Joroma 6 - Baibuli I Leb Kumam 2013

To ki Dub kede Yaruno kede Kirisito

¹ Nan do owac benyo? Mam omeedenu kede dub tetekeny kisa ka Rubanga meede nyai ne wa?

² Likame kamano. Wan jo kame otiekunu to ki dub okarununu bobo meede bedo kede dub i kuo wa benyo benyo?

³ Mam ingeunu be wan dedede jo kame kotieko batiso wa i Kirisito Yesu, kobatiso wa da i to mere?

⁴ Pi mano, di bin kobatiso wa, koyiko wa karacel kede Kirisito i to, tetekeny bala kame Papa oyaruno en kede kikom jo oto pi twer me deyo mere, wek wada obedunu kede kuo anyen.

⁵ Pien ka wan oriberenu kede en i to kame cal bala mere, ateteni obinunu ribere kede en da i yaruno kame cal bala mere.

⁶ Wan ongeunu be, bin koguro kuo wa acon i kom musalaba karacel kede Kirisito, tetekeny kuo me dub jiki, di okounu jiko bedo ipasoi me dub.

⁷ Pien ngat kotieko to udo etieko gonyere ki dub.

⁸ Do ka wan otounu kede Kirisito, oyei da be obinunu bedo kuo karacel kede en.

⁹ Pien wan ongeunu be, bala kame kotieko yaruno kede Kirisito kikom jo oto, likame ebino bobo to; likame bobo to tie kede loc i kome.

¹⁰ I to mere, en eto ki dub tien acel atwal; do kuo kame nan en etie kede, ekuo pir Rubanga.

¹¹ Aso wuda miero iterunu be, itiekunu do to ki dub, nan do i kuounu pir Rubanga i Kirisito Yesu.

¹² Pi mano, kur dub bobo bed kede loc i komu kame to, pi mino wu lubo mit me komu.

¹³ Kur imiunu adul moro me komu i dub, pi bedo gi me timo raco, do jalerenu but Rubanga bala jo kame kokwanyo ki to di oko kelo gi i kuo, doko da miunu adulion dedede me komu but Rubanga pi bedo gi me timo gikame opoore.

¹⁴ Pien dub miero kur bed kede loc i wi wu, bala kame nan likame itienu kede i twer me Iswil, do itienu i twer me kisa ka Rubanga.

Ipasoi me Tim Kopoore

¹⁵ Nan do benyo? Mam odonyunu dub be pien likame otienu i twer me iswil, do pien otienu i twer me kisa ka Rubanga? Likame kamano.

¹⁶ Mam ingeunu be ka ijalerenu but ngatamoro bala ipasoi kame mie wor, idokunu da ipasoi me ngat kame imiunu wor nono, cengemogo ipasoi me dub, gikame tero wu i to, arabo ipasoi me bedo kede wor, gikame mio wu idokunu jo kopoore.

¹⁷ Do opwounu Rubanga, pien wun jo kame oudo bin itienu ipasoi me dub, itiekunu doko jo kame lubo kede cunyu dedede gi dedede kame tie i pwony kame bin komio wu.

¹⁸ Bala kame kotieko gonyo wu kede ki dub, nan itiekunu do doko ipasoi me ekite kopoore.

¹⁹ Ango atie yamo bala dano adana pi goro wu me ekite me anywali wu. Pien bala kame bin ijalunu kede komu lung i timo caro kede i tim kame iswil dagi, kame meede ameda, aso nan do jalunu komu lung pi bedo ipasoi me ekite kopoore, pi bedo jo kolonyere.

²⁰ I kare kame oudo itienu kede ipasoi me dub, oudo igonyerenu kikom kop kame mako poore.

²¹ Do bero nyo kame ikounu udo ki gikame nan lewic mako wu iye nogo? Adwokini me ginogo en to.

²² Do bala kame nan kotieko gonyo wu kede ki dub di ikounu doko ipasoi ka Rubanga, gikame ibinunu udo en bedo jo kolonyere, kede adwokini mere en kuo kame bedo nakanaka.

²³ Pien egelit me dub en to; do giamia ka Rubanga me nono en kuo kame bedo nakanaka i Kirisito Yesu Rwot wa.