Luka 10 - Baibuli I Leb Kumam 2013

Yesu Ooro Jo Ot Kanyaare kiwie Are

¹ Ingei mano, Rwot oko yero jo ace ot kanyaare kiwie are di eko oro gi are are pi kato anyim i bomban kede i adulion acelacel kame en oudo eyaro ot iye.

² En eko waco ne gi be, “Kac tie dwong, do jotic nonok; pi mano legunu me wek Rwot won kac cwai jotic i kac mere.

³ Do wun otunu, ango atie oro wu bala romini i diere me ipeon.

⁴ Kur imakunu isau moro me sente, akadi ikapu moro, amotoko amuka; doko kur imotunu ngatamoro i yongayo.

⁵ Doko kame iyarunu donyo i ot moroni, cakunu kong waco be, ‘Mulem bed i ot ni.’

⁶ Ka dano kame maro mulem tie i ot nono, mulem wu bino dong i kome; aso ka li, mulem wu bino dwogo butu.

⁷ Doko bedunu i ot nono erume, di icamunu doko di imatunu gikame komio wu kiye; pien kopoore culo ngatic pi tic mere. Do kur idonyunu kokobo akokob ki ude.

⁸ Doko kame itiekunu donyo i bomba moroni di kiko gamo wu, camunu gikame koketo i nyimu;

⁹ cangunu jotuwo kame tie kuno, di ikounu waco ne jo kame tie kuno be, ‘Ajakanut ka Rubanga do otieko doko iyapiyapi kede wu.’

¹⁰ Do kame idonyunu i bomba moroni di likame oko gamo wu, otunu i yote mege di ikounu waco be,

¹¹ ‘Kiton apua me bomba wu da kame oudo omoko i tien wa, wan otengo gi pi bedo bala ijura kame pido wu; doko da poore ingeunu be, Ajakanut ka Rubanga do otieko doko iyapiyapi.’

¹² Awaco ne wu ateteni be, i ceng me ngolo kop, can me Sodoma bino bedo twaratwara kalamo can me bomba nono.

Bomban kame Odagi Yei

¹³ “Can nin bino bedo dwong benyo in Korasin! Doko can nida bino bedo dwong benyo in Betesaida! Pien ka koto tice me twer kame bin kotimo i diere wu oudo kotimo Taya kede Sidon, oudo koto jo me kuno bin otieko swilaro sek, di kingapo giangapa me iturur.

¹⁴ Do i ceng me ngolo kop Rubanga bino bedo kede kisa but jo me Taya kede Sidon kalamo butun.

¹⁵ Aso in Kaperanaum, mam in oudo iparo be kobino tingi malo? In kobino dwoki piny i kabedo me jo oto!”

¹⁶ Yesu oko waco ne joor mege be, “Ngat kame yei winyo kop wu, udo ewinyo kop nango, doko ngat kame dagi wu, udo edagi ango, kede ngat kame dagi ango, udo en edagi ngat kame oora.”

Dwogo me Jo Ot Kanyaare kiwie Are

¹⁷ Jo ot kanyaare kiwie are nogo oko dwogo kede kilel adwong di kiwaco be, “Rwot, kiton jwogi da oudo winyo wa pi nyingi.”

¹⁸ Yesu oko waco ne gi be, “Ango aneno Sitani di poto ki malo bala meny me kot.

¹⁹ Winyunu ber! Ango atieko mino wu twer me nyono twole kede ikilitona, kede me lono twer dedede me ngakwor, di likame gimoro ko twero mino wu awanon.

²⁰ Do akadi kamano da, kur ilelunu pi man, be pien tipere areco owinyo wu, do lelunu pien kotieko wandiko nying wu i malo.”

Yesu Olelo

²¹ Iesawa nono, Yesu oko lelo i Tipo Kacil di eko waco be, “Apwoyi, Papa, Rwot me malo kede lobo, pien in ikano gigi kibut jorieko kede joaniang, do iko nyuto gi ne idwe atino. Ebo, Papa, manono en epone kame in oudo imito be etimere kede.

