Luka 23 - Baibuli I Leb Kumam 2013

Kotero Yesu i nyim Pilato

¹ Di do ekodet dedede kame bin tie i kansulo oko yai malo, di kiko tero Yesu i nyim Pilato.

² Kiko cako pide di kiwaco be, “Wan oudo icuo ni di tie rwenyo ateker wa, di egengo wa culo esolo but Kaisari, doko di ewaco be en kikome ebedo Kirisito abaka.”

³ Pilato oko penye be, “In en ibedo abaka me Iyudayan?” Yesu oko dwoko ne be, “In en iwaco kamanono.”

⁴ Di do Pilato oko waco ne jodongo me josaseredoti karacel kede ekodet be, “Ango likame audo raco moro i kom icuo ni.”

⁵ Do gin kiko cerededo kitek di kiwaco be, “Lono tie rubo wi jo dedede me Yudea kede pwony mere. En ecako ki Galilaya nan do etuno kede kiton kan da.”

Kotero Yesu i nyim Erode

⁶ Di bin Pilato owinyo kop noni, en eko penyo ka Yesu oudo obedo Ngagalilaya.

⁷ Kakame eniang kede kiber be Yesu oudo owok ki adul kame Erode pugo, en eko cwane but Erode, ngat kame oudo da tie Yerusalem i kare nono.

⁸ Cuny Erode oko bedo yom adikinicel pi neno Yesu, pien oudo lem cunye mito nene. En oudo etieko winyo kop i kom Yesu, doko oudo etie kede gen me nene di etimo gianena moro.

⁹ Pi mano, en eko pepenyo Yesu pi esawa alac twatwal; do Yesu likame oko dwoko kop moro.

¹⁰ Jodongo me josaseredoti karacel kede jopwony me Iswil oudo tie cungo kuno di kipide kede gero adikinicel.

¹¹ Di do Erode kede isirikalen mege oko timo ne Yesu tim me acae di kinyere; kakame kotieko ngapo ne kede igoen kabeco me angosibib, Erode oko mino kodwoke but Pilato.

¹² Pilato kede Erode oudo dingere, do cako cenge nono di do kiko doko awotino.

Kongolo ne Yesu Kop me To

¹³ Di do Pilato oko lwongo jodongo me josaseredoti kede jopug kede ekodet dedede karacel,

¹⁴ di eko waco ne gi be, “Wun ikelunu icuo ni buta kan be etie rwenyo jo kede pwony mege; do ingei pepenyo en i nyimu kan, ango likame aude kede raco moro i kom kope kame wun ipidenu iye.

¹⁵ Akadi Erode da likame oudo gimoro arac i kome, en komio eko dwoke but wa. Ateteni, likame tie gimoro arac kame en etimo kame romo mino kongolo ne kop me to.

¹⁶ Pi mano, ango ayaro mino kodae di ako weke eoti.”

¹⁷ (Oudo Pilato miero bin gony ne gi mabus acel i kare me Ebaga me Kalamo.)

¹⁸ Do ekodet oko redo kede dwan amalo di kiwaco be, “Nek icuo ni! Gony ne wan Baraba!”

¹⁹ Baraba oudo obedo icuo kame kotweo i otkol pi kop me nek, kede pi kop me logologo kame bin otimere i bomba me Yerusalem.

²⁰ Pilato bin tie kede mit me gonyo Yesu, omio en eko bobo yamo kede gi;

²¹ do gin kiko ilelem kitek be, “Gure i kom musalaba, gure i kom musalaba!”

²² Pilato oko bobo waco ne gi tien me adek mere be, “Pinyo kara, raco nyo kame en etimo? Ango likame audo raco moro i kome kame romo mino kongolo ne kop me to. Pi mano, ango ayaro mino kodae di ako weke eoti.”

²³ Do gin kiko cerededo kede ilelem atek, di kiwaco be poore gur Yesu i kom musalaba. Koko gi oko cobere.

²⁴ Di do Pilato oko ngolo ne Yesu kop bala kite kame oudo gin kimito kede.

²⁵ En eko gonyo ne gi icuo kame bin kotweo i otkol pi kelo logologo kede pi timo nek, kame gin oudo kikwao be gony ne gi; do eko jalo Yesu i cing gi pi gin timo ne gikame gin kimito.

Koguro Yesu i kom Musalaba

²⁶ Esawa kame isirikalen oudo tie tero kede Yesu tenge, kiko mako icuo moro me Sirene, kame nyinge Simoni, kame oudo tie wok ki ooko me bomba. Gin kiko riongo ne musalaba i ngute tetek, di eko donyo yeno di elubo Yesu ki cen.

²⁷ Ekodet me jo oko donyo lube ki cen karacel kede mon kame oudo tie paro pire di kikok kitek.

²⁸ Do Yesu oko lokere oneno gi, di eko waco ne gi be, “Anyira me Yerusalem, kur ikokunu pira, do kokunu piru kede pi idwe wu.

