Jongolkop 6 - Baibuli I Leb Kumam 2013

Egidioni

¹ Jo me Isirael bin bobo oko timo gikarac i nyim Rwot, di Rwot oko mino gi i cing jo Midian pi mwakini kanyaare.

² Cing jo Midian bin oko bwono jo me Isirael; manono oko bin mino gin kiko iiko kapwono gi kakobarere me mori, i abo kede kabedo mogo atek me gwokere.

³ I kare dedede kame bin jo me Isirael cuwo kede kodere gi, jo Midian bin bino kede jo Amelek kede jo me tetu kide di kiko suro gi.

⁴ Gin bin kibino di kiko gero kimere gi i adul me jo me Isirael di kiko muducaro cam kame jo me Isirael opuro ape pako tuno i adul kame kio kede Gasa. Gin bin likame kiweko gimoro kame jo me Isirael romo camo, akadi romini, doke arabo pundan.

⁵ Pien gin bin kibino kede doke gi kede iemai gi di kiumo piny bala obonyo. Gin akadi aguraguran gi da likame wel gi marere. Gin bin kibino di kiko dudubo lobo.

⁶ Jo me Isirael bin oko doko jocan twatwal pi jo me Midian. Gin bin kiko kok but Rwot pi konyo gi.

⁷ Kakame bin jo me Isirael okok kede but Rwot pi konyo gi ki cing jo Midian,

⁸ Rwot oko cwano negi enabi. Enabi nono bin oko waco negi be, “Rwot Rubanga me jo me Isirael waco be, ‘Ango bin akwanyo wu ki Misiri, ki ipasun,

⁹ di ako lako wu ki cing jo Misiri, kede ki cing jo dedede kame bin tero wu kirac, di ako riamo gin tenge ki nyim wu, di ako mino wun lobo gin.

¹⁰ Ango bin awaco ne wun be ango en Rwot Rubanga wun, likame ibinunu woro rubangan me jo Amor, jo kame itienu bedo i lobo gi. Do wun likame ikounu winyo kop na.’ ”

¹¹ Di do malaika ka Rwot oko ot di eko bedo i dud yat oak kame bin tie i calo me Opura. Calo nono bin obedo me ka Yowasi, dano me ot ka Abieser. Egidioni wode oudo tie canyo engano kakame bin kobio iye bwini tetekeny kur jo Midian nene.

¹² Malaika ka Rwot bin oko neeno but Egidioni kunono di oko waco ne be, “Rwot tie kedi, in dano atek i yi!”

¹³ Egidioni bin oko waco ne be, “Do adwong, ka Rwot tie kede wan, pinyo komio gigi dedede tie timere ne wan? Doko jamini adongodongo kame joakwari wan obedo tatamo ne wa be en bin etimo, nan do tie tuai? Gin kibedo tatamo ne wa be Rwot en kame bin okwanyo wa ki Misiri. Do nan do Rwot otieko uco wa tenge, doko etieko jalo wa i cing jo Midian.”

¹⁴ Di do Rwot bin oko waco ne be, “Ot kede teko nin adwong no di iko lako jo me Isirael ki cing jo Midian. Ango kikoma atie cwani.”

¹⁵ Egidioni bin oko gamo be, “Do Rwot, epone mene kame ango akaruno lako kede jo me Isirael? Ot kame ango ayai kiye en kame jo mege goro kalamo ki ekeko ka Manase, doko ango en kame pira likame tek kalamo jo dedede me ot wa.”

¹⁶ Rwot oko bin waco ne be, “Ango abino bedo tie kedi, di in iko bino neko jo Midian kede yoto di ineno bala gin oudo kibedo dano acel kenekene.”

¹⁷ Di Egidioni oko dwoko ne be, “Ka cunyi yom keda, in mia gianena moro kame nyuto be in Rwot en kame itie yamo keda.

¹⁸ Tim ber kur iyai ki kane tuno ango dwogo buti kede giamia na, di ako keto i nyimi.” Rwot oko gamo be, “Ango abino dong bedo kanoni tuno in dwogo.”

¹⁹ Aso, Egidioni bin oko ot i ode di eko ngolo diel abwong eko tedo, di eko tedo da mugati kame arup li iye, kame kotimo kede engano kame romo kilo tomon. En bin eko keto ringo i adita, di eko keto cwe i tabo, eko kelo gi but malaika ka Rwot i dud yat oak, di eko mine.

²⁰ Malaika ka Rubanga oko waco ne be, “Kwany ringo kede mugati di iko keto gi i wi lela noni, di iko onyo cwe i kom gi.” Egidioni bin oko timo kamanono.

²¹ Malaika ka Rwot oko cwano ebela mere kame oudo etie mako, di ebela nono oko mulo ringo kede mugati nono. Mac bin oko yai ki lela nono di eko wango ringo kede mugati nono. Di do malaika ka Rwot oko rwenyo ki nyime.

