Joroma 14 - Baibuli I Leb Kumam 2013

Kur Ingolunu Kop ne Jo Icegun

¹ Gamunu dano kame yei mere goro, do likame pi piem kede en i kom tam mere.

² Dano moro karuno bedo kede yei kame mie ecamo gi dedede, di dano kame yei mere goro camo dek apura kenekene.

³ Kur ngat kame camo cai ngat kame kwero. Doko kur ngat kame kwero da ngol kop ne ngat kame camo, pien Rubanga otieko game.

⁴ In ngai kame mio ingolo kop ne ngatic me dano ace? Ngadwong mere en kame poore ngolo ne kop be epoto amoto be etimo kiber. Kobino kiarao en, pien ngadwong mere karuno mine ecungo.

⁵ Dano moro romo tero ceng acel bala pire dwong kalamo apat, di dano ace ko tero ceng dedede be pirgi rom aroma. Wek dano acelacel yei i tam mere kene be, gikame en eparo tie gi me ateni.

⁶ Ngat kame paro pi ceng moro, eparo pire pi woro Rwot. Ngat kame camo da, eda ecamo pi woro Rwot, piento en epwoyo Rwot; ngat kame kwero cam da, ekwero pi woro Rwot, piento en epwoyo Rubanga.

⁷ Likame tie ngatamoro kame kuo pire kene, doko likame tie ngatamoro kame to pire kene.

⁸ Ka okuounu, udo okuounu pi Rwot, ka otounu da, udo otounu pire; pi mano, akadi ka okuounu amoto ka otounu, wan obedunu me ka Rwot.

⁹ Pien kop noni en komio Kirisito bin oto di eko kuo bobo, me wek ebed Rwot me jo oto kede me jo akuo.

¹⁰ Pinyo mio ingolo kop ne omini arabo amini? Arabo pinyo mio icao omini arabo amini? Pien wan dedede obinunu cungo i nyim kom ka Rubanga me ngolo kop.

¹¹ Pien kowandiko be, “Rwot owaco be, bala kame ango akuo kede, cong jo dedede bino riondiko i nyima, doko leb jo dedede bino pako Rubanga.”

¹² Pi mano, ngat acelacel kibut wa bino tatamo gikame etimo i nyim Rubanga.

Kur Imiunu Jo Icegun Poto i Dub

¹³ Pi mano, owekunu ngolo ne jo icegun kop, do akaka manono, oyeunu pi weko keto ne ngat ocelu gikame getaro en amoto kame dwoke cen ki yei mere.

¹⁴ Ango angeo doko aniang kiber i Rwot Yesu be, likame tie gimoro kame tie gi me kwer pire kene; do en etie gi me kwer ne ngat kame paro kamanono.

¹⁵ Ka gikame in icamo wango cuny omini arabo amini, udo likame in itie timo gikame nyuto amara. Wek gikame icamo kur dub ngat kame Kirisito oto pire.

¹⁶ Aso, kur imi yam bero ni bala gikarac.

¹⁷ Pien Ajakanut ka Rubanga likame obedo cam kede giamata, do en ebedo poore, kede mulem, kede yomcuny i Tipo Kacil.

¹⁸ Pi mano, ngat kame tio ne Kirisito, Rubanga game, doko jo da pwoye.

¹⁹ Wek do olubunu yor gikame kelo mulem kede kame mio wa ogero yei wa wan kenwa kenwa.

²⁰ Kur idudubunu tic ka Rubanga pi kop kame mako cam. Ateteni gi dedede olonyere me acama, do likame eber pi ngatamoro mino jo apat poto i dub pi gikame en ecamo.

²¹ Eber ne in weko camo ringo, arabo mato bwini, arabo timo gimoroni kenekene kame mio dano ace getar.

²² Wek yei kame itie kede bed i diere ni kede Rubanga nin. Kitie kede yomcuny jo kalikame ngolo kop i kom gi ken gi pi gikame gin kipwoyo be ber.

²³ Do ngat kame tie kede gungcuny i gikame ecamo, kongolo kop loe ka ecamo gi nono, pien udo likame etie timo kede yei; pien gi dedede kalikame wok ki yei obedo dub.