Kosea 5 - Baibuli I Leb Kumam 2013

¹ Rwot waco be, “Winyunu kop noni, Okwe wun josaseredoti! Cikunu yitu, Okwe wun jo Isirael! Winyunu, Okwe wun jo me ot ka abaka! Pien ngolo kop noni mako wun. Wun icalunu bala obek me ciko jo i Misipa, kede bwoi kame korieo i moru me Tabor.

² Wun icalunu bala bur atut kame kokunyo me ciko jo i Bomba me Akasia, do ango abino mino wun dedede alola.

³ Isirael, ango angei, in likame ipwono kibuta. In itimo malaya; in ipwokere.”

Kosea Okwenyaro Jo i kom Woro Caljwogi

⁴ Tim areco kame jo obedo timo gengo gi dok but Rubanga gi. Cuny me mito timo malaya tie negi, omio gin likame kingeo Rwot.

⁵ Ewaka me Isirael mio ijura i kom raco mere. Jo me Isirael gete pi raco gi; jo me Yuda da gete karacel kede gi.

⁶ Gin kibino tero romini kede doke me angola pi yalo but Rwot, do gin likame kibino ude, piento en etieko yai eweko gi.

⁷ Gin likame kibedo kede genere but Rwot; gin kiko nywalo idwe kede imalayan, idwe kalikame obedo me ka Rwot. Aso, i kare me Ebaga me Por Duwe, gin karacel kede cam gi kame tie i poti kobino muducaro gi.

Yi i dierediere me Yuda kede Isirael

⁸ Kutunu esos me tung le i Gibea pi lwongo jo i yi! Kutunu agwara i Rama! Gounu duru i Bet Aben! Copunu yi, wun jo ka Benjamin!

⁹ Epuraimu bino doko ameje ka ceng me mine alola otuno. Ango atuco but jo me ikekon me Isirael gikame ateteni bino timere.

¹⁰ Rwot waco be, “Jotel me Yuda otieko doko cal bala jo kame nyiko gikame poko ikor. Pi mano, ango abino bwoto lilo na i kom gi bala alele.

¹¹ Kotie tero jo Isirael kirac, alola kame komio gi otieko teko gi; pien gin oudo kiketo cuny gi lubo gi kalikame karuno konyo gi.

¹² Pi mano, ango abino dudubo Isirael bala egoe kame ajekel ocamo, di ako bino dudubo Yuda bala gi kotop.

¹³ “Kakame Isirael oneno kede kite kame etuwo kede, di Yuda da oko neno buge mege, di do Isirael oko ot Asiria pi kwano kony kibut abaka adwong, do abaka nono likame oko karuno cango gi akadi cango buge gi.

¹⁴ Ango abino suro jo Isirael kede Yuda bala engu. Ango kikoma abino nyinyilo gi di ako yai aoto tenge. Ango abino kwanyo gi di ako tero gi tenge. Likame tie dano moro kame bino twero lako gi.

¹⁵ “Ango abino dok bobo kabedo na, tuno di jo na oyei raco gi di gin kiko bino mona. I kare kame can bino poto negi kede, gin kibino mona kede cuny gi dedede.”