Jongolkop 9 - Baibuli I Leb Kumam 2013

Abimelek

¹ I kare nono Abimelek wot ka Egidioni bin oko ot i bomba me Sekem kakame joawade ka toto mere dedede oudo bedo iye, di en eko waco negi be

² kioti kiko penyo jo me Sekem dedede be, “Mene en kame ber ne wun? Wun bedo i apugan me awobe ka Egidioni ot kanyaare dedede arabo bedo i apugan me ngat acel? Do poore iyutununu be Abimelek kara obedo remo wu.”

³ Aso, joawade ka toto mere bin oko waco kope nogi dedede but jo me Sekem akaka en, di cuny jo Sekem oko yei lubo Abimelek piento en oudo ebedo wad kede gin.

⁴ Gin bin kiko kwanyo sekel ot kanyaare me siliba ki tempulo ka Baal kame bin gin kisikano kede di kiko mine. Abimelek bin oko pango jo kame kony gi li doko di kitie atatai, di gin kiko donyo lube.

⁵ Abimelek bin oko ot Opura i ot ka papa mere, di eko neko imiegu mege awobe ka Egidioni; eneko gin cuo ot kanyaare i wi kidi acel. Do Yotam, awobi ka Egidioni atidi mere, bin oko bwot pien bin en oudo epwono.

⁶ Di do jo dedede me Sekem kede me Bet Milo bin oko cokere karacel, di gin kiko ot i yat oak adwong kame bin oketo iye kidi me awora, di gin kiko mino Abimelek odoko abaka.

⁷ Kakame bin oko waco ne kede Yotam kop noni, en eko ot di eko cungo i wi moru me Gerisim, di eko lelemo di ewaco negi be, “Winyunu kop na, wun jo me Sekem, tetekeny Rubanga winy wu!

⁸ I ceng moro acel yen bin oko ot i cokere me yero abaka kame bino pugo gi. Gin bin kiko waco ne yat olibeti be, ‘In bed abaka wa.’

⁹ Yat olibeti bin oko gamo dog gi be, ‘Benyo, wun iparunu be ango abino weko timo mo na kame kotio kede me mino wor but rubangan kede jo, di ango ako donyo pugo wun?’

¹⁰ Di do yen oko waco ne yat epigi be, ‘In bia ibed abaka wa.’

¹¹ Do yat epigi oko gamo dog gi be, ‘Benyo, iparunu be ango abino weko timo anyakini na awinyiwinyi, di ango ako donyo pugo wun?’

¹² Aso, yen bin do oko waco ne olok be, ‘In bia ipug wan.’

¹³ Do olok bin oko waco negi be, ‘Benyo, iparunu be ango abino weko timo bwini na kame mio rubangan kede jo bedo kede yomcuny, di ango ako donyo pugo wun?’

¹⁴ Aso, yen dedede bin do oko waco ne etirir be, ‘In bia ipug wan.’

¹⁵ Etirir bin oko waco ne yen be, ‘Ka ateteni wun imitunu wira pi bedo abaka wu, bia igwokunu i tipo na kan; do ka li, mac bino liel ki okuti na di eko muducaro yen seda me Lebanon.’ ”

¹⁶ Yotam bin oko meede be, “Pi mano, ango apenyo ka ateteni wun ikounu timo gi me ateni, doko kame poore, kakame imiunu kede Abimelek obedo abaka. Benyo, iparunu be bin wun itimunu ne Egidioni kede jo me ode gikame ber, bala kame poore kede gikame bin en eko timo?

¹⁷ Yutununu be papa na bin oyi piru, doko bin ejalo kuo mere, di eko lako wu ki cing jo Midian.

¹⁸ Do ceng atin wun ikounu lokere dagi jo me ot ka papa na. Wun ikounu neko awobe mege, ot kanyaare i wi kidi acel, be pi Abimelek obedo wadu, en wode kame enywalo kede dako apasoit, wun ikounu mine edoko abaka me Sekem.

