Jongolkop 2 - Baibuli I Leb Kumam 2013

Malaika ka Rwot i Bokim

¹ Malaika ka Rwot oko yai ki Giligal di eko ot Bokim di eko waco ne jo me Isirael be, “Ango bin akwanyo wu ki Misiri di ako kelo wu i lobo kame bin ango acikere iye but joakwari wu. Ango bin awaco negi be, ‘Ango likame abino turo isikan kame atieko timo kede wu.

² Wuda miero kur itimunu isikan moro kede jo kame bedo i lobo noni. Miero ireretunu alutarin gi piny.’ Do wun likame ikounu lubo gikame ango awaco ne wu. Pinyo komio wun ikounu timo kamano?

³ Aso, nataman ango atie waco ne wu be likame abino riamo jo nogi tenge ki nyim wu. Do gin kibino doko jokwor wu, doko woro rubangan gin bino bedo bala owic me ciko wu.”

⁴ Kakame malaika ka Rwot owaco ne kede jo me Isirael kop noni, gin dedede kiko dipo koko.

⁵ Manono en omio gin bin kiko lwongo kabedo nono be Bokim. Gin bin kiko mino giayala but Rwot ki kunono.

To ka Yosua

⁶ Yosua bin oko peruno jo di jo me Isirael dedede oko yai ot gamo lobere kame mako gi kame oudo kotieko popoko negi.

⁷ Di jo me Isirael bin oko bedo woro Rubanga pi kare dedede kame Yosua oudo kuo kede, kede pi kare dedede kame joadongo kame bin oko dong kuo ingei Yosua to, oudo pwodi tie kuo, jo kame bin oneno kede wang gi jamini adongodongo kame bin Rwot otimo ne jo me Isirael.

⁸ Ngatic ka Rwot, Yosua wot ka Nun, bin oko to di mwaka mere me dongo oudo tie tol acel kede tomon (110).

⁹ En bin oko yike i lobo mere kame make, i Timunat Sera i piny kobedo mori mori me Epuraimu, i bad tetu malo me moru me Gas.

¹⁰ Jo me lwak nono da dedede bin oko to, di lwak ace me cen ngei gi oko obino, lwak kalikame oudo ngeo Rwot arabo gikame bin en etimo ne jo me Isirael.

Jo me Isirael Oweko Woro Rwot

¹¹ Di do jo me Isirael bin oko timo gikarac i nyim Rwot; gin bin kidonyo woro Baal,

¹² di kiko weko Rwot, Rubanga ka joakwari gi, ngat kame bin okwanyo gi ki lobo me Misiri. Gin bin kidonyo lubo rubangan apat, rubangan me jo kame bin oluko gi. Gin bin kidonyo luro wi gi piny woro gi, omio kiko wango cuny Rwot.

¹³ Gin kiweko Rwot di kiko donyo woro Baal kede Asitate.

¹⁴ Manono oko mino cuny Rwot oko wang i kom jo me Isirael, di en eko jalo gi i cing joyak kame oko yako gi. En bin emio jokwor obedo tie negi i bad tetu dedede, tetekeny gin likame kikaruno yi kede gi.

¹⁵ I kare dedede kame gin bin kioto kede i yi, Rwot oudo lokere timo ne gin raco, bala kame bin en etieko kwenyaro gin kede di ekwongere. Jo oudo tie do kede par atek.

¹⁶ Rwot bin oko mino jo me Isirael jotel kame oko lako gi ki cing jo kame bin yako gi.

¹⁷ Do jo me Isirael likame bin oko winyo kop akadi me jotel gi. Gin cuny gi bin obedo mito rubangan apat di kiluro wi gi piny woro gi. Gin kilokere tenge oyotoyot ki yongayo kame bin joakwari gi obedo lubo. Joakwari gi bin obedo lubo cik ka Rwot, do gin likame kiko timo kamanono.

¹⁸ I kare dedede kame bin Rwot mio kede jo me Isirael ngatel, Rwot bin bedo tie kede ngatel nono di en eko lako jo ki cing jokwor gi pi kare me ngatel nono dedede. Kisa oudo mako Rwot i kom gi pi cur kame oudo kitie iye pi itidil kede adiadia kame oudo oketo i kom gi.

¹⁹ Do i kare dedede ka ngatel bin oko to, gin bin kilokere dok i kuo kasek di kiko donyo timo gikame rac kalamo me joakwari gi. Gin bin kidonyo lubo rubangan apat di kiluro wi gi piny woro gi. Gin likame bin kiyei weko tim gi areco nogo kede tim gi me epali.

²⁰ Manono bin oko mino cuny Rwot owang i kom jo me Isirael di eko waco be, “Pien jogi otieko turo isikan na kame bin ango aciko joakwari gi pi gwoko, doko da likame kilubo kop kame ango awaco,

²¹ likame bobo ango abino riamo tenge ateker moro kame bin Yosua oto oweko pwodi tie i lobo nono.

²² Ango abino tic kede gi me tamo cuny jo me Isirael, pi neno ka gin kibino lubo yongayo na bala bin joakwari gi arabo li.”

²³ Aso, Rwot bin oko weko atekerin nogo odong i lobo nono. En bin likame emio Yosua obwono gi, akadi ingei to ka Yosua en likame bin eko riamo gi tenge awakawaka.