Luka 24 - Baibuli I Leb Kumam 2013

Iyarun ka Yesu

¹ Ceng Sande odiko sek, mon nogo oko ot i ates, pi tero gikame ngwece gi kur, kame oudo gin kitieko iiko.

² Di kiko udo koloro kidi tenge ki dog ates,

³ do kakame kidonyo kede i yie, kiko udo kom Yesu li.

⁴ Kakame pwodi oudo wi gi ocungo kede pi gikame oudo otimere, cuo are oko cungo i nget gi di kingapo igoen atar liamaliam.

⁵ Pi kite kame inonong oudo omako gi kede, omio kiko luro wi gi piny, do cuo nogo oko waco ne gi be, “Pinyo komio imounu ngat kame kuo kikom jo oto? En likame etie kan, do etieko yaruno.

⁶ Yutununu gikame bin ewaco ne wu di pwodi oudo etie Galilaya,

⁷ be miero mi Wot ka dano i cing jodubo, di kiko gure i kom musalaba, do ingei ceng me adek en eko bino yaruno.”

⁸ Di do gin kiko yutuno kope mege.

⁹ Di bin kidok ki ates, kiko tatamo ne joor tomon kiwie acel ka kope go dedede kede ne jo apat da dedede.

¹⁰ Maria Magadalina, Joana kede Maria toto me Yakobo, kede mon mogo ace kame bin oudo oupere kede gi, en kame owaco ne joor kope nogi.

¹¹ Do joor oko tero kop noni bala kop me itatam moro kame tiene li, di likame kiko yei.

¹² Do Petero oko yai, di eko ringo i ates; kakame egungo kede pi neno yi ates, en eko neno isukan ken gi abongo gimoro; di eko dok paco di euro gikame otimere.

Ot tuno Emaus

¹³ Ceng acel nono jo are kikom jo kame bin lubo Yesu oudo tie ot i calo kame kolwongo be Emaus, kame oudo tie mairo kanyaare yai ki Yerusalem,

¹⁴ gin oudo kitie ot di kiyamo ken gi ken gi kop i kom gikame oudo otimere.

¹⁵ Kakame oudo pwodi kitie yamo kede di kinywako tam, Yesu kikome oko noko gi, di eko donyo upere kede gi.

¹⁶ Do oudo koumo wang gi, omio likame kiko twero ngene.

¹⁷ Di Yesu oko penyo gi be, “Kop nyo ino kame wun itienu yamo kenu kenu di itienu ot?” Gin kiko cungo, di kili kede yomcuny.

¹⁸ Di ngat acel kikom jo nogo, kame bin oudo kolwongo be Keleopa, oko dwoko ne be, “Mam in keni en kame do ibedo welo i Yerusalem, kame kwia gikame otimere kuno i ceng nogi?”

¹⁹ Di en eko penyo gi be, “Nyo igonogo?” Gin kiko dwoko ne be, “Kop i kom Yesu me Nasaret, kame oudo obedo enabi kame tie kede twer i tice kede i yamo mege, i nyim Rubanga kede i nyim jo dedede.

²⁰ Do jodongo me josaseredoti kede jopug wa oko mine i cing wegi apugan me wek ngol ne kop me to, di do kiko gure i kom musalaba.

²¹ Do wan oudo otie kede gen be en nono kame oudo eyaro bino lako jo me Isirael. Doko medo i wi mano, tin do oromo ceng me adek cako ceng kame gino otimere kede.

²² Do mon mogo kame oudo tie i ekodet wa oko mino wi wa ocungo. Gin oudo kiyai obai sek di kiko ot i ates,

²³ do likame kiko udo kome. Di do kiko dwogo di kiwaco be imalaikan oneeno but gi di waco ne gi be en ekuo.

²⁴ Jo mogo me ekodet wa oko ot i ates, di kiko udo tie kamanono bala kite kame mon nogo oudo owaco kede, do gida likame kiko nene.”

²⁵ En eko waco ne gi be, “Wun tin imingunu benyo, doko cunyu tin nyap benyo pi gal yei kope dedede kame bin inabin otuco!

