Joroma 10 - Baibuli I Leb Kumam 2013

¹ Imiegu kede amiegu na, gikame cunya mito kede kame akwao Rubanga iye pi jo me Isirael en ine be, wek kiud alako.

² Ango ajurao gin be, gin kiketo cuny gi tic ne Rubanga, do keto cuny gi nono likame ocungo i ngec.

³ Pien gin oudo likame kingeo epone kame Rubanga mio kede jo doko jo kopoore, omio gin kiko mono mergi ken gi, di likame kiko jalere i poore kame Rubanga mio.

⁴ Pien bino ka Kirisito omio Iswil ojik, tetekeny jo dedede kame yei en bed jo kopoore.

Alako Tie pi Jo Dedede

⁵ Musa owandiko be, dano kame doko ngat kopoore pien etimo gikame Iswil mito, bino kuo pi Iswil.

⁶ Do poore pi yei waco kaman be, “Kur iwac i cunyi be, ‘Ngai kame bino yito i malo?’ ” (mano en pi kelo Kirisito piny)

⁷ “arabo be, ‘Ngai kame bino donyo i kabedo me jo oto?’ ” (mano en pi oomo Kirisito ki kabedo me jo oto).

⁸ Do ewaco benyo? En ewaco be, “Kop ka Rubanga tie iyapiyapi kedi, etie i dogi kede i cunyi” (mano en kop me yei kame wan opwonyo);

⁹ pien ka ituco kede dogi be Yesu en Rwot, di iko yei i cunyi be Rubanga oyaruno en kikom jo oto, ibino udo alako.

¹⁰ Pien dano yei i cunye di eko doko ngat kopoore; kede etuco kede doge di eko udo alako.

¹¹ Iwandik kacil waco be, “Likame tie ngatamoro kame yei en, kame kobino mino lewic mako.”

¹² Pien apokapoka likame tie i dier Iyudayan kede Jogurik; Rwot acel nono en Rwot me jo dedede, doko en emio abar mere but jo dedede kame kwae.

¹³ Pien kowandiko be, “Jo dedede kame lwongo nying Rwot bino udo alako.”

¹⁴ Epone mene kame gin kikaruno lwongo kede nying ngat kalikame kiyei? Doko gin kikaruno yei ngat kalikame kiwinyo kop i kome benyo? Doko kitwero winyo kop i kome benyo abongo ngat kame tatamo ne gi?

¹⁵ Doko jo karuno tatamo kop mere benyo ka likame ooro gi? Bala kame kowandiko be, “Tien jo kame kelo kop aber tin cil benyo!”

¹⁶ Do likame gin dedede kiyei lubo kop me ejiri; pien Isaya owaco be, “Rwot, ngai koyei kop kame ewinyo kibut wa?”

¹⁷ Aso yei wok kame jo owinyo kop, kede kop kame jo winyo wok kame kopwonyo kop i kom Kirisito.

¹⁸ Do ango apenyere be, kara gin do likame kiwinyo? Ateteni gin kiwinyo, pien kowandiko be, “Dwan gin otieko romo wi lobo lung, kede kope kame kiwaco otieko tuno i ajikini me piny.”

¹⁹ Bobo ango apenyere be, bin jo me Isirael likame oniang? Me agege Musa bin owaco be, “Abino mino nyeko mako wu kede ateker kame kony mere li; abino mino ibedunu ger kede ateker aming.”

²⁰ Isaya bin obedo kede tekcuny di eko waco be, “Jo kalikame oudo moa otieko wuda; ango atieko nyutere ne jo kalikame oudo penyo pira.”

²¹ Do en eko waco kop i kom Isirael be, “Arieo cinga piny yuluyul but jo kalikame winyo kop na, kede kame piemo keda.”