Luka 18 - Baibuli I Leb Kumam 2013

Agole me Apuserut kede Ngangolkop

¹ Yesu di do oko tatamo ne josiao mege agole kame pwonyo gi be poore di kilego nakanaka abongo weko.

² En ewaco ne gi be, “Bin tie i bomba moro ngangolkop kalikame woro Rubanga, doko di likame eparo pi dano moro da.

³ Apuserut moro bin tie i bomba nono, kame oudo wire but ngangolkop nono di ebako ne doge be, ‘Okwe konya kede ngat kame ango atie pido kede.’

⁴ Pi kare moro, ngangolkop nono oudo dagi winyo kop me apuserut nono; do i cen mere, en eko do yamo i cunye kene be, ‘Bed bala ango likame alworo Rubanga arabo aparo pi dano moro,

⁵ do pi kite kame apuserut ni ocobuno ango kede, abino konye i pido mere. Pien ka li, wire mere buta bino oola.’ ”

⁶ Di Rwot oko waco be, “Winyunu gikame ngangolkop kame li kede ateni waco.

⁷ Wun iparunu be likame Rubanga bino ngolo kop kiber pi konyo jo mege kame en eyero, jo kame kok bute iceng kede iwor? Iparunu be eyaro gal kede konyo gi?

⁸ Awaco ne wu be, eyaro ngolo kop kiber pi konyo gi awakawaka. Bed bala kamanono da, iparunu be ka Wot ka dano odwogo ebino udo yei tie i lobo?”

Agole me Ngaparisayo kede Ngarar Esolo

⁹ Yesu di bobo oko waco agole ni ne jo kame bin genere ken gi be gin kipoore, di kicao jo icegun.

¹⁰ En ewaco be, “Cuo are bin ooto i tempulo ilega, ngat acel kikom gi oudo Ngaparisayo, do ngat acel oudo ngarar esolo.

¹¹ “Ngaparisayo bin oyai malo di eko cungo, eko cako ilega eliling di ewaco be, ‘Rubanga, ango apwoyi, pien ango likame acal kede jo apat, bala joyak, jo kalikame timo gi me ateni, joadote, akadi bala ngarar esolo moroni.

¹² Ango akanyo kec tien are i sabiti acel, doko akwanyo irabu me acel me tomon me gi dedede kame ango audo.’

¹³ “Do ngarar esolo nono oko gire cungo i tenge, di likame etingo akadi wange malo, en eko bapo kore di ewaco be, ‘Rubanga, Okwe kisa maki i koma, ango ngadubo!’

¹⁴ “Awaco ne wu be, icuo noni ooto ture di kotere be epoore i nyim Rubanga do weko Ngaparisayo nono; pien ngat kame tingere kene kobino dwoke piny, do ngat kame mwolere kobino tinge malo.”

Yesu Omio Idwe Atino Winyo

¹⁵ Jo oko donyo kelo kiton imukerun but Yesu me wek eket cinge i kom gi. Kakame josiao oneno kede kamano, gin kiko cokocoko gi be kiweki.

¹⁶ Do Yesu oko lwongo gi bute di eko waco be, “Wekunu idwe atino bin buta, kur igengunu gi; pien Ajakanut ka Rubanga tie pi jo kame cal bala gin.

¹⁷ Ateteni awaco ne wu be, ngat kalikame gamo Ajakanut ka Rubanga bala atin atitidi, likame ebino donyo iye.”

Icuo Kobaro

¹⁸ Ngatel moro me Iyudayan oko penyo Yesu be, “Apwony Aber, atim nyo me wek aud kuo kame bedo nakanaka?”

¹⁹ Yesu oko penye be, “Pinyo komio in ilwonga be ngat aber? Likame tie ngat aber kwanyo Rubanga kenekene.

²⁰ Mam in ingeo cik gi: ‘Kur itimo adote, Kur ineko, Kur ikwalo, Kur imio ijura me abe, Wor papa ni kede toto ni?’ ”

²¹ En eko dwoko be, “Gigi dedede ango abedo lubo cako di pwodi ango atin awobi.”

²² Kakame Yesu owinyo kede kamano, en eko waco ne be, “Tie pwodi gi acel korem ni; oti icat gi dedede kame in itie kede, iko popoko ne jocan sente kame iudo, di iko bino bedo kede abar i malo, di do iko bino luba.”

²³ Do kakame icuo nono owinyo kede kope nogi, cunye oko dubere; pien oudo ebaro twatwal.

²⁴ Yesu oko ngine di oko waco be, “Donyo i Ajakanut ka Rubanga tin tek benyo ne jo kobaro!

²⁵ Eyoyot ne aguragura donyo ki wang piso kalamo ngabar donyo i Ajakanut ka Rubanga.”

²⁶ Jo kame bin owinyo kope nogi oko penyo Yesu be, “Ngai do kame twero udo alako?”

²⁷ Do Yesu oko dwoko ne gi be, “Gi kalikame twerere kibut dano, twerere kibut Rubanga.”

²⁸ Di Petero oko waco ne be, “Neningo, wan otieko weko miere wa di oko lubi.”

²⁹ Di Yesu oko waco ne gi be, “Ateteni awaco ne wu be, likame tie ngat kame oweko ture, amotoko dako mere, arabo imiegu mege, arabo jonywal mege, akadi idwe mege da, pi Ajakanut ka Rubanga,

³⁰ kalikame bino udo atot kibut Rubanga i kare noni, kede eko bino udo kuo kame bedo nakanaka i kare koyaro bino.”

Yesu Owaco Kop me To mere Tien me Adek

³¹ Yesu oko tero josiao tomon kiwie are tenge kargi ken gi, di en eko waco ne gi be, “Winyunu, wan otienu ot Yerusalem, di gi dedede kame bin inabin owandiko i kom Wot ka dano ko bino cobere.

³² Kobino jale i cing jo kalikame Iyudayan; di oko bino nyware, di oko timo ne tim me lewic, kede oko ngungulo lau i kome.

³³ Gin kibino dane di kiko neke da, do ingei ceng me adek, en ebino yaruno.”

³⁴ Do josiao mege likame oko niang gikame en ewaco akadi acel; pien oudo kokano dwong me kope nogi kibut gi, omio gin likame kiko niang gikame en ewaco.

Yesu Oyabo Wang Emuduk koudo Kware

³⁵ Kakame Yesu onoko kede Jeriko, oudo icuo moro tie kuno kame wange oto, kame oudo tie bedo i nget yongayo di ekware.

³⁶ Kakame ewinyo kede ekodet di tie beo, en eko penyere pi mito ngeno gikame oudo tie timere.

³⁷ Gin kiko waco ne be, “Yesu me Nasaret en ino kame tie beo no.”

³⁸ En eko lwongere kede dwan amalo be, “Okwe Yesu Wot ka Daudi, mi kisa maki i koma!”

³⁹ Jo kame bin otelo yongayo oko retakino en be elingi; do en eko meede ameda kede lwongere di ewaco be, “Okwe Wot ka Daudi, mi kisa maki keda!”

⁴⁰ Yesu oko cungo di eko waco ne gi be kikel emuduk nono bute; kakame lonono onoke kede, en eko penye be,

⁴¹ “Imito be atim ni nyo?” En eko waco be, “Rwot, amito be wanga gei bobo neno.”

⁴² Yesu oko waco ne be, “Wek wangi yabere, yei ni ocangi.”

⁴³ Cucuto nono di do ecako neno piny di eko lubo Yesu, di emio Rubanga deyo. Kakame ekodet oneno kede gino, kiko pako Rubanga.