Jongolkop 19 - Baibuli I Leb Kumam 2013

Ngalebi kede Dako mere me nono

¹ I kare nono, di pwodi Isirael oudo likame tie kede abaka, oudo tie Ngalebi moro koudo bedo kakopwono i piny me imukuran me Epuraimu. En eko tero dako moro ki bomba me Betelem atie i piny me Yuda pi bedo dako mere me nono.

² Do dako mere nono oko ngoi kede, di eko dok turgi but papa mere i bomba me Betelem, di eko bedo kuno pi dwete ongwon.

³ Cware di oko wape pi ngangao cunye tetekeny dako nono dok kede en. En oudo eupere kede ngatic mere kede pundan are. Kakame etuno kede i ot ka papa me dako mere nono, papa me dako nono oko nene di oko ot siramo en kede yomcuny.

⁴ Papa me dako mere nono oko mine edong kong bedo bute kanono, di en eko tieko ceng adek i paco nono. I ceng nogo dedede en eko bedo cam kede amata di ebuto kanono.

⁵ I ceng me ongwon gin kiko dilo cei odiko di kiko donyo iikere me yai ot. Do papa me dako mere oko waco ne be, “Kong camunu gimoro iudunu kede teko, di do ikounu ot.”

⁶ Aso, cuo are nogo oko bedo di kiko donyo cam kede amata karacel; di papa me dako oko waco ne be, “Kong but kan tin bobo tetekeny iyom cunyi.”

⁷ Icuo Ngalebi nono oko yai koto pi ot, do ore oko dine pi buto bobo, aso en eko bobo buto kanono.

⁸ Odiko sek me ceng me kany en bobo eko cako mito yai, do papa me dako mere oko waco ne be, “Camunu kong gimoro iudunu kede teko.” Aso, gin kiko bedo miemiena tuno piny yuto, di gin jo are nogo kiko cam kede amata.

⁹ Kakame icuo nono kede dako mere kede ngatic mere oko yai pi ot kede, ore oko waco ne be, “Neningo, piny otieko yuto, butunu kan, pien piny tie doko col. Diki ibinunu dilo yai odiko di ikounu dok paco.”

^10-11 Do icuo nono oko dagi buto kuno; en eko yai di eko ot karacel kede dako mere, kede ngatic mere, kede pundan mege are kame kotweo gibedo i ngei gi. Esawa kame kinoko kede Yebu (manono en Yerusalem), esawa oudo okato do. Aso, ngatic oko waco ne ngadwong mere be, “Oparaunu ootunu obutunu i bomba me jo Yebu ni.”

^12-13 Do ngadwong mere oko waco be, “Wan likame obinunu parao i bomba kame jo mege likame obedo jo me Isirael. Do wan obinunu meede ot atitidi di okounu ot buto Gibea amoto Rama.”

¹⁴ Aso, gin kiko ot kikalamo Yebu di kiko meede kede ot, di ceng oko donyo negi Gibea, kame tie i adul me jo me ekeko ka Benjamin.

¹⁵ Gin kiko parao pi ot buto i bomba nono. Di kiko donyo i bomba di kiko donyo bedo kakaler, do likame ngatamoro oko tero gi ot buto ture.

¹⁶ Di do icuo moro oti oko bino oko udo gi kanono di ewok ki timo tic i poto mere. En oudo ebedo dano me Epuraimu kame oudo tie bedo i Gibea. (Jo apat kame oudo bedo kanono oudo obedo jo me ekeko ka Benjamin.)

¹⁷ Kakame adwong nono oko kiarao kede wange di eko neno ngasapali nono di etie bedo kakaler i dier bomba, en eko penye be, “In iwok ki tuai? Itie ot tuai?”

¹⁸ Ngalebi nono oko dwoko be, “Wan owok ki Betelem i piny me Yuda, otie ot i dier piny me imukuran me Epuraimu, en turwa. Likame tie ngatamoro kowaco ne wa pi ot buto ture,

¹⁹ bed bala wan otie kede cam me pundan wa, kede da mugati kede bwini aromo wa, ango kede dako na kede ngatic na. Wan otie kede gi dedede kame omito.”

²⁰ Adwong nono oko waco be, “Ango agamo wu tura! Ango abino gwoko wu; likame ipoorenu buto ooko i dier bomba.”

²¹ Aso, en eko tero gi ture di eko pito pundan gi. Wele mege oko lwoko tien gi di kiko cam.

²² Kakame gin oudo kitie yomo kede cuny gi, jo mogo me bomba, jo awi gi otieko bilor i tim me caro, oko lukaro ot di kiko cako tojo ekeko. Kiwaco ne adwong nono, en won ot nono be, “Wot ne wan icuo kodonyo i odi no, wan omito buto kede.”

²³ Do adwong won ot nono oko donyo ooko but gi di oko waco negi be, “Imiegu na, likame kamano, kur itimunu gikarac kacal kamano. Bala kame icuo ni obedo kede welo nango, kur itimunu gikame cal kamano.

²⁴ Nenunu, dako mere me nono tie kan, kede nyara kalikame pwodi ongeo icuo da tie; ango abino woto gi ooko butu, di wun ikounu pere kede gi di ikounu timo negi gikame cunyu mito. Do kur itimunu gikarac arom kano ne icuo ni.”

²⁵ Do cuo nogo oko dagi winyo kop mere. Aso, Ngalebi ca oko mako dako mere di eko cwane ooko but gi. Gin kiko buto kede tetek di kiko piede i kome iwor kiakia paka piny ru. Kakame piny owalar kede, gin kiko weke eoto.

²⁶ Odiko do kakame piny oru kede, dako nono oko dwogo di eko poto i ekeko me ot me adwong nono, kakame cware oudo tie iye. Ceng owok di oudo pwodi etie kanono.

²⁷ Odiko cware oko yai di eko yabo ekeko pi koto donyo ooko di eko ot, eko udo dako mere tie buto di erieo bade i ekeko.

²⁸ En eko waco ne dako mere nono be, “Yai malo ooti.” Do likame tie kop moro oko yamere kibute. Aso en eko tingo dako nono di eko rine i ngei punda di eko yai ot ture.

²⁹ Kakame etuno kede paco, en eko donyo i ot di eko kwanyo pala eko ngongolo kom dako mere nono i adulion tomon kiwie are, di eko cwano buli adul acelacel but buli jo me ekeko acelacel me ateker me Isirael.

³⁰ Jo dedede koneno oko waco be, “Wan lem pwodi likame oneno gikame cal kaman, doko da lem pwodi likame gikame cal kamanoni otimere cako jo me Isirael yai ki Misiri; miero kong otamunu kop noni, oporunu kop iye di okounu yamo kop moro iye.”