Kosea 13 - Baibuli I Leb Kumam 2013

Ngolo Kop me Ajikini i kom Isirael

¹ I kare kasek, ka jo me ekeko ka Epuraimu oudo oyamo, lworo oudo mako jo me ikekon apat; gin en kame oudo koworo gi i Isirael. Do gin kiko timo dub i yore me woro Baal; aso pi manono, gin kibino to.

² Nan gin pwodi kitie meede kede dub i yore me twako nyonyo di oko timo kede cal kame koworo, gin caljwogi kame jo otamo kede wi gi di jotet oko timo gi kede siliba. Di kiko waco be, “Miunu gi giayala!” Auro, kom jo do tie noto lem cal me roce!

³ Pi manono jo nogi bino rwenyo bala ekuna kame duny odiko, arabo bala toyo kame tiek di pwodi ceng tie nyango. Gin kibino bedo bala cucung kame yamo tero tenge ki diakal me canyo, arabo bala yiro kame duny ki wi jokoni.

⁴ Rwot waco be, “Ango en Rwot Rubanga wu, ngat kame bin owoto wu ki Misiri. Likame itienu doko kede Rubanga ace kwanyo ango kenekene. Ango kena en kame abedo ngalak wu.

⁵ Ango en kame oudo agwoko wu i wi tim, en lobo kotuo.

⁶ Kakame idonyunu kede i lobo aber ango ako pito wu di ikounu yeng, di ikounu doko joewaka di wi wu oko wil keda.

⁷ Pi manono, ango abino suro wu bala engu. Abino donyo kino wu i yongayo bala erisa.

⁸ Abino somo i komu bala edubu kokei idwe mege, di ako nyinyilo itaun wu. Abino camo wu ki kanono bala engu, di ako bino nyinyilo wu bala le moro ager me obar.

⁹ “Abino muducaro wu, wun jo me Isirael! Ngai kame bino konyo wu?

¹⁰ Wun oudo iwacunu be, ‘Mi wa abaka kede jopug.’ Nan abaka wu tie tuai me wek elak wu? Tuai kame jopug tie iye i bomban wu?

¹¹ Ango amio wu abaka di atie kede gero, di ako kwanye pi lilo koudo omaka.

¹² “Dub me jo me Isirael kowandiko di oko kano iwandik nono kiber.

¹³ Isirael cal bala atin kame kotie ramere me nywalo, do pi mingo mere, en eko dagi wok ki yi toto mere iesawa kopoore me nywale.

¹⁴ Benyo, kom ateteni ango abino lako jogi ki kabedo me jo oto arabo ki twer me to? Okwe to, kel negi aumpuli ni! Okwe kabedo me jo oto, kel negi amuducar! Ango likame doko abino bedo kede cuny me kisa i kom gi.

¹⁵ Akadi bed bala Isirael ud mulem kalamo atekerin acedo ango abino cwano yamo aliet me bad tetu kide ki wi tim, di eko bino mino ataneko mege tuo. Ebino tero jamini mege dedede me wel amalo.

¹⁶ Samaria bino udo alola pi en jemo nango. Kobino neko jo mege i yi; kobino nyonyoto idwe gi piny, di oko babaro kede pale yi mon koyac.”