Marako 2 - Baibuli I Leb Kumam 2013

Yesu Ocango Icuo kame Tuwo Oneko Kome lung

¹ Ingei ceng mogo, Yesu oko dok Kaperanaum, di jo oko winyo rwonge mere be oudo etie i paco.

² Jo atot oko cokere, omio ot oko pong kiton i ekeko da. Yesu oko donyo pwonyo gi kop ka Rubanga.

³ Jo ongwon kame oudo tie yeno icuo kame tuwo oudo oneko kome lung pi kele bute oko tuno.

⁴ Kite kame jo oudo opong kede, omio likame kiko karuno tuno but Yesu. Pi mano, kiko tako wi ot ki tetu kakame Yesu oudo tie iye. Kakame kitieko yabo kede kakatwolo, kiko rwako ngatuwo kede gibuto mere, di kiko yololo en piny tuno but Yesu.

⁵ Kakame Yesu oneno kede yei gi, en eko waco ne icuo kame tuwo oneko kome nono be, “Woda, kotieko sasiro in ki dub ni.”

⁶ Jopwony me Iswil mogo kame oudo tie bedo kuno oko cako penyere i cuny gi be,

⁷ “Pinyo komio icuo ni yamo kaman? Man tie gi me acae but Rubanga. Pien likame tie dano kame twero sasiro jo ki dub gi, kwanyo Rubanga kene.”

⁸ Cucuto Yesu oko ngeno i cunye be gin oudo kitie penyere i cuny gi ken gi ken gi i kom kop noni. En eko penyo gi be, “Pinyo komio itienu kede peny acal kamago i cunyu?

⁹ Mene en kame yoyot, waco ne dano kame tuwo oneko kome ni be, ‘Kotieko sasiro in ki dub ni,’ arabo waco ne be, ‘Yai malo ikwany gibuto ni iko ot?’

¹⁰ Do pi mino wu ngeno be Wot ka dano tie kede akarunikin me sasiro jo ki dub gi i wi lobo”, en eko waco ne icuo kame tuwo oneko kome nono be,

¹¹ “Ango awaco ni be, yai malo ikwany gibuto ni iko ot paco!”

¹² Loca oko yai i nyim gi kanono, cucuto en eko kwanyo gibuto mere di eko ot ooko. Man oko mino gi kibedo kede ur di kiko cako pako Rubanga di kiwaco be, “Cako lem wan likame pwodi oneno gikame cal kaman.”

Yesu Olwongo Lebi

¹³ Yesu bobo oko dok i dog nam me Galilaya, ekodet me jo oko cokere oluke, en eko pwonyo gi.

¹⁴ Kakame do oudo etie ot kede, en eko neno Lebi wot ka Alipayo di tie bedo i ot me culo esolo. Yesu oko waco ne be, “Luba.” En eko yai di eko lubo Yesu.

¹⁵ Kakame Yesu obedo kede kacam i ot ka Lebi, jorar esolo atot kede jodubo oudo tie bedo kede karacel kede josiao mege, pien jo atot oudo olube.

¹⁶ Kakame jopwony me Iswil kame oudo bin tie i ekodet me Iparisayon oneno kede di Yesu camo kede jorar esolo kede jodubo, kiko penyo josiao mege be, “Pinyo komio en ecamo kede jorar esolo kede jodubo?”

¹⁷ Kakame Yesu owinyo kede kop kame kiwaco, en eko waco ne gi be, “Jo kame kom gi yot likame mo emuron, do jo kame tuwo en kame moe. Ango likame abino pi lwongo jo kopoore do pi lwongo jodubo.”

Peny kame mako Kanyo Kec

¹⁸ I kare no josiao ka Yokana Ngaibatis kede Iparisayon oudo tie kanyo kec. Jo mogo oko ot but Yesu di kiko penye be, “Pinyo komio josiao ka Yokana Ngaibatis kede me Iparisayon kanyo kec, do josiao nin likame timo kamanono?”

¹⁹ Yesu oko dwoko ne gi be, “Iparunu be wele kame tie i ebaga me nyom karuno kanyo kec di pwodi eteran tie kede gi? Tek kame eteran tie karacel kede gi, likame kikaruno kanyo kec.

²⁰ Do ceng bino tuno kame kobino tero kede eteran tenge kibut gi, di do gin kiko bino kanyo kec i ceng nono.

²¹ “Likame tie ngatamoro kame dapo egoe anyen i kom egoe oti. Ka etimo kamanono, ecapa nyil tenge, egoe anyen bino nyil kikom oti, di apore kame tie iye ko medo doko lac.

²² Doko da likame tie dano moro kame keto bwini anyen i isau me lau oti, pien bwini anyen bino mwoco isau me lau oti nono, di bwini karacel kede isau nono ko bino kei. Do bwini anyen miero ket i yi isau me lau anyen.”

Peny kame mako Ceng Sabato

²³ Ceng Sabato moro acel, Yesu oudo tie lubo yongayo abeo i poto moro me engano. Josiao mege kame oudo tie upere kede oko cako gigito wit engano.

²⁴ Iparisayon mogo oko yamo ne Yesu be, “Neningo, pinyo komio josiao ni tie timo gikame Iswil dagi i Ceng Sabato?”

²⁵ Yesu oko dwoko ne gi be, “Benyo, wun likame isomunu gikame Daudi riki otimo di bin kec oneke, en karacel kede jo kame oudo etie kede?

²⁶ En bin edonyo i ot ka Rubanga di eko camo mugati kame bin tie giayala but Rubanga, kame Iswil likame yei ne ngatamoro camo, kwanyo josaseredoti kenekene. Daudi bin ocamo di eko mino jo kame oudo etie kede da. Man bin otimere di Abiata en kame oudo tie Ngatel Josaseredoti.”

²⁷ Yesu oko waco ne gi be, “Koketo Ceng Sabato pi dano, do likame kocweo dano pi Ceng Sabato.

²⁸ Pi mano, Wot ka dano en Rwot kiton me Sabato da.”