Malaki 4 - Baibuli I Leb Kumam 2013

Ceng ka Rwot tie Bino

¹ Rwot me jo yi waco be, “Nenunu, ceng tie bino kame jo dedede awakere, kede jo kame timo gikareco bino wang kede bala arienge. Cenge nono gin kibino wang dopodop, di likame gimoro ko dong.

² Do pi wun jo kame wora, twer me alako na bino rieny i komu bala ceng, di ebino kede cango bala asara me ceng. Ibinunu sosomo pi yomcuny bala roce kame kogonyo ki awi.

³ I ceng kame ango abino timo iye gikame ango aiko pi timo nono, wun ibinunu nyonyono jo kame timo gikareco, kede tienu bala apua.

⁴ “Yutununu pwony ka ngatic na Musa, iswilia kede cik kame ango bin amie i moru me Sinai pi jo dedede me Isirael.

⁵ “Nenunu, ango abino cwano ne wu enabi Elia di pwodi ceng na likame otuno, en ceng adwong kede me twon peko.

⁶ En ebino bobo ribakino papi kede idwe gi, tetekeny ka ango abino, kur amuducaro pinyu.”