Luka 13 - Baibuli I Leb Kumam 2013

Ka likame Iswilarunu ibinunu To

¹ I kare nono oudo jo mogo tie kuno, gin kiko waco ne Yesu kop i kom Jogalilaya mogo kame bin Pilato oudo omio koneko, di oko nyalo remo gi kede giayala gi.

² Di Yesu oko penyo gi be, “Iparunu be Jogalilaya nogi oudo obedo jodubo twatwal kalamo Jogalilaya icegun, komio kineno can kamano?

³ Ango awaco ne wu be, likame kamano; pi mano ka likame iswilarunu, wuda dedede ibinunu to kamanono.

⁴ Arabo jo tomon kiwie kanyauni kame bin gedo abor malo me Siloam opoto i kom gi oko neko gi; iparunu be mano bin otimere pien gin do oudo kibedo jodubo areco kalamo jo dedede kame bin bedo Yerusalem?

⁵ Ango awaco ne wu be, likame kamano; aso ka likame iswilarunu, wuda dedede ibinunu to kamanono.”

Agole me Yat Epigi kalikame Nyak

⁶ Di Yesu oko tatamo ne gi agole ni be, “Oudo tie icuo moro kame opito yat epigi i poto mere; en eko bino mono anyakini mogo kiye, do likame eko udo moro.

⁷ En eko waco ne ngatic me poto mere nono be, ‘Neningo, oromo nan mwakini adek di ango abino mono anyakini ki yat epigi no, do likame audo moro. Nan do tonge piny; pinyo komio edong dubo lobo.’

⁸ Do ngatic me poto nono oko dwoko ne be, ‘Adwong, likame kamano, weke ber bobo ebed pi mwaka ni do kenekene, ango ber kong abok lobo mogo i dude kede aony bolia moro i dude.

⁹ Ka en eko nyak mwaka no, udo ber; do ka li, iko bino do tonge piny.’ ”

Yesu Ocango Angwalas Ceng Sabato

¹⁰ Ceng Sabato moro acel, Yesu oudo tie pwony i sinagoga.

¹¹ Dako moro oudo tie kuno kame tipo areco oudo omio angwal pi mwakini tomon kiwie kanyauni; en oudo ekude di likame bobo etwero cungo di eriere da.

¹² Kakame Yesu bin onene kede, eko lwonge di eko waco ne be, “Dako ni, in do kotieko gonyi ki angwal ni.”

¹³ Yesu oko keto cinge i wi dako nono, cucuto di eko cungo malo di eriere, di do en eko donyo pako Rubanga.

¹⁴ Do ngadwong me sinagoga cunye oko wang, pien oudo Yesu ocango dano Ceng Sabato. En eko waco ne jo be, “Tie ceng kanyape kame jo poore timo kede tice; bianu i ceng nogo di oko cango wu, do weko bino Ceng Sabato.”

¹⁵ Di Rwot oko dwoko be, “Wun joecuke, ngai kikom wu kalikame gonyo twon arabo asigira mere di eko tero ot mato pii Ceng Sabato?

¹⁶ Do dako no, akwar Aburaam, kame Sitani oudo otweo pi mwakini tomon kiwie kanyauni, pinyo kame mio likame kogonye Ceng Sabato?”

¹⁷ Kop mere kame edwoko nono oko mino lewic omako jokwor mege; jo dedede di do oko bedo kede kilel pi gi dedede me deyo kame Yesu oudo otimo.

Agole me Nyige me Karadali

¹⁸ Di do Yesu oko penyere be, “Ajakanut ka Rubanga ber cal bala nyo? Doko da, abin apore kede nyo?

¹⁹ En ecal bala nyige me karadali, kame dano moro otero di eko ot cuno i poto mere; en eko dongo di eko doko yat adwong kame winy apor oko bino gero ude gi i ajange mege.”

Agole me Arup

²⁰ Di bobo Yesu oko penyere be, “Abino poro Ajakanut ka Rubanga kede nyo?

²¹ En ecal bala arup kame dako juko di eko nyalo kede moko alos me gipim adek, tuno kede di en eko mino moko alos lung buuno.”

Ekeko Adiding

²² Yesu oudo tie ot tetu Yerusalem; en eko donyo bebeo i bomban kede i calere di epwonyo jo.

²³ Di ngatamoro oko penye be, “Rwot, mam jo anonok en kame bino udo alako?” Yesu oko dwoko ne gi be,

²⁴ “Timunu teko twatwal pi donyo kiye ekeko adiding; pien awaco ne wu be, jo atot bino mito donyo i Ajakanut ka Rubanga, do likame kibino karuno.

²⁵ Pien kame won ot otieko yai malo di eko cego ekeko mere, wun ibinunu dong cungo ooko di ikukungunu ekeko di iwacunu be, ‘Rwot, Okwe yab wada,’ do en ebino dwoko ne wu be, ‘Ango akwia kakame wun iwokunu kiye.’

²⁶ Di do wun ikounu donyo waco be, ‘Wan ocamo di omato da karacel kede in, doko in ipwonyo i miere wa.’

²⁷ Do en ebino waco ne wu be, ‘Awaco ne wu be, ango akwia kakame wun iwokunu kiye; orwaunu tenge kibuta, wun jo kame timo tim areco!’

²⁸ Di wun ikounu bino koko kitek kede mwodo lak ka inenunu Aburaam, Isaka, Yakobo kede inabin dedede di kitie i Ajakanut ka Rubanga, do di wun kouco wu ooko.

²⁹ Jo bino wok ki tetu kide, kede ki tetu potoceng, ki tetu malo kede ki tetu piny, di kiko bedo kacam i Ajakanut ka Rubanga.

³⁰ Di do jo mogo kame nan tie me ajikini ko bino bedo me agege; jo mogo kame nan tie me agege ko bino bedo me ajikini.”

Amara ka Yesu pi Yerusalem

³¹ Esawa nono, Iparisayon mogo oko bino, kiko waco ne Yesu be, “In poore iyai iko ot tenge ki kan, pien Erode mito neki.”

³² Do en eko dwoko ne gi be, “Otunu iwacenu ekwee no be, ‘Ango atie riamo jwogi kede cango jo tin kede diki, do i ceng me adek, ango ako bino tieko tic na.

³³ Do ango miero ameede kede ot na tin kede diki, kede ceng alubo mere; pien likame poore enabi to ooko me Yerusalem.’

³⁴ “Okwe in Yerusalem, Yerusalem! In bomba kame neko inabin, doko ididipo jo kame Rubanga ooro buti! Tien atot ango oudo amito be koto arukumo idwe ni bala kite kame gweno rukumo kede idwe mege i bwome, do in iko dagi na!

³⁵ Pi mano, Rubanga otieko weko ni odi. Doko nan awaco ni be, likame ibino nena bobo tuno kede i kare kame in ibino waco kede be, ‘Etie kede winyo ngat kame bino i nying Rwot.’ ”