²² “Papa na otieko mina gi dedede i cinga; likame tie ngatamoro kame ngeo Wod, kwanyo kenekene Papa; doko likame tie ngat kame ngeo Papa, kwanyo kenekene Wod, kede jo kame Wod yero pi nyuto ne gi Papa.”

²³ Yesu oko lokere but josiao mege, di eko waco ne gi i mung be, “Etie kede winyo ngat kame wange neno gikame wun inenunu.

²⁴ Pien awaco ne wu be, inabin atot kede abakai da oudo bin mito neno gikame wun inenunu, do likame kiko neno; doko oudo kimito winyo gikame wun iwinyunu, do likame kiko winyo.”

Agole me Ngasamaria Aber

²⁵ Ngapwony me Iswil oko yai malo pi tamo Yesu di ewaco be, “Apwony, nyo kame apoore timo pi udo kuo kame bedo nakanaka?”

²⁶ Yesu oko penye be, “Nyo kame kowandiko i Iswil? Esomere benyo?”

²⁷ En eko dwoko be, “Mar Rwot Rubanga ni kede cunyi dedede, kede kuo ni dedede, kede teko ni dedede, kede tam ni dedede; di iko maro ngakio ni bala kite kame imaro kede komi keni.”

²⁸ Yesu oko dwoko ne be, “Idwoko kiber; nan ida do tim kamanono di iko bino kuo.”

²⁹ Do ngapwony me Iswil nono, pi mito nyuto be en eber, en eko bobo penyo Yesu be, “Do ngakio na en ngai?”

³⁰ Yesu oko dwoko ne be, “Oudo bin tie icuo moro kame owok ki Yerusalem etie ot Jeriko, en eko riamo kede joyak. Jo nogo oko tako igoen ki kome di kiko bunge, di kiko ot kiweke di ewile.

³¹ Kikano Ngasaseredoti oko ngoole di elubo yongayo acel nono, do kakame eneno kede icuo nono, en eko dapo ki tenge.

³² Ngalebi da oko bino iepone acel nono, do kakame etuno kede kuno, en eko neno icuo nono, eda eko dapo ki tenge.

³³ Do Ngasamaria moro oko bino, di eda oudo etie i sapali mere; kakame etuno kede i nget icuo nono, en enene di eko bedo kede cuny me kisa i kome,

³⁴ en eko ot bute di eko donyo twetweo aporeso mege, di eonyo iye mo kede bwini. En eko do tingo icuo nono eketo i wi asigira mere, di eko tere i ot kame kodaro kiye wele, en eko donyo gwoke ki kuno.

³⁵ Oru mere en eko kwanyo denari mege are, di eko mino ngat kame daro ot me wele di ewaco ne be, ‘In gwok dano no kiber, do ka cul mere okalamo, ango abino dwogo ako culi sente korem.’ ”

³⁶ Yesu oko penye be, “Nan do in iparo be ngai kikom jo adek go en kame obedo ngakio me ngat kame joyak obungo nono?”

³⁷ Ngapwony me Iswil nono oko dwoko be, “Ngat konyuto cuny me kisa bute.” Yesu oko waco ne be, “Ida oti itim kamanono.”

Yesu Owelao Marita kede Maria

³⁸ Di oudo kitie ot, Yesu oko donyo i calo moro, di dako moro kame nyinge Marita oko game i ode.

³⁹ Marita oudo tie kede amin mere kame nyinge Maria, kame oudo tie bedo piny i tien Yesu di ewinyo pwony mere.

⁴⁰ En oudo tic me gwoko wele odie; omio eko ot but Yesu di eko waco ne be, “Rwot, mam in likame iparo be amina ni oweka timo tice kena? Wac ne ber ebin ekonya.”

⁴¹ Do Rwot oko dwoko ne be, “Marita, Marita, in kom itie kede par kede lole pi gi atot;

⁴² do gi acel kenekene en kame mitere; Maria otieko yero gikaber kalikame kobino kwanyo tenge kibute.”