Lusi 4 - Baibuli I Leb Kumam 2013

Boasi Onyomo Lusi

¹ Boasi oko ot i kacokere atie i erute me bomba di eko bedo piny. Cucuto nono di icuo kobedo wad kiyapiyapi twatwal kede Elimelek oko tuno, en icuo kame Boasi oudo owaco ne Lusi kop i kome. Boasi oko lwonge be, “Ngawota, kong bia kan iko bedo.” Aso Icuo nono oko ot di eko bedo.

² Di Boasi oko raro cuo tomon kikom joadongo me bomba di eko waco negi pi bedo piny kanono. Kakame gin oudo kitieko bedo kede,

³ Boasi oko waco ne icuo kobedo wad kede en nono be, “Bala kame nan Naomi otieko dwogo kede ki Moab, en etie cato poto ka wad wa Elimelek,

⁴ aso ango ako paro be apoore waco ne ida kop noni. Aso ka in itie mito poto nono, poore iwile i nyim jo kame nataman tie bedo kan. Do ka likame imite, tuc ne wa; pien twero me wilo lobo nono twatwal mere tie i cingi, kede alubo mere etie i cing ada.” Icuo nono oko waco be, “Abino lake.”

⁵ Boasi oko waco be, “Ceng kame in ibino gamo kede poto nono kibut Naomi, en ceng nono da kame ibino gamo kede Lusi dako me Moab, apuserut ka ngato, tetekeny poto nono dongi i diakal me ngato.”

⁶ Icuo kobedo wad kiyapi nono oko dwoko be, “Ka etie kamano ango do ajalo kop me wilo poto nono, pien manono nyuto be poto nono likame bino doko me ka idwe nango. In do wile; ango likame atwero.”

⁷ I kare nono, itok me jo me Isirael amakere kede wilo amoto seso jame oudo tie be: ngacat oudo gonyo amuka mere di eko mino ngawil. Manoni oudo cungo pi nyuto be kotieko kop nono.

⁸ Aso kakame icuo nono owaco kede ne Boasi be, “In wile,” en eko gonyo amuka ki tiene di eko mino Boasi.

⁹ Di Boasi oko waco ne joadongo kede jo dedede koudo tie kuno be, “Tin wun ibedunu ijurak na be ango agamo kibut Naomi gi dedede kobedo me ka Elimelek kede me ka awobe mege Kilion kede Makilon.

¹⁰ Medo i wi manono, Lusi dako me Moab, kobedo bin dako ka Malon otieko nan do doko dako na. Manoni bino mino jamini me ngato dong i diakal mere, doko da nyinge bino meede i diere me jo mege kede i bomba kame oudo ebedo iye. Tin wun ibedunu ijurak me kop noni.”

¹¹ Di joadongo kede jo apat dedede koudo ocokere i erute me bomba oko waco be, “Wan obedo ijurak. Okwao Rwot emi dako ni nono dok bala bin Lakeri kede Lea, mon kame bin onywalo ne Yakobo idwe atot. Okwao be in ibed dano kobaro kibut jo me ekeko ka Epurat, doko di nyingi ko doko iruo i Betelem.

¹² Doko da okwao be idwe kame Rwot bino mini kede nyako noni mi turi dok cal bala bin paco ka Peresi, en wot ka Yuda kede Tamar.”

Boasi kede Ikwae mege

¹³ Aso, Boasi oko tero Lusi odoko dako mere. Rwot oko mino Lusi winyo di eko udo yie eko nywalo atin awobi.

¹⁴ Mon oko waco ne Naomi be, “Pak bed but Rwot, ngat kame tin omi iudo akwari! Okwao be nying atin nono bed iruo i Isirael!

¹⁵ Ci wodi amari, en ngat kame etieko timo ni gikame ber kalamo gikame awobe kanyaare twero timo, onywalo ni atin akwari. Atin nono bino mini ibedo kede kuo anyen, doko ebino gwoki i kare me tio ni.”

¹⁶ Naomi oko tingo atin i kore di eko doko ngagwoke.

¹⁷ Mon me kio oko cako nying atin nono Obed. Di kiko tero ne jo ace kop be, “Kara konywalo ne Naomi akware atin awobi!” Obed oko nywalo Yese, di Yese oko nywalo Daudi.

¹⁸ Magi en ikwae ka Peresi: Peresi onywalo Keseroni,

¹⁹ Keseroni oko nywalo Ram, Ram oko nywalo Aminadab,

²⁰ Aminadab oko nywalo Nakason, Nakason oko nywalo Salamon,

²¹ Salamon oko nywalo Boasi, Boasi oko nywalo Obed,

²² Obed oko nywalo Yese, di Yese oko nywalo Daudi.