Luka 11 - Baibuli I Leb Kumam 2013

Yesu Omio Pwony kame mako Ilega

¹ Ceng moro acel Yesu oudo tie lego i karamoro. Kakame etieko kede lego, ngat acel kikom josiao mege oko waco ne be, “Rwot, pwony wa epone kame opoore lego kede, bala kite kame bin Yokana da opwonyo kede josiao mege.”

² En eko waco ne gi be, “Kame itienu ilega, wacunu be, “‘Papa, nyingi bed me awora. Wek Ajakanut ni bin.

³ Mi wa ceng acelacel cam wa me buli ceng.

⁴ Sasiro wa ki dub wa, bala kame wada osasiro kede jo dedede kame timo ne wa kirac. Kur iwek wa opot i atama.’ ”

⁵ Yesu oko waco ne josiao mege be, “Ka koto itie kede ngawoti di iko yai ot bute i dier iwor, di iko waco ne be, ‘Diera, akwai ber imia mugati adek,

⁶ pien ngawota moro nan ongoole na, do ali kede giacama moro kame aromo mine.’

⁷ Di do dieri nono ko dwoko ni di etie i ode be, ‘Kur ilola! Ango atieko cego ekeko, doko ango karacel kede idwe na otieko buto. Ango likame bobo atwero yai pi mini gimoro!’

⁸ Amito waco ni be, akadi kono lono dagi yai pi mini gikame in imito be pi in ibedo adieru mere, do en eyaro yai di eko mini gikame in imito, pien udo icobuno en.

⁹ “En komio ango awaco ne wu be: kwaunu, kobino mino wu; mounu, ibinunu udo; kukungunu ekeko, kobino yabo ne wu.

¹⁰ Pien ngat kame kwao, komie; ngat kame mo, eudo; doko ngat kame kukungo ekeko, kobino yabo ne.

¹¹ Ngai kikom wu ka atin mere openye deknam en emio twol?

¹² Arabo ka atin mere okwae abe, en emio ekiliton?

¹³ Aso, ka do ber wun jo areco ingeunu mino idwe wu giamia abeco, do kalamo mano tien adi en kame Papa wu kame tie i malo bino mino kede Tipo Kacil but jo kame kwae?”

Yesu kede Belsebul

¹⁴ Yesu oudo tie riamo jwogi kame lebe oto; kakame jwogi nono oyai kede tenge, icuo kame oudo lebe oto nono oko do cako yamo, di ekodet oko uro twatwal.

¹⁵ Do jo mogo kikom gi oko waco be, “Kom eriamo jwogi kede twer kowok kibut Belsebul, ngadwong me jwogi.”

¹⁶ Do jo mogo kikom gi oudo mito tamo Yesu, omio kiko penye be emi gi gianena moro kame yai ki malo.

¹⁷ Do pien Yesu oudo ngeo tam gi, omio en eko waco ne gi be, “Ajakanut acelacel kame pokere, di kiko donyo dagere, likame karuno cungo; doko da, paco kame jo opokere kiye di kiko donyo dagere, paco nono tur.

¹⁸ Doko ka Sitani dagere kede Sitani, ajakanut mere twero cungo benyo? Pien wun iwacunu be Belsebul en kame mio ango twer me riamo jwogi.

¹⁹ Do nan ka Belsebul en kame mio ango twer me riamo jwogi, idwe wun do udo twer me riamo gi kibut ngai? Pi mano, idwe wun en kame bino do ngolo ne wu kop.

²⁰ Do ka twer ka Rubanga en kame mio ango ariamo jwogi, udo do Ajakanut ka Rubanga otieko tuno butu.

²¹ “Aso, ka dano atek, kame tie kede jame me yi kame romo odaro ode kiber, jame mege bedo i mulem.

²² Do ka ngat atek loe osure di oko bwone, en etero jame me yi kame oudo en egeno nogo dedede, di eko popoko jame kame eyako nogo.

²³ “Ngat kalikame tie keda, udo edaga; doko ngat kalikame coko keda, udo en esasaro.

Dwogo me Tipo Arac i kom Dano

²⁴ “Kame tipo arac otieko do yai ki kom dano, ebeo i adulion otuo di emo kakame eromo wei iye. Do ka likame eudo, en ewaco be, ‘Ango ayaro dok i oda kame awok kiye.’

²⁵ Kame en edwogo, ebino udo ode no di koweo yie, doko di koike kiber.

²⁶ Di do en eko ot di eko kelo tipere kanyaare icegun areco kalamo en, gin kiko donyo di kiko bedo kuno; di kuo me dano no ko bino doko rac kalamo kite kame oudo etie kede i agege.”

Yomcuny me Ateni

²⁷ Ingei tieko yamo mere, dako moro bin oko woto dwane ki dier ekodet di ewaco be, “Etie kede winyo dako konywali kede kodoti.”

²⁸ Do Yesu oko dwoko be, “Do kame kalamo mere, kitie kede winyo jo kame winyo kop ka Rubanga di kiko lubo!”

