Malaki 3 - Baibuli I Leb Kumam 2013

¹ Rwot me jo yi gamo be, “Ango abino cwano ngaor na pi iiko na yongayo. Di do Rwot kame wun itienu mono nono ko bino ngeso bino i tempulo mere. Ngaor kame cunyu mito neno nono bino bino di eko tatamo kop me isikan na.”

² Do ngai kame bino twero kanyakino ceng me bino mere? Ngai kame bino dong cungo ka en eko neeno? En ebino bedo cal bala mac kame calaro nyonyo ka kotie jililo en, arabo bala sabuni kame bolocaro igoen.

³ En ebino bedo di eko ngolo kop bala ngat kame jililo siliba. Bala kame ngatet jililo kede siliba kede saabu, kamanono da ngaor ka Rwot bino jililo josaseredoti, tetekeny gin kiko bino tero but Rwot giayala kame poore.

⁴ Di do giayala kame jo me Yuda kede Yerusalem ko bino kelo but Rwot ko bino bedo gikame yomo cuny Rwot bala bin i kare kasek.

⁵ Rwot me jo yi waco be, “Ango abino bino i diere wu pi ngolo ne wu kop. Ango koma bino bedo mit pi mino ijura i kom jo kame timo tim me jwok, joadote, jo kame mio ijura me abe, jo kame sero jotic i musala gi, kede jo kame tero apuserun kirac, idwe kic, kede jokumbor, karacel kede jo dedede kalikame mia wor.

Mino Acel i kom Tomon

⁶ “Ango en Rwot, doko ango likame alokere. Manono en komio pwodi likame itiekunu, wun ikwae ka Yakobo.

⁷ Cako i kare ka joakwari wu, wun ibedunu parao tenge ki iswilia na di likame ikounu gwoko gi. Dwogunu buta, di ada ako bino dwogo butu. Do wun ipenyerenu be, ‘Odwog buti i yore mene?’

⁸ Benyo, dano twero yako Rubanga? Aso di wun itienu yaka! Do wun ipenyerenu be, ‘Epone mene kame wan otie yaki kede?’ Wun iyakanu i mino acel me tomon kede i mino giayala.

⁹ Ilam nono tie i kom wun dedede, pien ateker lung tie yaka.

¹⁰ Kelunu acel me tomon wu dedede i tempulo, tetekeny cam bed tie i oda. Tamanu, di ikounu bino neno ka ango likame ako yabo ne wu dirisan me malo, di ako bwoto ne wu winyo kame tot lamar.

¹¹ Ango abino gengo obonyo likame dudubo cam wu ki poti, doko olok wu bino nyak adikinicel.

¹² Di do atekerin dedede ko bino lwongo wu be jo kame tie kede yomcuny, pien lobo wu bino bedo lobo kame bedo iye ber.”

Rubanga Ocikere pi Timo Kisa

¹³ Rwot waco be, “Wun itiekunu yamo kirac i koma. Do di pwodi ipenyerenu be, ‘Kop nyo kame wan oyamo i komi?’

¹⁴ Wun itiekunu waco be, ‘Kony li me timo ne Rubanga tic. Nyo kame wan oudunu pi gwoko cik mere, arabo pi tururo i nyim Rwot me jo yi bala jo kame tie koko ngat oto.

¹⁵ Nataman wan onenunu joewaka en kame tie kede yomcuny. Jo kame timo gikareco likame gi dedede bedo negi kiber kenekene, do gin ka kitamo Rubanga, kibwot likame tie gimoro atimere negi.’ ”

¹⁶ Di do jo koudo lworo Rwot oko donyo yamo ken gi ken gi. Rwot oko ciko yite winyo gikame gin oudo kitie yamo, di oko wandiko i yi itabu, i nyim Rwot, nying jo koudo lworo Rwot, kede aparo pire.

¹⁷ Rwot me jo yi waco be, “Gin kibino bedo jo na. I ceng kame ango abino timo iye gikame aiko pi timo, gin kibino bedo jo na amaka. Ango abino gwoko gi bala kame nganywal gwoko kede atin mere kame lubo kop mere.

¹⁸ Manono bino mino jo bobo bino neno apokapoka kame tie i kom gikame timere i kom jo kopoore kede i kom jo kame timo gikareco, i kom jo kame tio pira kede i kom jo kalikame tio pira.”