Kosea 4 - Baibuli I Leb Kumam 2013

Raco kame Rubanga Owaco ne Jo Isirael

¹ Winyunu kop ka Rwot, Okwe wun jo Isirael! Rwot tie waco ne wu raco be, “Genere likame tie i lobo noni, akadi amara, amoto ngec i koma, ango Rubanga.

² Gikame tie i lobo noni en lamo jo, angalo, nek, kuwo kede adote. Nek lubere aluba.

³ Manono en komio lobo wu otuo, doko gi dedede akuo kame tie iye bino to: jo, leini, winy, kiton aporogon.”

Rwot Owaco ne Josaseredoti Raco

⁴ Rwot waco be, “Kur dano moro ronkino ngat ocelu, pien wun josaseredoti en kame ango atie kede kop i komu.

⁵ Ibinunu gete i dier iceng, inabin da bino gete kede wu i dier iwor. Ango abino muducaro Isirael, toto wu.

⁶ Jo na tie to pien gin likame kingea. Manono obedo raco wun josaseredoti, pien wun itiekunu dagi ngena. Pi mano, ango da atieko dagi ne wu bedo josaseredoti na. Aso, bala kame wun wi wu otieko wil kede iswil na, ango Rubanga wu, ango da wia bino wil kede idwe wu.

⁷ “Wun josaseredoti ka wel wu omeede, dub wu da buta meede. Ango nataman abino loko gikame wun iwakerenu kede doko gikame kelo ne wu lewic.

⁸ Wun icamunu kede dub ka jo na, en komio wun imitunu negi meede ameda kede dub.

⁹ Ango abino mino wun alola arom aroma kede me jo. Ango abino mino wu alola di lubere kede yote me kuo wu, di ako mino wu alola pi rac kame wun itimunu.

¹⁰ Ibinunu cam do likame iyengunu. Ibinunu buto kede imalayan i abilan me rubangan, do likame ibinunu nywalo idwe, pien wun itiekunu weka di ikounu lokere woro rubangan apat.”

Rwot Oronkino tim me Woro Caljwogi

¹¹ Rwot waco be, “Bwini oti kede bwini anyen tie kwanyo tenge niang me jo na.

¹² Gin kioto penyo tam kibut ebao! Ebela en kame waco ne gin gikame kimito ngeno! Bala dako kame timo malaya, gin kiparao tenge woro rubangan apat, di kiko weka ango Rubanga gi.

¹³ Gin kingolo leini me giayala i wi mori, kede kioto i wi imukuran pi wango odok angwe kur i dud yen oak, kede i dud yen apat dedede koduko, pien kitie kede tipo aber. “Manono en komio anyira wu timo tic me malaya, kede mon me awobe wu timo adote.

¹⁴ Ango likame abino mino gin alola pi tim gin noni, pien wuda kikomu iotunu kede imalayan me tempulo, di ikounu mino giayala karacel kede gin i abilan me caljwogi. Bala kame agole noni waco kede be, ‘Jo kame li kede niang muducar.’

¹⁵ “Okwe Isirael, bed bala in iko timo tim me malaya kede rubangan apat, mito kur Yuda bed kede raco me tim acel nono. Kur iotunu wora Giligal arabo Bet Aben, doko kur ikwongerenu i nyinga ango Rwot kakuo i kabedere nogo.

¹⁶ Jo Isirael obedo joepali bala atakito. Benyo benyo kame ango nataman atwero pito wu kede bala idwe romini kame kotie kwano kakalac?

¹⁷ Caljwogi otieko pipao jo me Isirael, wekunu gi ken gi.

¹⁸ Ka gin kiko tieko amata, gin di do kiko donyo buto kede imalayan. Gin kimaro gikame kelo negi lewic lono gikame kelo negi wor.

¹⁹ Kobino tero gi tenge bala gikame yamo okuto, di lewic ko bino mako gi pi leini kame gin kiko ngolo me yalo caljwogi.”