Kosea 7 - Baibuli I Leb Kumam 2013

¹ “I kare dedede ka ango amito be koto acango jo na me Isirael di ako mino gi bobo kibedo kiber, gikame ango aneno i but gi kenekene en gikareco kame gin kitimo. Gin kiserere ken gi ken gi; kituro ude di kiko kwalo jamini; kiyako jo i yote.

² Gin likame kiparo be ango abino yutuno gikareco nogi dedede; dub gin oluko gi, doko kitie i nyima nakanaka.”

Iik Arac me Mung i Paco ka Abaka

³ Rwot waco be, “Jo cuko yomo cuny abaka kede jotic mege kede iik gi areco.

⁴ Gin dedede kitie kede iik arac doko likame kiwor. Adagadaga gi rorano bala mac me keno, kalikame ngated mugati iiko, cako esawa me rubo mugati tuno esawa me tede.

⁵ I ceng kame abaka wa oudo tie tedo kede ebaga, gin kiko mino abaka kede jotic mege omer kede bwini di kiko doko miming.

⁶ Ebo, cuny gi oudo liel aliela bala mac kede kope areco kame gin oudo kiiko. Iwor kiakia lilo gi cal bala mac aliel midumidu di odiko eko calar kede liel.

⁷ “Gin dedede lilo gi liet bala mac me keno, en komio gin kineko jopug gi. Abakai gi kotieko neneko di lubere aluba, do likame tie ngatamoro kame kwao kony kibuta.”

Isirael kede Atekerin Apat

⁸ Rwot waco be, “Jo Isirael otieko nyalere kede atekerin apat. Gin kical bala mugati kame kotedo ngete tetucel kenekene.

⁹ Atekerin apat otieko teko gi do gin likame kingeo. Gin kical bala dano kame lwar osisimo i wie do en likame engeo.

¹⁰ Ewaka me jo Isirael mio ijura i kom gi. Akadi bed bala peko nogi dedede obeo negi, gin likame kiko dwogo buta, ango Rubanga gi.

¹¹ Jo Isirael cal bala awele amiming, doko wie likame tio; gin kong ber kigeo lwongo jo Misiri pi konyo gi, di bobo kiko ringo but jo Asiria!

¹² Ango abino ciko bwoi na di gin kitie ot, di ako mako gi bala winy. Ango abino mino gi alola pi gikareco dedede kame gin kitimo.

¹³ “Gin kibino neno can, pien gin kiweka. Kobino muducaro gi pien gin kijemo na. Ango koto oudo alako gi, do gin kiyamo kope me angalo i koma.

¹⁴ Gin likame kikwaa kede cuny me ateni, do akaka manono gin kiboroboro koko i wi itandana gi. Ka gin kilego pi engano kede bwini, kingongolo kom gi bala jo kame lego but rubangan me obukui; gin kijemo na.

¹⁵ Ango en kame oudo apwonyo gi di ako mino gi kidoko tek, do di gin kiiko tam arac i koma.

¹⁶ Gin kilokere but gi kalikame twero konyo gi. Gin kony gi li bala emal kodubere. Jotel gi bino to i yi, di jo me Misiri ko bino nyero gi, pien gin kitie kede yamo me ewaka.”