¹⁹ Aso, ka gikame wun tin itimunu ne Egidioni kede jo me ode oudo obedo gi me ateni kede kame poore, wun lelunu pi Abimelek, doko poore eda elel piru.

²⁰ Do ka li, mito mac woki kibut Abimelek di eko muducaro jo me Sekem kede me Bet Milo; doko mito mac wok kibut jo Sekem kede jo me Bet Milo di eko muducaro Abimelek.”

²¹ Di do Yotam bin oko ringo eoto bedo Beer, pien oudo elworo omin mere Abimelek.

²² Abimelek bin oko pugo jo me Isirael pi mwakini adek.

²³ Di do Rubanga bin oko cwano tipo arac i dierediere me Abimelek kede jo me Sekem, di gin kiko donyo timo ne gikame dupuro en.

²⁴ Manoni bin otimere tetekeny nyang tim me gero kame bin kotimo ne awobe ka Egidioni ot kanyaare, di remo gi ko bino bedo i wi omin gi Abimelek ngat koneko gi, kede jo me Sekem komie teko me neko imiegu mege.

²⁵ Aso, pien gin bin kidage, jo me Sekem bin oko keto jo mogo opwono i wi moru pi dare i yongayo. Jo nogo bin oko bedo yako jo dedede kame bin beo i yongayo nono; di bin oko waco ne Abimelek kop nono.

²⁶ Kakame Gaal wot ka Ebed bin oko dak kede joawade mege Sekem, jo me Sekem bin oko keto gen gi i kome.

²⁷ Gin bin kiko ot i poti me olok gi di kiko ngwedo olok, kiko biino bwini, di kiko tedo ebaga. Gin bin kioto i tempulo me rubanga gi, di kiko cam kede amata, di kiko donyo yamo kede acae i kom Abimelek.

²⁸ Gaal wot ka Ebed oko waco be, “Kara Abimelek en ngai? Wanunu jo me Sekem ocalunu nadi, en kame mio wan otimunu tic ne en? Benyo, mam en wot ka Egidioni? Doko mam Sebul obedo ngatic mere? Timunu tic ne jo ka Kamor, en papa me jo me Sekem! Pinyo kamio poore wan otimunu ne en tic?

²⁹ Ka koto ango en kame oudo atie telo jogi, koto akwanyo Abimelek tenge! Koto awaco ne be, ‘Med isirikalen ni, di iko bino yi keda.’ ”

³⁰ Sebul, ngat kame bin pugo bomba, bin cunye oko wang kakame en ewinyo kede kop kame Gaal owaco.

³¹ En bin eko cwano jo but Abimelek pi waco ne be, “Neningo, Gaal wot ka Ebed kede joawade mege otieko bino Sekem, doko kitie rubo wi jo me bomba pi dagi.

³² Pi mano, poore in kede isirikalen kame tie kedi iyaunu iwor, di ikounu ot buto i ebar daro gin.

³³ Odiko sek kakame ceng wok kede, di wun ikounu ngeso suro bomba. Ka Gaal kede isirikalen kame tie kede oko bino pi yi kede wu, wun timunu ne gin gikame wun itwerunu.”

³⁴ Aso, Abimelek kede isirikalen dedede kame bin tie kede en oko yai iwor, di gin kiko pokere i ikodeta ongwon kiko ot buto daro jo me Sekem.

³⁵ Kakame Abimelek kede isirikalen mege bin oko neno kede Gaal di tie cungo i dog erute me bomba, gin bin kiko yai ki kakame oudo kitie pwono iye.

³⁶ Gaal bin oneno gi di eko waco ne Sebul be, “Neningo, jo mogo ika tie wok ki wi moru!” Di Sebul oko gamo doge be, “In itie neno tipo me wi moru be jo.”

³⁷ Gaal bobo oko waco be, “Neningo, jo tie wok ki awita me moru; ekodet acel tie bino di kilubo yongayo kame yai ki yat oak me imuroko!”