²⁹ Pien ateteni awaco ne wu be, ceng tie bino kame jo bino waco kede be, ‘Kitie kede winyo mon kame obedo adongei, kede auris kalikame onywal, kede tune kalikame kodoto!’

³⁰ Di do kiko bino cako waco ne mori be, ‘Pot i kom wa’; kede ne imukuran da be, ‘Um wa.’

³¹ Pien ka kitimo kaman di yat pwodi numu, nyo do kame bino timere kame yat otuo?”

³² Di do kiko tero cuo mogo are da kame bin obedo jo kame oudo timo tim areco, pi ot guro gi i kom musalaba karacel kede Yesu.

³³ Kakame do bin kituno kede i kabedo kame kolwongo be “Cogowic”, kiko guro Yesu i kom musalaba ki kuno karacel kede jo nogo kame oudo timo tim areco, ngat acel i bade tetu cam, kede ngat acel i bade tetu ngodal.

³⁴ Di Yesu oko waco be, “Papa, sasiro gi, pien kikwia gikame kitie timo.” Di kiko donyo uco alulu pi popoko igoen mege.

³⁵ Jo oko donyo cungo kanono di kingie. Do jopug oko donyo junye ne di kiwaco be, “En etieko lako jo apat, ber kong eda elakere kene, ka di en ebedo Kirisito ka Rubanga, ngat kame Rubanga oyero!”

³⁶ Isirikalen da oko donyo nyere kede acae; oudo kibino bute di kimie bwini awac,

³⁷ di kiwaco be, “Ka in en abaka me Iyudayan, lakere keni!”

³⁸ Oudo tie iwandik moro kame koguro i wi musalaba mere kame waco be, “Man en abaka me Iyudayan.”

³⁹ Ngat acel kikom jo nogo kame oudo timo tim areco, kame bin koguro, oko cako cotoro Yesu di ewaco be, “Mam in ibedo Kirisito? Lakere keni di iko lako wada!”

⁴⁰ Do ngat ocelu oko coke di ewaco be, “Mam in likame ilworo Rubanga? Aso di kongolo nin kop kame rom aroma kede mere.

⁴¹ Do ateteni kongolo ne wan kop kakare, pien wan otie udo adwokini me tice wa, do likame tie gimoro arac kame dano ni otimo.”

⁴² Di do eko waco be, “Yesu, yutuno ango kame idonyo i Ajakanut ni.”

⁴³ Yesu oko waco ne be, “Ateteni awaco ni be, tin noni iyaro bedo keda i paradis.”

Yesu Oto

⁴⁴ Oudo esawa kanyape me iceng do oyapuno romo; piny lung oko doko col tuno esawa kanyangon me otieno

⁴⁵ di likame wang ceng oneeno. Egoe kame bin poko isenge i tempulo oko yec odoko are.

⁴⁶ Di do Yesu oko koko kede dwan amalo di ewaco be, “Papa, ajalo tipo na i cingi!” Ingei waco kamano, en eko oomo cunye, di do eko to.

⁴⁷ Kakame bin ngadwong me isirikalen oneno kede gikame otimere, en eko pako Rubanga di ewaco be, “Ateteni dano ni kom oudo li kede raco moro!”

⁴⁸ Kakame ekodet me jo dedede kame bin ocokere kuno oneno kede gikame otimere, gin kiko dok paco di kibapo kor gi.

⁴⁹ Jo dedede kame bin onao kede Yesu, karacel kede mon kame oudo olube cako ki Galilaya oko cungo ki tenge pi neno gikame oudo tie timere nogi.

Koyiko Yesu

⁵⁰ Bin tie icuo moro kame nyinge Yosepu, me bomba me Iyudayan kame kolwongo be Arimatea. En oudo ebedo dano acel kikom jo kame bedo i kansulo me Iyudayan, en oudo ebedo dano kopoore doko di eber.

⁵¹ En bin likame eyei kede tam gi, akadi kede tim gi da. En oudo etie daro bino me Ajakanut ka Rubanga.

⁵² Icuo noni bin oko ot but Pilato, di eko kwano be mie kom Yesu.

⁵³ En eko tako kom Yesu ki musalaba, di eko bono kede esuka, di eko cibe i ates kame oudo bin koroko i lela, ates kalikame pwodi oudo koyiko iye ngatamoro.

⁵⁴ Ceng no oudo obedo ceng me iikere, pien Ceng Sabato do oudo tie gere.

⁵⁵ Mon kame oudo oupere kede Yesu wok ki Galilaya oko lubo Yosepu, kiko neno ates kede epone kame kopielo kede kome;

⁵⁶ di do gin kiko dok, kiko iiko mo kede gikame ngwece gi kur. I Ceng Sabato, gin kiko wei bala kite kame cik oudo mito kede.