko ringo ot tatamo ne jo kame oudo tie i bomba kede i calo gikame otimere. Jo oko bino neno gikame oudo otimere.

¹⁵ Kakame gin kituno kede but Yesu, kiko udo icuo kame oudo jwogi opong i kome nono di bedo kuno, di engapo igoen, di wie odoko ber; lworo oko mako gi.

¹⁶ Jo kame bin oneno gini oko tatamo ne jo apat epone kame oudo kocango kede icuo kame oudo tie kede jwogi nono, kede gikame otimere ne ipegei da.

¹⁷ Di do gin kiko donyo ngangao Yesu pi yai tenge ki adul gi.

¹⁸ Kakame Yesu oudo tie donyo kede i yi yee, icuo kame oudo jwogi omako nono oko kwane be eyei ne eda upere kede.

¹⁹ Do Yesu likame oko yei. En eko waco ne be, “In dok paco di iko tatamo ne jowoti gikame Rwot otieko timo ni, kede epone kame kisa omake kede i komi.”

²⁰ Di do icuo nono oko yai en eko ot Dekapoli, di eko cako tatamo ne jo twon gikame Yesu otimo ne. Di jo dedede oko uro gikame otimere.

Nyar ka Yairo kede Dako kame Omulo Egoe ka Yesu

²¹ Kakame Yesu bobo ongolo kede nam loka tetuca kede yee, ekodet me jo oko cokere oluke i dog nam kuno.

²² Icuo kame nyinge Yairo, kame oudo obedo ngatel me sinagoga oko tuno. Kakame eneno kede Yesu, en eko poto piny i tiene,

²³ di eko donyo bako doge be, “Nyara atitidi tuwo mito to. Okwe bia iket cingi i kome me wek ecang di eko kuo.”

²⁴ Di Yesu oko upere kede en. Ekodet me jo da oko lube di kidire i kome ki bad dedede.

²⁵ Oudo tie dako moro kame oudo tie kede tuwo kame omio remo obedo ony ki kome pi mwakini tomon kiwie are.

²⁶ En ebedo neno can twatwal i cing imuroko, doko edudubo lim mere dedede i amuket; do akaka cango, aramo bobo oudo medo doko rac ameda.

²⁷ En oudo ewinyo kop i kom Yesu, di eko bino cen ngei Yesu i dier ekodet di eko mulo egoe ka Yesu.

²⁸ Pien oudo eyamo i cunye be, “Ka koto kom amulo akadi egoe mere kenekene da, koto acango.”

²⁹ Cucuto di emulo egoe ka Yesu, mol me remo mere nono oko cungo, di do en eko winyo i kome kene be etieko do cango ki tuwo mere.

³⁰ Yesu oko ngeno be twer oudo oyai ki kome, cucuto en eko lokere di eko penyo ekodet be, “Ngai komulo egoe na?”

³¹ Josiao mege oko dwoko be, “In ineno ekite kame jo tie dire kede i komi di in pwodi bobo ipenyere be, ‘Ngai komula?’ ”

³² Do Yesu oko donyo neno jo rimaro, pi mito ngeno ngat kame otimo gi nono.

³³ Do kite kame dako nono oudo ongeo kede gikame otimere ne, en eko bino kede lworo di kome miel, eko riebere piny i nyim Yesu, di eko tatamo nen gi dedede me ateni kotimere.

³⁴ Yesu oko waco ne be, “Nyara, yei ni ocangi. Ot kede mulem iko cango ki tuwo ni.”

³⁵ Di pwodi Yesu tie yamo kamano, jo mogo oko bino, kame owok ki paco ka Yairo di kiko waco ne Yairo be, “Nyari otieko to, pinyo bobo komio itie meede lolo Apwony?”

³⁶ Do Yesu likame oko keto tam mere i yamo gi nono, en eko waco ne ngatel me sinagoga nono be, “In kur ibed kede lworo, do kenekene bed kede yei.”

³⁷ En likame eko yei ne ngatamoro lube kwanyo Petero, Yakobo, kede omin mere Yokana.

³⁸ Kakame kituno kede i paco ka Yairo, Yesu oko neno twon atotolun kede koko atek kame oudo tie kuno,

³⁹ en eko donyo i yi ot di eko penyo jo kame oudo tie kuno be, “Wun itienu icelakin kede koko kitek kaman pinyo? Atin ni likame oto do enino anina.”

⁴⁰ Gin kiko bedo kede acae i kom kop mere di kinyero. En eko mino gin dedede kidonyo ooko. Di en eko kwanyo papa kede toto me atin kede josiao mege adek noka kiko donyo i agola kame kom atin oudo tie buto iye.

⁴¹ En eko mako cing atin nono di eko waco ne be, “Talita kumi”; kame dwong mere be, “Atin nyako, awaco ni be, yai malo.”

⁴² Esawa nono atin nyako nono oko yai malo di en eko cako ot (oudo mwakini mege tie tomon kiwie are). Kakame gini otimere kede, jo oko uro adikinicel.

⁴³ Yesu oko ciko gi be miero kur kimi ngatamoro ngei kop noni. Di do en eko waco ne gi be kimi atin nono gimoro ecami.