Joroma 13 - Baibuli I Leb Kumam 2013

Bedo kede Wor but Apugan

¹ Poore ngat acelacel wor apugan, pien likame tie akarunikin me apugan moro kalikame owok kibut Rubanga; akarunikin me apugan kame nataman tie go, Rubanga en koketo.

² Pi mano, ngat kame piemo kede akarunikin me apugan udo etie piem kede gikame Rubanga oyero. Jo kame piemo kede nogo kobino ngolo ne gi kop.

³ Pien jo kame timo gikame beco likame lworo jopug, do jo kame timo gikame reco en kame lworo gi. Mam imitunu be kur ibedunu kede lworo i kom ngat kame tie kede akarunikin me apugan? Aso timunu gikame ber di en eko bino pwono wu,

⁴ piento en etie ngatic ka Rubanga pi bero wu. Do ka itimunu gikame rac, bedunu kede lworo, pien likame en emako epima me nono; en ngatic kame kelo lilo ka Rubanga i kom jo kame timo gikarac.

⁵ Pi mano, ngat acelacel poore bedo kede wor, likame pi gengo lilo ka Rubanga kenekene, do da pi ngec me cunye.

⁶ Pi kop acel nono en omio i gelunu esolo, pien wegi apugan, jo kame timo tic noni obedo jotic ka Rubanga.

⁷ Culunu gin dedede gikame ipoorenu pi culo ne ngat acelacel; gelunu esolo but jo kame kopoore culo esolo but gi, culunu esolo me jame ne jo kame kopoore culo ne gi, worunu ngat kame poore awora.

Amara but Jo Icegun

⁸ Kur ibedunu kede banya ka ngatamoro, do kenekene marerenu kenu kenu, pien ngat kame maro dano ocelu udo ecobo iswil kakare.

⁹ Cik kame waco be, “Kur itimo adote; Kur ineko; Kur ikwalo; Kur ingobelo jame me jo”; kede cik ace apat dedede, oribere i kop kame waco be, “Mar dano wadu bala kite kame imarere kede keni.”

¹⁰ Amara likame timo ne dano wadu raco; pi mano, amara en kame cobo Iswil kakare.

¹¹ Medo i wi mano, wun ingeunu kare kame otienu iye, esawa oromo do me wun cei ki wang nino, pien alako otieko do doko iyapiyapi kede wa lono i kare kame bin ocako kede yei;

¹² iwor otieko kato sek, iceng otieko tuno. Wek do oucunu tenge tice me colo, di okounu ngapo jame me yi i lero.

¹³ Obedunu kede tim kame kelo wor bala otienu i dier iceng, likame bedo kede yomcuny arac kede amera, likame timo caro arabo mit me lewic, likame lok arabo timo nyeko.

¹⁴ Do ngapunu Rwot Yesu Kirisito bala egoe, di likame ikounu tamo pi kuo me kom kede pi cobo mit mege.