Marako 14 - Baibuli I Leb Kumam 2013

Koporo Kop me Neko Yesu

¹ Oudo pwodi odong ceng are me tuno i Ebaga me Kalamo, kede ebaga kame kocamo iye Mugati kame Arup li kiye. Jodongo me josaseredoti kede jopwony me Iswil oudo tie mono epone me mako Yesu i mung me wek kineke.

² Kiko waco be, “Kur omakenu i kare me ebaga, pien jo bino tany ne wa.”

Kowiro Yesu i Betania

³ Di bin Yesu oudo tie Betania i ot me adobo kame nyinge Simoni, esawa kame oudo kitie kede cam, dako moro oko bino di emako mo kame wel mere tek adikinicel i cupa kame kolwongo be alabasita. En eko gonyo wi cupa di eko onyo mo nono i wi Yesu.

⁴ Do jo mogo kame oudo tie kuno cuny gi likame oko bedo yom, kiko donyo penyere ken gi ken gi be, “Pinyo komio kodubo mo no aduba kamano?

⁵ Oudo koromo cato mo ni i wel me denari kame kalamo tol adek di oko mino jocan.” Gin kiko bunano dako nono kitek.

⁶ Do Yesu oko waco ne gi be, “Wekunu dako no bedi; itienu kara lole pinyo? En etimo nango gikaber twatwal.

⁷ Wun itienu kede jocan nakanaka, i kare moroni kenekene kame wun imitunu konyo gi kede, iromunu konyo gi. Do ango likame abino bedo kede wu nakanaka.

⁸ En etimo gikame oudo esobolo; ewira kede mo pi temuno koma pi ayika.

⁹ Ateteni awaco ne wu be, kabedo dedede kame kobino tuco ejiri iye i wi lobo lung, kobino tatamo gikame dako noni otimo di koyutuno en kede.”

Yuda Oyei pi Rupao Yesu

¹⁰ Di do Yuda Isikariot kame oudo obedo ngat acel kikom josiao tomon kiwie are, oko ot but jodongo me josaseredoti pi iiko epone kame eromo mino kede Yesu i cing gi.

¹¹ Kakame kiwinyo kede kop ni, cuny gi oko bedo yom twatwal, di do kiko cikere pi mine sente. Di do Yuda oko cako mono kare aber me mino Yesu i cing gi.

Yesu Ocamo Ebaga me Kalamo kede Josiao mege

¹² I ceng me agege me Ebaga me Mugati kame Arup li kiye, kame koneko kede romini me camo Ebaga me Kalamo, josiao ka Yesu oko penye be, “Tuai en kame in imito be wan ooti oik ni iye Ebaga me Kalamo?”

¹³ Di en eko cwano josiao mege are di ewaco ne gi be, “Otunu i bomba, ibinunu riamo kede icuo kame yeo pii kede agulu, lubenu

¹⁴ tuno i ot kame en eyaro donyo iye, ikounu waco ne won ot nono be, ‘Apwony ocwao wa be inyute wa agola me wele kame en karacel kede josiao mege eyaro bino camo iye Ebaga me Kalamo.’

¹⁵ En ebino nyuto ne wu agola alac me malo, kame kotieko iiko kiber, ikounu iiko ne wa ebaga kanono.”

¹⁶ Josiao nogo oko ot i bomba, kiko udo gi dedede di tie bala kite kame Yesu oudo owaco ne gi kede, di do gin kiko iiko cam me Ebaga me Kalamo.

¹⁷ Di do piny oyuto, Yesu oko bino kede josiao mege tomon kiwie are.

¹⁸ Kakame kitie do kede cam, Yesu oko waco ne gi be, “Ateteni awaco ne wu be, ngat acel kikom wu bino rupao ango, ngat nono nan tie cam keda karacel.”

¹⁹ Josiao mege oko cako ning, di ngat acelacel kikom gi oko donyo penye be, “Mam nat ango inonono?”

²⁰ Yesu oko dwoko ne gi be, “En ebedo ngat acel kikom wun jo tomon kiwie are, en ngat kame nan tie nywako keda suani acel.

²¹ Pien Wot ka dano bino to bala kame iwandik kacil waco; do ngat kame bino rupao Wot ka dano bino neno can tin benyo! Tikatika koto oudo likame konywale da.”

