Luka 15 - Baibuli I Leb Kumam 2013

Oromo Korwenyo

¹ Kikano jorar esolo kede jodubo dedede oudo tie nyiko but Yesu pi mito winyo kop mere.

² Iparisayon kede jopwony me Iswil oko donyo ingungur di kiwaco be, “Icuo ni kom gamo jodubo, doko di ecamo kede gi.”

³ Di do Yesu oko yamo ne gi agole ni be,

⁴ “Ngai kikom wu, ka etie kede romini tol acel, di acel kikom gi oko rwenyo, likame eweko romini ot kanyangon kiwie kanyangon icegun ka i itela, di eko ot mono acel korwenyo nono tuno ude?

⁵ Kame eude, en erionge i ngute kede kilel.

⁶ Ka etuno i paco, en elwongo jowote, karacel kede jokio mege dedede, di eko waco ne gi be, ‘Lelunu karacel keda, pien audo oromo na kame oudo orwenyo.’

⁷ Iepone nono da, awaco ne wu be, kilel bino bedo dwong i malo pi ngadubo acel kame swilaro, kalamo pi jo ot kanyangon kiwie kanyangon kopoore, kame li kede gikame kipoore swilaro kiye.

Ogap Korwenyo

⁸ “Arabo dako mene ka etie kede ogap tomon, di ogap acel kikom gi oko rwenyo, likame ecwinyo etala, di eko weno ot di emo kiber tuno kede di eude?

⁹ Aso, kame etieko ude, elwongo jowote kede jokio mege dedede karacel, di en eko waco ne gi be, ‘Lelunu karacel keda, pien audo ogap na kame oudo orwenyo ca.’

¹⁰ Iepone nono da, ango awaco ne wu be, imalaikan ka Rubanga bino bedo kede kilel adwong adikinicel pi ngadubo acel kame swilaro.”

Awobi Korwenyo

¹¹ Di Yesu oko waco be, “Oudo tie icuo moro acel kame tie kede awobe mege are.

¹² Awobi atidi oko waco ne papa mere be, ‘Papa, mia iner na me jame nin.’ Di do icuo nono oko popoko jame mege ne awobe mege nogo.

¹³ Ingei ceng anonok, awobi atidi oko coko jame mege dedede, di eko yai ot i piny abor kakame en eko dudubo kiye jame mege dedede i kuo me atatai.

¹⁴ Kakame bin etieko dudubo kede gi dedede kame oudo etie kede, kec atek oko poto i piny nono, di do kuo oko cako doko tek ne.

¹⁵ Di en eko ot but icuo moro kame oudo obedo anywali me piny nono, icuo nono oko cwane pi ot gwoko ipegei mege.

¹⁶ En oudo cunye romo bedo yom pi camo aligo me muranga kame bin ipegei camo; do likame tie ngatamoro kame oko mine gimoro.

¹⁷ Do kakame wie oko yabere kede, en eko waco be, ‘Jotic ka papa na adi en kame camo cam di ko bwono gi, di ango ine atie kan ayaro to kec!

¹⁸ Ayaro yai ako ot but papa na, di ako waco ne be, Papa, ango atieko dubo i nyim Rubanga kede i nyimi;

¹⁹ ango do likame apoore pi in lwonga be wodi; tera do bala ngat acel kikom jotic ni.’

²⁰ Di do en eko yai, di eko ot but papa mere. “Do di pwodi oudo etie kakabor, papa mere oko nene di oko bedo kede cuny me kisa i kome, di eko ringo bute, eko gwake i kore, di eko note.

²¹ Di wode oko waco ne be, ‘Papa, ango atieko dubo i nyim Rubanga kede i nyimi da; ango do likame apoore pi in lwonga be wodi.’

²² Do papa mere oko waco ne jotic mege be, ‘Susunyunu kelo ekanso aber ingapunu ne, di ikounu rwako epeta i lwete, kede ikounu ngapo ne amuka.

²³ Di ikounu kelo etobait kame mio ingolunu, me wek ocamunu kede kilel;

²⁴ pien woda ni oudo oto, do nan ekuo bobo; oudo erwenyo, do nan eudere.’ Di do jo oko cako camo ebaga.

²⁵ “I kare kame gigo oudo tie timere kede, wode adwong oudo pwodi tie i poto; kakame oudo do etie dwogo kede di do enoko paco, en eko winyo wer kede miel me jo.

²⁶ En eko lwongo ngatic acel, eko penye gikame oudo tie timere.

²⁷ Ngatic nono oko dwoko ne be, ‘Omini atidi en kame odwogo, di papa ni oko neko ne etobait amio; pien eude di ekuo, doko di kome yot.’

²⁸ “Do awobi adwong cunye oko wang, di eko dagi donyo i ot. Papa mere oko wok ooko di oko donyo ngangao en.

²⁹ Do en eko waco ne papa mere be, ‘Neningo, mwakini gi dedede ango abedo timo ni tic, doko likame adagi winyo cik ni moro akadi acel; do in likame pwodi imia akadi atin diel moro da me wek acam ebaga kede jowota.

³⁰ Do wodi ni, kame ocamo jame nin kede imalayan nan odwogo, di in iko ngolo ne etobait amio!’

³¹ Do papa mere oko dwoko ne be, ‘Okwe woda, in itie keda nakanaka, doko gi dedede kame ango atie kede obedo megi.

³² Oudo epoore ne wan tedo ebaga kede kilel, pien omini ni oudo oto, do nan ekuo; oudo erwenyo, do nan eudere.’ ”