Joroma 12 - Baibuli I Leb Kumam 2013

Epone me Kuo i Tic ka Rubanga

¹ Pi mano, imiegu kede amiegu na, akwao wu pi cuny me kisa ka Rubanga be, miunu komu bala giayala kame kuo, gikacil kame yomo cuny Rubanga. Manoni en woro Rubanga i ateni.

² Kur ilubunu kuo me piny ni, do miunu kuo wu lokere pi tam anyen kame itienu kede, me wek ingeunu gikame Rubanga mito, gikaber, kame yomo cunye kede kopoore.

³ Pi kisa kame komia, ango awaco ne ngat acelacel kibutu pi weko paro pi dwongo mere i yore amalo kalamo kite kame mitere ne kede, do pi bedo kede tam aber, ngat acelacel di lubere kede rom me yei kame Rubanga omie.

⁴ Pien bala kame otienu kede adulion atot i kom wa acel, doko adulion nogo dedede likame timo tic acel,

⁵ wada otienu kamanono, bed bala ototunu, otienu kom acel i Kirisito, do di ngat acelacel bedo bala adul me kom ngat ocelu.

⁶ Bala kame otienu kede giamia apapat kame lubere kede kisa kame Rubanga omio wa, wek otiunu kede gi. Ka giamia wa obedo me imurai, otiunu kede di lubere kede rom me yei wa;

⁷ ka giamia wa obedo me tic ne jo, otiunu kede ne jo; ngapwony pwony jo;

⁸ ngat kame supo cuny jo sup cuny gi; ngat kame mio, emi kede cunye dedede; ngat kame telo jo, etel gi di eketo cunye iye; ngakisa, etim kisa kede yomcuny.

⁹ Miunu amara wu bed me ateni, dagunu gikame rac di ikounu moko i kom gikaber.

¹⁰ Marerenu kenu kenu, ikounu woro jo icegun kalamo.

¹¹ Ketunu cunyu nakanaka, tiunu ne Rwot kede cunyu dedede.

¹² Lelunu pi gen wu, diunu cunyu i can kame itienu iye, bedunu di ilegunu nakanaka.

¹³ Miunu jokacil gikame mitere ne gi, bedunu jo kame gamo jo.

¹⁴ Kwaunu winyo ne jo kame tidilo wu; kwaunu ne gi winyo do kur ilamunu gi.

¹⁵ Lelunu karacel kede jo kame lelo, kokunu karacel kede jo kame kok.

¹⁶ Bedunu i anapakin kede ngat acelacel, kur itingerenu do riberenu kede jo kame pirgi likame tek; kur iwakerenu be iriekunu kalamo kite kame itienu kede.

¹⁷ Kur iculunu raco moro kede raco, do tamunu pi gikaber i wang jo dedede.

¹⁸ I tetu butu ka twerere, bedunu i mulem kede jo dedede.

¹⁹ Jo na kame amaro, kur iculunu kwor, do wekunu kare ne lilo ka Rubanga; pien kowandiko be, “Tic me culo kwor en mera, abino culo kwor, Rwot en kowaco.”

²⁰ Do tim bala kame kowandiko be, “Ka kec oneko ngakwor ni, mie cam; ka orio oneke, mie pii emati; pien ka itimo kamanono ibino mino lewic make.”

²¹ Kur imiunu gikarac loi wu, do tiunu kede gikaber pi lono gikarac.