Cam ka Rwot me Otieno

²² Kakame oudo kitie cam kede, Yesu oko kwanyo mugati, eko kwano winyo iye, eko popoko, di eko mino josiao mege di ewaco be, “Gamunu icamunu; man en koma.”

²³ En eko kwanyo ikopo me bwini, eko mino pwoc but Rubanga, en eko mino gi, di gin dedede kiko mato.

²⁴ Yesu oko waco ne gi be, “Man en remo na kame moko isikan ka Rubanga, remo na kame kobino onyo pi jo atot.

²⁵ Ateteni awaco ne wu be, likame bobo abino mato pige me anyakini me olok tuno kede ceng kame abino mato kede bwini anyen i Ajakanut ka Rubanga.”

²⁶ Kakame kitieko kede wer, gin kiko yai ot i moru me Olibeti.

Yesu Otuco be Petero bino Dage

²⁷ Yesu oko waco ne gi be, “Wun dedede iyarunu ringo ikounu weka, pien kowandiko be, ‘Abino neko ngakwat di romini ko bino sarakin.’

²⁸ Do ingei yaruno ango, abino cako ot ne wun Galilaya.”

²⁹ Petero oko dwoko ne be, “Akadi jogi dedede weki, do ango likame abino weki.”

³⁰ Yesu oko waco ne Petero be, “Ateteni awaco ni be, iwor me tin, di pwodi likame tongweno me are okok, udo in itieko daga tien adek.”

³¹ Petero oko dwoko kede dwan atek di ewaco be, “Ango likame ayaro weki, akadi di komito neka kedi.” Josiao icegun da di oko waco kamanono.

Yesu Olego i Poto me Getesemani

³² Yesu oko yai karacel kede josiao mege, kiko ot kabedo kame kolwongo be Getesemani, di en eko waco ne gi be, “Wun bedunu kan, ango ber aoti alegi.”

³³ En eko tero Petero, Yakobo kede Yokana, par atek kede cwercuny oko make,

³⁴ en eko waco ne gi be, “Par atek tie i cunya kame romo neka. Wun ber dongunu kan, do bedunu di ikiunu piny.”

³⁵ En eko nyiko anyim anonok eko riebere piny, di eko lego be ka koto oudo twerere, koto likame ebeo i can.

³⁶ En eko waco be, “Okwe Papa, gi dedede twerere kibuti. Kwany ikopo me can noni kibuta tenge, likame pi mit nango, do pi mit nin.”

³⁷ En eko dwogo eudo josiao nogo onino, di en eko waco ne Petero be, “Simoni, mam in kom itie nino? Benyo, oudo likame itwero bedo di ineeno pi esawa acel kenekene?”

³⁸ En eko waco ne gi be, “Bedunu di ineenunu, kede di ilegunu, tetekeny kur ipotunu i atama. Pien cuny mito, do kom nyap.”

³⁹ Di en eko bobo ot tenge, eko lego di enyogao kope nogo.

⁴⁰ Di bobo en eko dwogo but gi di eko udo gi kitie nino, pien nino oudo obwono wang gi, doko oudo likame kingeo kop kame kipoore dwoko ne.

⁴¹ Kakame edwogo kede tien me adek mere, en eko penyo gi be, “Mam wun pwodi itienu nino, kede wei? Mano do romo! Esawa otuno do; kobino mino Wot ka dano i cing jodubo.

⁴² Yaunu ootunu. Nenunu ngat koyaro rupao ango ine otieko tuno.”

Komako Yesu

⁴³ Cucuto nono di pwodi Yesu tie yamo, Yuda kame oudo obedo ngat acel kikom josiao tomon kiwie are di tuno. Oudo etie upere kede ekodet me jo kame mako ipimai kede akutai, kame oudo jodongo me josaseredoti, jopwony me Iswil kede joadongo me piny ocwao.

⁴⁴ Ngaerupe oudo otieko mino gi gianena di ewaco be, “Ngat kame ango abino moto di anoto, udo en inonono; makenu di ikounu tere, do di idarenu kitek.”

⁴⁵ Cucuto di Yuda otuno, en eko ot but Yesu, di eko waco be, “Apwony!” En eko noto leme.

⁴⁶ Di gin kiko mako Yesu.

⁴⁷ Do ngat acel kikom jo koudo tie cungo kuno oko woto epima mere, en eko tongo yit epasoit me Ngatel Josaseredoti eko ngolo tel.

