Jongolkop 16 - Baibuli I Leb Kumam 2013

Samuson i Gasa

¹ Ceng moro acel Samuson ooto i bomba me Gasa, kakame eko neno iye malaya moro di eko buto kede.

² Jo me Gasa oko niang be Samuson oudo tie i bomba kanono, gin kiko buto kiluko bomba di kiko donyo dare i erute me bomba iwor kiakia. Gin kibedo ling alinga iwor kiakia di kiparo be, “Omito kure tuno ceng wok di oko neke.”

³ Do Samuson oko buto jik i dier iwor kenekene. En eko yai di eko ot mako ekeko me erute me bomba kede ipirin mege are, kede ari me cege, kede gi dedede atie iye, di eko riongo gi i ngute di eko tero gi i wi emukura kame neeno kede Keburon.

Samuson kede Delila

⁴ Ingei manoni, Samuson oko mitere kede dako moro kame nyinge Delila, kame oudo bedo i Aditot me Sorek.

⁵ Abakai me jo Pilistia oko ot but dako nono di kiko waco ne be, “Bitao cuny Samuson ewac ni gikame omio en etek kamano, kede ewac ni epone kame wan otwero bwone kede, tetekeny wan omake oko twene di oko aruno en; buli ngat acelacel kibut wa bino mini siliba tutumia acel kede tol acel.”

⁶ Aso, Delila oko waco ne Samuson be, “Okwe, wac na gikame omio in itek twatwal. Ka dano moro mito tweni di eko tieko teko ni, nyo kame epoore timo?”

⁷ Samuson oko dwoko be, “Ka kotwea kede toli kanyaare kalikame otuo, abino doko goro bala jo apat.”

⁸ Di abakai me jo Pilistia oko tero ne toli kanyaare kalikame otuo, di en eko tweno Samuson kede toli nogo.

⁹ Oudo jo mogo tie i agola ace kitie kuro gikame dako nono tie timo. En eko waco ne Samuson be, “Samuson! Jo me Pilistia tie bino ni!” Do Samuson eko coto toli nogo bala kame ausi cot kede kame mac omule. Aso, gin likame kiko twero ngeno mung me teko ka Samuson.

¹⁰ Delila oko waco ne Samuson be, “In kom inywara anywara iko waco na kop me abe. Okwe, wac na epone kame kotwero tweni kede.”

¹¹ Samuson oko dwoko be, “Ka kotwea kede aunoi kalikame pwodi kotio kede gi, abino doko goro bala jo apat.”

¹² Aso, Delila oko kelo aunoi anyen di eko tweno kede Samuson. En eko lelemo be, “Samuson! Jo me Pilistia tie bino ni.” Oudo jo mogo tie i agola ace kitie kuro. Do Samuson oko cocoto aunoi ki ngut cinge bala coto ausi.

¹³ Di Delila oko waco ne Samuson be, “Tuno nan in pwodi itie nywara anywara di ingala. Wac na epone kame miero twei kede.” Samuson oko waco ne be, “Yer wiango tie abunge kanyaare, ka in ikedo gi i lilim kame kokudo me cweno ausin doko egoe, di iko ridakino gi kede yat, ango abino doko goro bala jo apat.”

¹⁴ Delila oko ngangalo en paka nino, di eko kwanyo abunge kanyaare me yer wi Samuson di eko kedo gi i lilim kame kokudo me cweno ausin doko egoe, di eko ridakino gi kede yat. Di en eko waco ne Samuson be, “Samuson! Jo me Pilistia otuno ni.” Do en eko cei ki wang nino mere di eko peno yer wie ki lilim kame kokudo me cweno ausin doko egoe.

¹⁵ Delila oko waco ne Samuson be, “Benyo benyo kame in itwero waco kede be imara, do di cunyi likame tie i koma? Itieko nan nywara odoko tien adek, di iko dagi waco na gikame omio in itek twatwal.”