²² Egidioni bin oko do niang be manono oudo obedo malaika ka Rwot. Di en eko waco kede lworo atek be, “Okwe Rwot Rubanga, konya! Kom ango aneno malaika nin wang i wang!”

²³ Do Rwot bin oko waco ne be, “Mulem bed buti. Kur ibed kede lworo. In likame ibino to.”

²⁴ Di do Egidioni bin oko gero alutari kunono me yutuno Rwot, di eko cako nyinge be, “Rwot en mulem.” Tuno tin alutari nono pwodi tie cungo Opura kunono, i calo me jo me ot ka Abieser.

²⁵ Iwor nono Rwot bin oko waco ne Egidioni be, “Kwany twon ka papa ni kede twon ace me mwaka kanyaare, di iko reto alutari kame papa ni yalo Baal kiye, kede iko tongo piny epir kame obedo gianena me rubanga Asera, kame tie i ngete.

²⁶ Di in iko gero alutari ne Rwot Rubanga ni kiber, i wi kateko ka Baal kanono. Di iko kwanyo twon me are iko wange lung bala giayala, di itio kede epir kobedo gianena ka Asera kame in itieko tongo piny nono me moko mac.”

²⁷ Aso, Egidioni bin oko kwanyo jotic mege tomon, di eko timo bala kame Rwot oudo owaco ne. Do piento en bin eko bedo kede lworo atek but jo me ot ka papa mere kede jo me bomba, manono oko mino en etime iwor.

²⁸ Kakame jo me bomba bin oko wok kede odiko, gin kiko udo be oudo kotieko tuturo alutari ka Baal, doko da epir kobedo gianena me rubanga Asera, kame bin tie i ngete kanono, oudo kotieko tongo piny, kede be twon me are da oudo kotieko mino bala giayala i wi alutari kame oudo kogero kanono.

²⁹ Gin bin kiko donyo penyere ken gi ken gi be, “Ngai en kotimo gini?” Gin kiko donyo mono di kipepenyo, di kiko udo be Egidioni wot ka Yowasi en kame bin otimo gi nono.

³⁰ Di do jo me bomba oko waco ne Yowasi be, “Kel wodi ooko kan, wan oneke, piento en etieko reto piny alutari ka Baal, doko eko tongo piny epir kobedo gianena me rubanga Asera kame oudo tie i ngete.”

³¹ Do Yowasi bin oko waco ne jo dedede kame bin dadangun ne be, “Benyo, wun en icungunu ne Baal? Arabo, wun en kame iyiunu pire? Dano moroni kame cungo pi Baal, tuno odiko udo kotieko neke. Ka Baal obedo rubanga, wekunu en eyi pire, piento alutari mere en kame koreto.”

³² Cako cenge nono oko do donyo lwongo Egidioni be Yerubaal, pien Yowasi oudo owaco be, “Wekunu Baal yi pire kene; alutari mere en kame koreto piny.”

³³ Di do jo Midian dedede, jo Amelek, karacel kede jo me bad tetu kide oko cokere kiko ngolo ecilet me Yorodan, di gin kiko gero kimere gi i aditot me Jeserel.

³⁴ Tipo ka Rwot bin oko bino i kom Egidioni, di en eko kuto agwara pi lwongo jo me ot Abieser pi lube.

³⁵ En doko eko oro jo ooto i adulion are dedede me ekeko ka Manase pi lwongo gin bino lube. Eko da cwano jo but jo me ekeko ka Aser, Sebulun, kede Naputali. Gida bin kiko ot donyo bute.

³⁶ Egidioni bin oko waco ne Rubanga be, “Pi mino ango ngeno be in ibino tic keda pi lako jo me Isirael, bala kame in itieko waco,

³⁷ ango ayaro keto yer mogo me oromo i diakal me canyo, ka toyo oko bedo tie i kom yer nogo kenekene, do di lobo lung otuo, manono bino mino ango angeo be in ibino tic keda pi lako jo me Isirael, bala kame in itieko waco.”

³⁸ Di eko bin timere kamanono. Kakame en bin eyai kede oru mere odiko sek di eko biino yer nogo, pii me toyo bin oko mol kikom gi kame romo pongo bakuli.

³⁹ Egidioni bobo oko waco ne Rubanga be, “Kur cunyi wangi i koma, wek bobo ayam kong tien acel. Ango akwai iyei na bobo kong atam timo kamanono kede yer me oromo nono tien acel. Nataman do wek yer me oromo dong di etuo, do toyo bed tie i lobo.”

⁴⁰ Iwor nono Rubanga oko timo kamanono. Oru mere odiko en eko udo yer odong di etuo do toyo oudo odiako lobo.