Kosea 6 - Baibuli I Leb Kumam 2013

Jo Cuko Swilaro

¹ Jo waco be, “Bia odokunu but Rwot. En etieko nyinyilo wa i adulion, do ebino cango wa; etieko mino wa awanon, do en ebino twetweo aporeso wa.

² Ingei ceng are arabo adek en ebino mino wa okwaraunu, di okounu bobo bino bedo i nyime.

³ Mito oketunu teko ngeno Rwot. En ateteni ebino bino but wa bala ru me piny kame miero timere; bino mere bino dwoko cuny wa bala kot me agege kame bino di eko bido piny.”

⁴ Do Rwot waco be, “Okwe wun jo Isirael kede Yuda, abino timo wu benyo? Amara wu buta yai awakawaka bala ekuna me odiko; ecal bala toyo kame bunyo rwenyo odiko sek.

⁵ Manono en komio ango ako ooro inabin na bala epima pi gin bino ngolongolo wu kede kop na, doko gikame ango amito kibutu ngere kakaler.

⁶ Ango amito amara wu kalikame lokere do weko leini me giayala. Ango amito jo na ngea akaka mino giayala buta.

⁷ “Do i kabedo kame kolwongo be Adam, gin kiko turo isikan kame ango oudo atimo kede gi.

⁸ Gilead en bomba kopong kede jo areco kede jonek.

⁹ Josaseredoti cal bala ekodet me joyak kame kio jo i yongayo. Akadi i yongayo kame oto kabedo kacil kame tie Sekem, gin kineko jo doko kitimo jamini ace areco adongodongo.

¹⁰ Ango atieko neno gikarac twatwal kame tie timere i Isirael: jo na otieko munaun kede woro caljwogi.

¹¹ “Wuda jo Yuda, ango atieko moko kare me mino wuda alola pi gikame itienu timo.