¹⁶ En eko bedo bitao cuny Samuson kamanono buli ceng di eburao en kop nono. Samuson oko do ol kede kop mere

¹⁷ di eko waco ne mung mere be, “Ango likame pwodi abilo lielo yer wia; pien ango abedo dano kame kokwero but Rubanga cako di pwodi oudo atie i yi toto na. Ka kolielo wia, teko nango bino yai; abino doko goro bala jo apat.”

¹⁸ Kakame Delila oko ngeno kede be Samuson oudo otieko tuco kop me ateni, en eko cwano kop me lwongo abakai me jo Pilistia di ewaco negi be, “Nan do bianu, piento en etieko tuco na mung mere.” Di abakai me Pilistia oko bino di kimako sente da kikelo.

¹⁹ Delila oko ngangalo Samuson onino i tiene, di eko lwongo icuo moro obino lielo abunge kanyaare me yer wi Samuson, di do Samuson oko cako doko goro, pien teko mere oudo otieko yai.

²⁰ Delila oko lelemo be, “Samuson! Jo me Pilistia otuno ni.” Kakame Samuson oko cei kede ki wang nino, en eko tamo be, “Ango abino pikiro di ako donyo ooko bala i ceng apat kokato.” Do oudo likame en engeo be Rwot otieko weke.

²¹ Aso, jo me Pilistia oko make di kiko golo wange. Gin kiko tere Gasa di kiko twene kede eriko kame kotimo kede nyonyo buronsi, di oko mine edonyo timo tic me riego i otkol.

²² Do yer me wie oko doko cako lot ingei liele.

To ka Samuson

²³ Abakai me jo Pilistia oko ariamakin karacel pi tedo ebaga kede pi mino giayala adwong but rubanga gi Dagon. Gin kiko donyo wer be, “Ebo, rubanga wa otieko mino ngakwor wa Samuson i cing wa.”

^24-25 Gin oudo kitie kede yomcuny, omio kiko waco be, “Kelunu Samuson ber ebin eyom cuny wa!” Kakame kiwoto kede Samuson ki otkol, gin kiko mine edonyo yomo cuny gi, di ecungo i dierediere me ipirin. Gin kiko donyo pako rubanga gi di kiwaco be, “Ebo, rubanga wa otieko mino ngakwor wa i cing wa, ngat kodudubo piny wa, ngat koneko jo wa atot.”

²⁶ Samuson oko waco ne awobi koudo mako cinge di pee be, “Wek ber kong ararapo ipirin kame gango ot, amito cato kede gi.”

²⁷ Jo oudo opongo ot nono culucul, cuo kede mon. Abakai dedede me jo Pilistia oudo tie kanono, doko da oudo cuo kede mon aromo tutumia adek tie i wi ot malo ngino kite kame Samuson oudo tie yomo kede cuny gi.

²⁸ Di Samuson oko lego but Rwot di ewaco be, “Rwot Rubanga, okwe yutuno ango di iko medo mina teko kicel bobo, tetekeny gi acel kame abino timo noni mia akaruno culo kwor i kom jo me Pilistia pi wanga are kame gin kigolo.”

²⁹ Aso Samuson oko cato kede ipirin are me cuny ot, cinge tetu cam i acel kede cinge tetu ngodal da i acel, di en eko cwalo gi.

³⁰ En eko lelemo be, “Wek atoi kede jo me Pilistia.” En eko cwalo gi kede teko mere dedede, di do ot oko kayamakin i kom abakai kede jo dedede kame oudo tie iye. Aso, jo kame Samuson oko neko i esawa me to mere oko bedo tot kalamo jo kame oudo eneko i kare me kuo mere.

³¹ Di do imiegu mege kede jo ace me paco gi oko ot kwanyo kome di kiko ot yike dierediere me Sora kede Esitaol, i ates kame papa mere Manoa oudo okunyo. En oudo ebedo ngangolkop kotelo Isirael pi mwakini ot are.