Kosea 10 - Baibuli I Leb Kumam 2013

¹ Jo me Isirael oudo cal bala jang olok alibaliba anyako anyakini atot. Kakame anyakini omeede negi kede, gin kiko medo gero alutarin; kakame piny gi olony kede, gin kiko gero di cil ipirin kame kiworo bala rubangan.

² Jo kame ateni li i cuny gi miero nan bei i alola pi dub gi. Rwot bino tuturo alutarin gi, di eko dudubo ipirin me kide kame gin kiworo.

³ Gin kibino waco be, “Wan oli kede abaka pien likame wan obedo kede lworo but Rubanga. Do akadi da, nyo kame abaka koto otwero timo ne wa?”

⁴ Gin kiwaco kope kame li kede ateni; gin kitimo isikan kede ikwong me abe. Pi manono ngolo kop i ateni odoko do bala doi atie kede kwir akec kame donyo i bot kame kopuro.

⁵ Jo kame bedo i bomba me Samaria lworo bino mako gi di kiko tururo pi kei rubanga gi kobedo cal me twon kame kotimo kede saabu, kame tie Betaben. Josaseredoti ka caljwogi nono bino kok pire ka kokwanyo deyo mere.

⁶ Kobino tero gi nono Asiria bala giamia but abaka adwong. Kobino mino lewic mako Isirael pi tam kame ebedo lubo nono.

⁷ Kobino tero abaka me Samaria tenge bala apoke kame lemo i wi pii.

⁸ Abilan me wi imukuran kame tie Aben, kakame jo me Isirael woro kiye caljwogi, kobino dudubo. Okuto kede ocokocok bino dongo i wi alutari gi. Jo bino waco ne mori be, “Okwe kanunu wa,” kede ne imukuran be, “Okwe potunu iumunu wa!”

Rwot Ongolo ne Isirael Kop

⁹ Rwot waco be, “Wun jo me Isirael idagunu jiko dub cako i kare kame idubunu kede i Gibea. Pi manono yi bino poto i komu i Gibea.

¹⁰ Ango ayaro bino suro wun jo koparao nogi di ako mino wu alola. Atekerin bino kodere i komu di kiko mino wu alola pi dub wu koyitiriro.

¹¹ “Isirael oudo obedo atakit kame kopwonyo timo tic, en oudo emaro tic me wano ebao me nginyo engano. Do ango ako keto ne ayoko i ngute acil nono di ako twene pi cako timo tic atek. Amio Isirael boko poto di Yuda oko loko bot.

¹² Ango awaco ne be, ‘Cui kodi kobedo tim kopoore, di kac ni ko bino bedo amara kalikame lokere. Bok poto ni, pien kare me mona inononi, ango Rwot wu, di ango ako bino mino winyo na cwei ne wu bala kot.’

¹³ Do akaka manono wun ikounu cuno tim areco, di ikounu udo kac kame wok kiye. Icamunu anyakini me angalo wu. “Pi kite kame iketunu kede genu i kom teko wu kede i kom twon isirikalen wu,

¹⁴ pi manono yi bino poto ne wu di oko bino dudubo bomban wu dedede kame tie kede cel. Ebino bedo cal bala ceng kame bin Abaka Salaman odudubo kede bomba me Betabel i ceng me yi, di oko neneko mon kede idwe gi.

¹⁵ Manono en gikame kobino timo ne wuda jo me Betel pi tim wu areco adongodongo. Cucuto di yi ocakere, kobino neko abaka me Isirael.”