²⁶ Mam oudo poore Kirisito nen can nogi dedede, di do en eko donyo i deyo mere?”

²⁷ Di Yesu oko cako gonyo ne gi kop dedede kame bin oudo koyamo i kome i iwandik kacil dedede, cako ki itabun ka Musa tuno kede i iwandik me inabin.

²⁸ Kakame kinoko kede calo kame oudo kitie ot iye, Yesu oko meede kede ot ineno bala oudo etie kato akata,

²⁹ do gin kiko dine di kiwaco ne be, “Bed ber kede wa, pien piny oyapuno yuto, doko isawan da okato.” Di do en eko ot bedo kede gi.

³⁰ Kakame ebedo kede gi kacam, en eko kwanyo mugati di eko kwano winyo iye, di eko tuturo, eko mino gi.

³¹ Di wang gi oko yabere, kiko ngene; do en eko rwenyo ki wang gi.

³² Gin kiko donyo yamo ken gi ken gi be, “Mam cuny wa oki oko pukpuka pi kilel iesawa kame en oudo etie yamo kede wa i yongayo, kakame egonyo ne wa kede dwong me iwandik kacil?”

³³ Di gin kiko yai esawa nono kiko dok Yerusalem, kiko udo joor tomon kiwie acel di ocokere karacel kede jo kame bin oudo tie kede gi.

³⁴ Gin oudo kitie waco be, “Rwot oyaruno ateteni, doko etieko neeno but Simoni!”

³⁵ Di do gin kiko tatamo gikame oudo otimere i yongayo, kede epone kame en eko ngere kede but gi iesawa kame etuturo kede mugati.

Yesu Oneeno ne Josiao mege

³⁶ Di oudo pwodi gin kitie yamo kop noni, Yesu kikome oko cungo i diere gi di eko waco ne gi be, “Mulem bed butu.”

³⁷ Lworo kede mielkom oko mako gi, di oudo kiparo be kineno tipo moro.

³⁸ Di en eko penyo gi be, “Pinyo komio komu oto kamano, doko pinyo komio gung tie i cunyu?

³⁹ Nenunu cinga kede tiena, ango inononi; mulanu ikounu bino ngeno; pien tipo likame tie kede ringokome kede cogo bala kite kame nan wun inenunu ango atie kede.”

⁴⁰ Kakame etieko yamo kede kamano, en eko nyuto ne gi cinge kede tiene.

⁴¹ Di pwodi yomcuny atek omio gi likame kitwero yei, doko di kitie kede ur, en eko penyo gi be, “Itienu kede gimoro kan me acama?”

⁴² Gin kiko mine deknam kame kobulo,

⁴³ en eko gamo di eko camo i nyim gi kanono.

⁴⁴ Di do en eko waco ne gi be, “Magi en kope nango kame bin awaco ne wu i kare kame oudo pwodi atie kede wu be, gi dedede kame kowandiko i koma i itabu ka Musa kede me inabin kede i Sabuli miero cobere kakare.”

⁴⁵ Di en eko yabo wi gi pi mino gi niang iwandik kacil,

⁴⁶ di eko waco ne gi be, “Kowandiko be, Kirisito miero bei i can, di oko yaruno en kikom jo oto ingei ceng me adek;

⁴⁷ kede da be poore pwonyo kop i kom iswilar kede sasiro jo ki dub gi i nyinge, ne atekerin dedede cako ki Yerusalem.

⁴⁸ Wun en ibedunu ijurak me kope nogi.

⁴⁹ Doko nenunu, abino cwano ne wu gikame Papa na ocikere iye. Pi mano, bedunu i bomba kan, tuno kede kame kongapo wu kede twer kame yai ki malo.”

Kotero Yesu i Malo

⁵⁰ Di do en eko telo gi etero gi Betania, eko tingo cinge malo, di eko mino gi winyo.

⁵¹ Kakame oudo etie mino gi kede winyo, en eko pokere kede gi di oko tinge kotere i malo.

⁵² Gin di do kiko dok Yerusalem kede kilel adwong adikinicel,

⁵³ kiko donyo pako Rubanga i tempulo nakanaka.