³⁸ Di do Sebul oko waco ne be, “Nan do yamo ni me ewaka nono ojik tuai? In en kame oudo iyamo di ipenyere be, ‘Kara Abimelek en ngai kame mio wan poore timo nen tic?’ Mam isirikalen kame in oudo iyamo i kom gi anywar anywar igonogo? Aso, ot nan do yi kede gi.”

³⁹ Gaal bin oko telo jo me Sekem ot yi kede Abimelek.

⁴⁰ Gaal bin oko ringo, di Abimelek oko riamere kede. Bin oko wawano jo atot kiton tuno i erute me bomba.

⁴¹ Abimelek bin odong bedo Aruma; di Sebul oko riamo Gaal kede joawade mege tenge ki Sekem, omio likame bin kiko karuno bedo kunono.

⁴² I ceng kame lubo mere jo me Sekem bin oko iikere pi ot i ebar. Kakame oko waco ne kede Abimelek,

⁴³ en eko tero isirikalen mege di eko popoko gi i ikodeta adek, di gin kiko pwono i ebar daro jo me Sekem. Kakame en eko neno kede gin di kitie wok ki bomba, en eko yai ki kapwono pi ot neko gi.

⁴⁴ Abimelek kede ekodet me isirikalen kame bin tie kede oko onyaro di kiko cungo i erute me bomba, di ikodeta are icegun oko onyaro i kom jo dedede kame bin tie i ebar di kiko neko gin dedede.

⁴⁵ Abimelek kede isirikalen mege bin oko yi kede jo me bomba piny yuluyul. Gin bin kiko mano bomba di kiko neko jo kame oudo tie iye dedede, di kiko rereto bomba piny, kiko onyo munyo iye.

⁴⁶ Kakame bin jo kame bedo i gedo abor malo me Sekem owinyo kede kop noni, gin kiko donyo kakame kocelo di tek me tempulo ka Baal me isikan.

⁴⁷ Di bin oko waco ne Abimelek be gin oudo kicokere kunono.

⁴⁸ Abimelek bin oko yai kede isirikalen kame bin tie kede en, di eko ot paka tuno i moru me Salamon. En bin eko kwanyo le di eko tongo ajange me yat eko riongo i epepet mere. Di do en eko waco ne isirikalen mege da pi timo kamanono awakawaka.

⁴⁹ Aso, isirikalen dedede oko totongo jange me yen di gin kiko lubo Abimelek, kiko tero jange nogo kicoko i kom kakame kocelo di etek nono. Gin bin kiko wango kabedo nono kede jo dedede kame bin tie iye. Jo dedede kame bin tie kanono oko to; cuo kede mon kame romo tutumia acel.

⁵⁰ Di do Abimelek bin oko yai eko ot i bomba me Tebes, di eko luke, eko mane.

⁵¹ Do gedo atek abor malo riki tie i bomba nono, di cuo kede mon dedede oko ringo iye. Gin bin kiko cegere iye di kiko yito i wi ot.

⁵² Kakame Abimelek bin oko bino kede pi suro gedo abor malo nono, en bin eko ot i ekeko me gedo abor malo nono pi cwinye kede mac.

⁵³ Do dako moro oko uco nyar kidi me riego ki wi ot kunono, di eko dipo wi Abimelek paka belo cogo me wie.

⁵⁴ Abimelek oyotoyot bin oko lwongo eponga kame oudo mako jamini mege me yi di eko mine cik be, “Wot epima ni di iko coba ineka, tetekeny kur jo yam i koma be, ‘Kom dako adaka en koneke.’ ” Aso, eponga nono bin oko cobe pelepel, di eko to.

⁵⁵ Kakame jo me Isirael bin oneno kede be Abimelek oto, gin kiko dok paco.

⁵⁶ Epone nono en kame bin Rubanga oko culo kede rac kame Abimelek otimo ne papa mere i yore me neko imiegu mege ot kanyaare.

⁵⁷ Rubanga bin oko da mino rac me jo me Sekem odok i wi gi, bala kame Yotam wot ka Egidioni oudo owaco di elamo gi.