Jongolkop 4 - Baibuli I Leb Kumam 2013

Debora kede Barak

¹ Ingei to Ekud, jo me Isirael bobo oko timo gikarac i nyim Rwot.

² Rwot bin oko mino gi i cing Abaka Jabin me Kanan, ngat kame bin pugo bomba me Kasor. Ngatel me isirikalen mege bin en Sisera, kame bin bedo Karoset Goim.

³ Jabin oudo tie kede cabalan tol kanyangon (900) kame kotimo kede nyonyo, di en bin eko pugo jo me Isirael kede gero atek pi mwakini ot are. Di do jo me Isirael bin oko kok but Rwot pi konyo gi.

⁴ I kare nono Debora, anabi, dako ka Lapidot, en kame oudo obedo ngangolkop me jo me Isirael.

⁵ En bin enare bedo i dud tugo ka Debora, kame bin tie dierediere me Rama kede Betel i piny kobedo mori mori me Epuraimu, di jo me Isirael oudo oto bute pi en ngolo kope gin.

⁶ Ceng moro acel en bin eko cwano jo ooto lwongo Barak wot ka Abinoam ki bomba me Kedes kame bin tie i lobo me Naputali, di en eko waco ne be, “Rwot, Rubanga me jo me Isirael ciki be, ‘Kwany cuo tutumia tomon (10,000) ki ikekon ka Naputali kede Sebulun di iko telo gi ot i moru me Tabor.

⁷ Ango abino mino Sisera, ngatel me isirikalen ka Jabin riamo kede wu i nget ecilet me Kison. En eyaro bino kede cabalan kede isirikalen mege, do ango abino mine i cingi.’ ”

⁸ Barak oko waco ne Debora be, “Ka in iyaro upere keda, ango abino ot; do ka li, ango likame abino ot.”

⁹ Debora oko gamo be, “Ango bo ateteni abino upere kedi; bed bala kamanono da, likame in ibino udo wor pi lono yi nono, pien Rwot bino mino Sisera i cing dako.” Aso, Debora oko yai di eko upere kede Barak ot Kedes.

¹⁰ Barak bin oko lwongo jo me ikekon ka Sebulun kede Naputali ooto Kades, di jo yi tutumia tomon (10,000) oko lube. Debora da oko upere kede.

¹¹ I kare nono Keber dano me Ken bin osipo kima mere iyapiyapi kede Kedes, i nget yat oak me Sananim. En bin epokere ki kom jo Ken icegun, ikwae ka Kobab, omin me dako ka Musa, di eko ot kunono.

¹² Kakame bin oko waco ne kede Sisera be Barak wot ka Abinoam oudo otieko ot i moru me Tabor,

¹³ en bin eko lwongo isirikalen mege dedede karacel, kede cabalan tol kanyangon dedede, di eko cwano gi kiyai ot cako ki Karoset Goim tuno i ecilet me Kison.

¹⁴ Di do Debora oko waco ne Barak be, “Yai do ioti! Ceng atin Rwot otieko mino Sisera i cingi. Ateteni Rwot tie telo ni yongayo.” Aso, Barak oko yai ki moru me Tabor kede jo yi tutumia tomon (10,000).

¹⁵ Kakame Barak oko suro kede Sisera, Rwot bin oko mino mielkom atek omako Sisera kede cabalan mege dedede kede jo yi mege dedede. Sisera bin oko wok piny ki wi cabala mere di eko ringo tenge kede tiene.

¹⁶ Barak bin oko diebo kede cabalan kede isirikalen ka Sisera tuno Karoset Goim, di eko neko gin dedede. Likame bin tie dano moro akadi acel kame bin oko dong.

¹⁷ Sisera bin oko ringo kede tiene paka i eema ka Yayeri, dako ka Keber dano me Ken, pien anapakin oudo tie i dierediere me Abaka Jabin me Kasor kede jo me ot ka Keber.

¹⁸ Yayeri oko donyo ooko pi riamo kede Sisera di eko waco ne be, “Adwong, donyi, donyi i eema na; kur ibed kede lworo moro.” Aso, en eko donyo i eema ka Yayeri, di Yayeri oko ume kede idukun.

¹⁹ Sisera oko waco ne be, “Akwai imia pii anonok amati; orio oneka.” Aso, en eko mine cak di eko mato, di bobo eko ume.

²⁰ Sisera oko waco ne be, “Cungi i dogola me eema, di ka dano moro oko bino di eko penyi ka ngatamoro tie kan, in wace be li.”

²¹ Do kakame Sisera oko nino kede pien oudo eol, Yayeri oko kwanyo loc me guro kima, kede enyondo, di eko cede ot tuno bute, di eko guro loc i nget yite pelepel tuno i lobo, di eko neke.

²² Kakame Barak oko tuno kede di emo Sisera, Yayeri oko donyo ooko pi riamo kede, di eko waco ne be, “Bia kan, ango abino nyuto nin dano kame in itie mono.” Aso, en eko donyo i eema ka Yayeri di eko udo Sisera tie buto piny di etieko to, di loc opelao wie.

²³ Cenge nono Rubanga oko mino jo me Isirael obwono Abaka Jabin me jo Kanan.

²⁴ Di do jo me Isirael oko meede doko tek yi kede Abaka Jabin me Kanan, tuno gin muducaro en.