Kosea 8 - Baibuli I Leb Kumam 2013

Rwot Ongolo ne Isirael Kop pi Woro Caljwogi

¹ Rwot waco be, “Cak kuto agwara! Jokwor tie mwomere bino i lobo na bala acut amwomere ringino piny! Pien jo na oturo isikan kame ango atimo kede gi di kiko dagi lubo iswilia na.

² Jo me Isirael waco na be, ‘In en Rubanga wa! Wan jo me Isirael ongei!’

³ Do kede acae gin kitieko dagi gikame ber. Jokwor bino wapo yor gi.

⁴ “Gin kiyero abakai i mit gin ken gi; kiyero jotel abongo ngec nango. Kikwanyo siliba kede saabu di kiko cweno gi kidoko caljwogi, di manono en oko kelo negi amuducar i kom gi ken gi.

⁵ Ango cunya dagi cal me roya kame jo me Samaria woro. Ango atie kede gero i kom gi. Awene en kame kibino twero bedo kede abongo raco?

⁶ Dano me Isirael en kotimo caljwogi nono; en likame ebedo Rubanga akadi acel. Kobino ngingido cal me roya kame jo me Samaria woro.

⁷ Kame kicuwo yamo abuko, gin kibino ngwedo apipiru; engano kame cungo i poto abongo wit gi mio kwon bedo li. Do akadi ka koto wit gi oko bedo tie, koto jokumbor en kocamo gi.

⁸ Isirael otieko doko cal bala atekerin apat, nan do ecal bala agulu akony mere li.

⁹ En ecal bala punda me obar arimo piny kene; en etieko ringo ot kwano kony kibut Asiria, etieko patano kede atekerin apat pi konye.

¹⁰ Do akadi bed bala gin kitieko patano kede atekerin apat, nan ango abino coko gi. Ingei kare acecek gin kibino mwodo lak gi pi lito kame abakai kede jopug bino mino gi.

¹¹ “Jo me Isirael ogero alutarin atot me kwanyo dub, do kiko lokere kidoko negi alutarin me timo dub.

¹² Akadi awandiko negi pwony atot benyo, do gin kitero gi be kibedo pwony apat me kumbor.

¹³ Gin kiyalo na leini abeco, di kiko camo ringo me giayala nogo. Do ango Rwot likame abino gamo giayala nogo. Nan ango abino yutuno dub gi di ako mino gi alola iye; abino dwoko gi Misiri.

¹⁴ “Jo me Isirael ogero ude me abakai, do wi gi owil kede Ngacwec gi. Jo me Yuda ogero bomban atie kede cel atek, do ango abino cwano mac i bomban gi nogo, di mac nono ko bino wango kateko gi.”