Kosea 1 - Baibuli I Leb Kumam 2013

¹ Manoni en kop kame bin Rwot omio Kosea wot ka Beeri i kare kame bin Usia, Yotam, Akas, kede Esekia en oudo obedo abakai me Yuda, di Yeroboam wot ka Yekoyasi en kame oudo tie abaka me Isirael.

Dako kede Idwe ka Kosea

² I kare kame bin Rwot ogeo yamo kede jo Isirael di ebeo kibut Kosea, en ewaco ne Kosea be, “Oti di iko nyomo dako kame obedo malaya di iko nywalo kede idwe kame tie kede ekite nono, pien lobo tie timo tim me malaya kitek i yore me weka di gin kiko lokere woro rubangan apat.”

³ Aso, Kosea oko ot di en eko nyomo Gomer nyar ka Dibalaim, di dako nono oko yac eko nywalo ne atin awobi.

⁴ Di Rwot oko waco ne Kosea be, “Cak nyinge Jeserel pien odong kare katitidi di ango ako bino mino alola but jo me ot ka Abaka Yeku me Isirael pi nek kame en bin etimo i aditot me Jeserel. Ango abino jiko ajakanut me ode.

⁵ Cenge nono ango abino jiko teko me yi me jo Isirael i aditot me Jeserel.”

⁶ Gomer bobo oko yac di eko nywalo atin nyako. Di Rwot oko waco ne Kosea be, “Cak nyinge Lorukama, pien ango likame bobo abino bedo kede kisa i kom jo Isirael arabo sasiro gi.

⁷ Do ango abino bedo kede cuny me kisa i kom jo Yuda. Ango Rwot Rubanga gi, abino lako gi do likame kede yi me emal arabo epima, amoto yi me isirikalen kame ringo kede asigiran.”

⁸ Kakame Gomer otieko kwanyo kede Lorukama ki dot, eko bobo yac di eko nywalo atin awobi.

⁹ Di Rwot oko waco ne Kosea be, “Cak nyinge Lo Ami, pien jo Isirael likame obedo jo na doko ango likame abedo Rubanga gi.”

Dwoko Bero me Isirael

¹⁰ Kare bino tuno kalikame kobino twero maro kede wel me jo Isirael, pien kibino bedo tot bala asinge me dog nam. Nataman kolwongo gi be, “Likame Jo Na”, do i kare me anyim kobino lwongo gi be, “Idwe ka Rubanga Akuo.”

¹¹ Jo me Yuda kede me Isirael bino ribere di gin kiko yero ngatel gi acel. Di gin kiko bino gamo lobo gi kidwoko; ceng me Jeserel bino bedo ceng adwong.