Kopenyo Yesu pi Timo Giaura

²⁹ Di oudo ekodet tie meede doko dwong, Yesu oko cako waco ne gi be, “Jo me i kare ni obedo jo kame timo tim areco; gin kimito gianena, do likame tie gianena moro kame koyaro mino gi, kwanyo kenekene gianena kotimere ne Yona.

³⁰ Pien bala kite kame riki Yona obedo kede gianena but jo me Ninebe, Wot ka dano da bino bedo kamanono ne jo me i kare ni.

³¹ I ceng me ngolo kop, abaka adako me tetu piny bino cungo kede jo me i kare ni di en eko pido gi, piento en bin eyai ki ajikini me lobo kakabor, pi bino winyo kop me rieko kibut Abaka Sulumani; do nenunu otienu kan kede ngat kame pire tek kalamo Sulumani.

³² I ceng me ngolo kop, jo me Ninebe bino cungo di kipido jo me i kare ni; pien gin bin kiko swilaro i kare kame kiwinyo kede kop kame Yona otatamo; aso di nan ngat kame pire dwong kalamo Yona tie kan.

Lero me Kom

³³ “Likame tie dano moro kame cwinyo etala di eko kano, arabo eko umo kede ebukit; do eketo kakame idelelei tetekeny jo kame donyo i ot twer neno lero.

³⁴ Wangi tie bala etala me komi. Ka wangi tie kiber, komi dedede do udo tie i lero; do ka wangi odubere, komi dedede udo do tie i colo.

³⁵ Pi mano, poore igwokerenu, wek lero kame tie i komu kur lokere dok colo.

³⁶ Ka komi dedede tie kede lero, di likame tie karamoro kiye kame tie i colo, en dedede ebino rieny bala kite kame etala kede asara mere rieny kede eko mini lero.”

Yesu Owaco Raco me Iparisayon kede Jopwony me Iswil

³⁷ I kare kame Yesu otieko kede yamo mere, Ngaparisayo moro oko lwonge cam; di do eda eko donyo i ot di eko bedo piny kacam.

³⁸ Do Ngaparisayo nono oko uro twatwal pi neno Yesu di ocako cam abongo lwoko cinge.

³⁹ Di Rwot oko waco ne be, “Wun Iparisayon ilwokunu ngei ikopo kede ngei bakuli, do di cunyu opong kede amao kede gikareco.

⁴⁰ Wun jomingo! Mam ngat kotimo ooko en kotimo kiton yie da?

⁴¹ Do miunu gikame tie i ikopon kede i bakulin bala giamia but jocan, di gi dedede ko doko cil di lubere kede kwer wu.

⁴² “Do itienu i can wun Iparisayon! Piento wun imiunu acel me tomon me otigo kede amalakwang, kede epone me deke angweda dedede, do di likame iparunu pi ateni kede amara ka Rubanga; magi en gikame oudo wun koto ipoorenu timo abongo weko apat.

⁴³ “Itienu i can wun Iparisayon; pien wun imarunu bedo i komini me wor i sinagogan, kede be di jo moto wu kede wor i atalen.

⁴⁴ Itienu i can! Pien icalunu bala atesin kalikame neeno, kame jo beo ki wi gi di likame kingeo.”

⁴⁵ Ngat acel kikom jopwony me Iswil oko dwoko ne be, “Apwony, kame iyamo kamano, udo inywaro wada.”

⁴⁶ Di Yesu oko dwoko be, “Itienu i can wuda jopwony me Iswil! Pien wun idiunu jo yeno yec apek kalikame kitwero yeno, do di likame tie ngatamoro kikom wu kame rieo akadi lwete acel me mulo yec nogo.

⁴⁷ Itienu i can pien wun igerunu atesin me inabin kame joakwari wu bin oneko.

⁴⁸ Pi mano, wun kikomu itienu ijurak, doko iyeunu kede tice kame bin joakwari wu otimo; pien gin bin kineko inabin, di nan wun ikounu gero atesin gi.

⁴⁹ Pi mano, rieko ka Rubanga da bin owaco be, ‘Abino cwano ne gi inabin kede joor, mogo kikom gi gin kibino tidilo di kiko neko da,’

⁵⁰ tetekeny remo me inabin dedede kame bin oony cako ki agege me cweno piny, wek mari i wi jo me i kare ni,

⁵¹ cako ki remo ka Abel, tuno kede i remo ka Sakaria, kame bin koneko i dierediere me alutari kede kabedo kacil me tempulo. Ebo, ateteni awaco ne wu be, kobino culo kwor nono i kom jo me i kare noni.

⁵² “Itienu i can wun jopwony me Iswil! Pien wun ikanunu isumilito kame yabo ekeko me ngec, do wuda kikomu likame ikounu donyo iye, doko ikounu gengo jo kame oudo tie donyo iye da.”

⁵³ Kakame Yesu oyai kede ki kuno di do etie ot, jopwony me Iswil kede Iparisayon oko cako dine kitek di kipepenyo en kope atot,

⁵⁴ di oudo kimomoo kope me doge pi mito make kede.