Jongolkop 17 - Baibuli I Leb Kumam 2013

Caljwogi ka Mikaa

¹ Bin tie icuo moro kame nyinge Mikaa kame oudo bedo i piny me imukuran me Epuraimu.

² En bin eko waco ne toto mere be, “Siliba tutumia acel kede tol acel kame oudo kokwalo kibuti, di in iko lamere di ango atie winyo, siliba nogo tie butango; ango en oudo akwanyo gi, do nan abino dwoko gi.” Toto mere oko waco be, “Woda, akwao Rubanga mi winyo!”

³ En eko dwoko ne toto mere sente nogo di toto mere oko waco be, “Ango abino kwero siliba nogi but Rwot, pi gengo ilam i kom woda. Kobino tic kede gi me timo caljwogi me yat di kopuo kome kede siliba. Aso, nan ango atie dwoko siliba nogi buti.”

⁴ Aso di bin en edwoko ne toto mere sente nogo, toto mere oko kwanyo siliba tol are di eko mino ngatet, di ngatet nono oko pano yat di eko puno kome kede siliba nogo. Oko keto caljwogi nono i ot ka Mikaa.

⁵ Icuo anyinge Mikaa noni oudo tie kede iroro, di en eko timo caljwogi mogo kede epod, di eko keto wode acel pi bedo ngasaseredoti mere.

⁶ I kare nono Isirael oudo likame tie kede abaka moro; dano acelacel oudo timo gikame cunye mito.

⁷ I kare nono da oudo tie awobi moro Ngalebi kame oudo bedo i bomba me Betelem i lobo me Yuda.

⁸ En eko yai ki Betelem pi ot mono karamoro ace di eko donyo bedo iye. Kakame oudo etie ot kede, en eko tuno i ot ka Mikaa i piny me imukuran me Epuraimu.

⁹ Mikaa oko penye be, “In iwok ki tuai?” En eko dwoko be, “Ango abedo Ngalebi, awok ki bomba me Betelem i lobo me Yuda. Atie mono karamoro adony bedo iye.”

¹⁰ Mikaa oko waco ne be, “Dony bedo keda, di iko doko ngat amia tam, kede ngasaseredoti, di ango ako donyo bino culi siliba tomon buli mwaka, igoen mogo kede gi me acama.”

¹¹ Awobi Ngalebi nono oko yei bedo kede Mikaa, di eko doko bala wot ka Mikaa.

¹² Mikaa oko mine edoko ngasaseredoti mere, di en eko donyo bedo i paco ka Mikaa.

¹³ Mikaa oko waco be, “Bala kame nan do atie kede ngasaseredoti na kobedo Ngalebi, angeo be Rwot bino mina mulem.”