Jongolkop 3 - Baibuli I Leb Kumam 2013

Atekerin kame bin Odong kede Jo me Isirael

¹ Magi en atekerin kame bin Rwot oko weko odong i lobo nono pi en tic kede gi me tamo jo dedede me Isirael kalikame bin obeo i yi moro i Kanan.

² En etimo manono tetekeny epwony lwak acelacel me Isirael i kom yi, twatwal mere jo kalikame pwodi obilo yi moro.

³ Jo kame bin koweko oko dong i lobo nono gin en jopug kany me Pilistia kede jo kame gin kipugo, jo Kanan dedede, jo Sidon, kede jo Kibi kame bedo i piny kobedo mori mori me Lebanon, cako ki moru me Baal Kerimon ape tuno Lebo Kamat.

⁴ Gin bin koweko gi pi tic kede gi me tamo jo me Isirael, tetekeny nen ka jo me Isirael bino lubo cik ka Rwot, kame bin en emio Musa pi mino joakwari gi.

⁵ Aso, jo me Isirael bin oko donyo bedo i diere me jo Kanan, jo Kiti, jo Amor, jo Perisi, jo Kibi, kede jo Yebu.

⁶ Gin bin kiko nyomere kede gi di kiko donyo woro rubangan gi.

Otiniel

⁷ Jo me Isirael bin oko timo gikarac i nyim Rwot. Gin bin wi gi oko wil kede Rwot Rubanga gi di kiko donyo woro cal me Baal kede Asera.

⁸ Manono oko mino cuny Rwot owang i kom gi, di eko mino gi i cing Abaka Kusan Risataim me Mesopotamia. Abaka nono oko pugo gi pi mwakini kanyauni.

⁹ Di do jo me Isirael oko kok but Rwot pi konyo gi, di en eko mino gi dano kame oko lako gi. Dano nono nyinge oudo Otiniel, wot ka Kenas omin me Kaleb atidi.

¹⁰ Tipo ka Rwot bin obino i kome, di en eko doko ngatel me jo me Isirael. Otiniel bin oko ot yi kede Abaka Kusan Risataim me Mesopotamia, di Rwot oko mino abaka nono i cinge.

¹¹ Manono bin oko mino anapakin oko bedo i lobo nono pi mwakini ot ongwon. Di do Otiniel oko to.

Ekud

¹² Jo me Isirael bobo oko timo gikarac i nyim Rwot. Pi manono, Rwot bin oko mino Abaka Egilon me Moab odoko tek eko bwono jo me Isirael.

¹³ Egilon bin oko ribere kede jo Amon kede jo Amalek, di gin kiko ot yi kede jo me Isirael di kiko bwono gi, kiko mano bomba me Jeriko, en bomba me tugo.

¹⁴ Di jo me Isirael oko bedo i apugan me Abaka Egilon me Moab pi mwakini tomon kiwie kanyauni.

¹⁵ Do kakame jo me Isirael oko kok kede but Rwot, en eko cwano negi dano pi lako gi. Dano nono bin en Ekud wot ka Gera, kame oudo yai ki ekeko ka Benjamin. En oudo ebedo engodal. Jo me Isirael bin oko cwane kede giamia pi tero ne Abaka Egilon me Moab.

¹⁶ Ekud bin oko timo epima mere kame bit tuni tuni di boro mere oudo buco romo dul mita. En bin eko twene i amuro mere tetu cam di eko ume kede igoen kame bin engapo.

¹⁷ Di do eko tero giamia nono but Abaka Egilon me Moab. Egilon oudo ocwe twatwal.

¹⁸ Kakame Ekud otieko mino kede abaka giamia nono, eko waco ne jo kame bin oyeo jamini kame koculo kede esolo nono be kidok paco.

¹⁹ Do en kikome kakame bin etuno kede i kide kame kopao me Giligal, eko dok cen but Abaka Egilon di eko waco ne be, “Okwe abaka, ango atie kede kop me mung kame amito waco ni.” Di abaka oko waco ne jotic mege be, “Lingunu!” En eko cwano gin dedede kidonyo ooko.

²⁰ Ekud oko ot but abaka di oudo en etie bedo kene i wi ot i agola mere angic, di eko waco ne abaka be, “Ango atie kede kop nin kowok kibut Rubanga.” Abaka oko yai malo.

²¹ Ekud oko cwano cinge tetu ngodal di eko woto epima ki i amuro mere tetu cam di eko cobo kede abaka i yie.

²² Epima lung oko lwiny i yi abaka, di kakamio oko ume. Ekud oko weko epima nono odong i yie, di eko wok ki dude.

²³ Di do Ekud oko donyo ooko, ecego ikekon di eko gono gi.

²⁴ Kakame Ekud otieko kato kede, jotic me abaka oko bino. Gin bin kineno ikekon me agola ogoore, omio kiko tamo be abaka oudo miero di tie konyere i agola angic nono.

²⁵ Aso gin bin kiko bedo kure kwekwe. Kakame gin kidare kede tieko isawan alac di likame eyabo ikekon me agola me wi ot, gin do kiko kwanyo agony di kiko yabo ekeko. Gin bin kiko udo ngadwong gi tie buto i dier ot di eto.

²⁶ Ekud bin oko lwi kakame gin pwodi kitie gal kede, di eko ot elanyo kide kame opao eko ot Seira.

²⁷ Kakame bin en eko tuno kede i piny kobedo mori mori me Epuraimu, eko kuto agwara me lwongo jo me Isirael ot i yi; di en eko telo gi yai ki piny kobedo mori mori nono.

²⁸ En bin ewaco negi be, “Lubanu; pien Rwot otieko mino jokwor wu, jo Moab, i cing wu.” Aso, gin bin kiko lubo Ekud, di kiko ot mako kabedo kame jo Moab koto ngolo ecilet me Yorodan kiye; likame bin kiko yei ne ngatamoro ngolo ecilet.

²⁹ Cenge nono gin bin kiko suro jo Moab di kiko neko isirikalen gi tutumia tomon (10,000) kame bin tek i yi; likame tie ngatamoro kobwot.

³⁰ Aso, cenge nono jo me Isirael bin oko bwono jo Moab, di anapakin oko bedo i lobo nono pi mwakini ot kanyauni.

Samagar

³¹ Ngatel kame bin oko lubo ngei Ekud en Samagar wot ka Anat. En bin eneko jo Pilistia tol kanyape (600) kede ebela me kolo twonin. Eda bin elako jo me Isirael.