Kosea 3 - Baibuli I Leb Kumam 2013

Kosea kede Dako kalikame Genere

¹ Rwot bobo oko waco na be, “Oti di iko mito dako kame tie kede apa mere do di dako nono ngadote, bala kame ango Rwot amaro kede jo Isirael, bed bala gin kilokere but rubangan apat di kimaro tero negi giayala me mugati abeco.”

² Aso, ango ako culo sente akaya me siliba tomon kiwie kany kede kilo tol acel kede ot kany (150) me mawele pi wile.

³ Ango ako waco ne be en miero edara pi kare kalac abongo en timo malaya arabo timo adote; di ada ako bino dare kamanono.

⁴ Iepone noni jo Isirael bino tieko kare kalac abongo bedo kede abaka arabo ngatel moro, kibino bedo abongo mino giayala i tempulo arabo bedo tie kede ipirin me kide kame koworo, amoto epod arabo terapim, gin jamini me ngeno mit ka Rubanga.

⁵ Do icen mere jo Isirael bino bobo lokere but Rwot Rubanga gi, kede but akwar Daudi abaka gi. I kare nono gin kibino bino but Rwot di kitie kede lworo kede mielkom, di en eko bino timo negi bero.