⁴⁸ Di Yesu oko penyo gi be, “Mam ibinunu kede ipimai kede akutai pi maka ineno bala ango abedo ngayak?

⁴⁹ Ango abedo kede wu di apwonyo i tempulo ceng dedede, do likame ikounu maka cabo. Do iwandik kacil miero cobere kakare.”

⁵⁰ Di do josiao mege dedede oko ringo oweke.

⁵¹ Atin awobi moro kame oudo orwao esuka atar oko lube, joka oko make,

⁵² do en eko bulucar di eko ringo nono eweko esuka.

Kopido Yesu i nyim Kansulo

⁵³ Di kiko tero Yesu but Ngatel Josaseredoti, kakame jodongo me josaseredoti, joadongo me piny kede jopwony me Iswil oudo ocokere iye.

⁵⁴ Petero da oudo tie lubo gi ki cen ki kakabobor tuno i diakal me Ngatel Josaseredoti. En eko donyo bedo kede isirikalen jodar paco di eyo mac.

⁵⁵ Jodongo me josaseredoti kede kansulo lung oko cako mono kop moro kame koromo pido iye Yesu tetekeny neke. Do likame kiko udo kop moro.

⁵⁶ Jo atot oko tamo kelo pido i kom Yesu, do pido gi nogo oudo likame riamo.

⁵⁷ Jo mogo di do oko cungo kede pido me abe i kom Yesu di kiwaco be,

⁵⁸ “Wan owinyo di ewaco be en eyaro reto tempulo kame kogero kede cing ni, di en eko bino gero kalikame kogero kede cing pi ceng adek.”

⁵⁹ Do akadi ber i pido gi noni da, kope gi oudo likame riamo.

⁶⁰ Ngatel Josaseredoti oko cungo i diere gi, en eko penyo Yesu be, “Benyo, in ili kede kop moro kame iromo dwoko? Nyo ber ine kame jogi tie pidi iye ni?”

⁶¹ Do Yesu oko ling alinga, likame en eko dwoko kop moro. Bobo Ngatel Josaseredoti oko medo penye be, “In en kame ibedo Kirisito Wot ka Rubanga kame koworo?”

⁶² Yesu oko dwoko be, “Ango inononi, doko ibinunu neno Wot ka dano di tie bedo i bad tetu cam me twer ka Rubanga, di etie bino kede idoun me i malo.”

⁶³ Ngatel Josaseredoti oko yeco ekanso mere, di eko waco be, “Pinyo bobo pwodi omitunu ijurak?

⁶⁴ Wuda itiekunu winyo epone kame ecao kede Rubanga. Wun do nan iparunu benyo?” Gin dedede kiko ngolo ne kop be poore neke.

⁶⁵ Di do jo mogo oko cako ngulo lau i kome, di kiumo wange kede di kibabapo en di kiwaco ne be, “Aso tuc bala enabi ngat kobapi.” Isirikalen jodar da oko game kede abap.

Petero Odagi Yesu

⁶⁶ Di Petero oudo pwodi tie piny i diakal, dako moro kame obedo ngatic i paco ka Ngatel Josaseredoti oko bino kuno.

⁶⁷ Kakame eneno kede Petero di tie yono mac, en eko ngine kitek di eko waco be, “Kom ida oudo itie kede Yesu me Nasaret.”

⁶⁸ Do Petero oko dagi di ewaco be, “Ango akwia doko likame aniang gikame itie waco da.” Petero oko ot cungo orute.

⁶⁹ Dako nono oko bobo nene, en eko bobo waco ne jo kame oudo tie cungo kuno be, “Kom lono da tie ngat acel kikom jo nogo.”

⁷⁰ Do Petero oko bobo dagi. Do di pwodi likame otero kare, jo kame oudo cungo kuno oko bobo waco ne Petero be, “Ateteni ida ngat acel kikom gi, pien in ibedo Ngagalilaya.”

⁷¹ Petero oko cako lamere kene di elairo be, “Ango akwia icuo kame wun itienu yamo kop i kome no.”

⁷² Cucuto di do tongweno me are kok. Petero oko yutuno kop kame Yesu oudo owaco ne be, “Di pwodi tongweno me are likame okok, in ibino daga tien adek.” Gino oko cobo cunye di en eko donyo koko.