Jongolkop 15 - Baibuli I Leb Kumam 2013

¹ Ingei kare moro, Samuson oko ot pi koto welao dako mere i kare me nyaro engano; oudo emako diel abwong etero ne. En eko waco ne papa me dako mere be, “Ango amito donyo i agola ka dako na.” Do papa me dako mere oko dagi ne donyo.

² Papa me dako mere oko waco ne be, “Ango oudo angeo kiber be in itieko dagi dako noni, aso ango ako mine but adieru ni. Do amin mere atidi cil kalamo en, nan in do ikaruno tero manono.”

³ Samuson oko waco be, “Ka ango atimo gimoro arac ne jo me Pilistia, kur wac be ango arac.”

⁴ Aso, Samuson oko ot di eko mako ikween tol adek di eko twetweo yib gi are are, di eko twetweo rau kakame etwetweo me yib gi nogo.

⁵ Di do eko cwicwinyo mac i rau nogo di eko jalakino gi kiringo i poti me engano me jo Pilistia. Iepone noni en eko wango engano kame kotieko nyaro kede kalikame pwodi konyaro, ribo kiton poti me olok kede me olibeti.

⁶ Kakame jo me Pilistia opepenyo kede kop i kom ngat kotimo gi noni, gin kiko niang be Samuson en oudo otimo tim noni, pien oudo papa me dako mere, icuo me Timina olokere mino dako ka Samuson but ngawot Samuson. Aso jo me Pilistia oko ot di kiko wango nyako nono kede papa mere.

⁷ Samuson oko waco negi be, “Aso, mam mane en gikame itimunu? Akwongere be likame abino weko kop noni tuno di atieko culo kwor i komu.”

⁸ En eko suro gi asur arac di eko neko jo atot di eko ot bedo kakobarere me lela me Etam.

Samuson Obwono Jo me Pilistia

⁹ Jo me Pilistia oko ot di kiko gero kimere gi Yuda, di kiko suro bomba me Leki.

¹⁰ Jo me Yuda oko waco be, “Pinyo komio ibinunu suro wa?” Gin kiko dwoko be, “Wan obino pi mako Samuson, pi timo ne gikame eda etimo ne wa.”

¹¹ Aso jo tutumia adek me Yuda oko ot i abo atie kakobarere me lela me Etam, di kiko waco ne Samuson be, “Benyo, likame ingeo be jo me Pilistia en apugo wa? Nyo kame in itieko timo ne wa?” En eko dwoko negi be, “Ada atimo negi gikame gida kitimo na.”

¹² Gin kiko waco ne be, “Wan obino kan pi maki di oko tweni, tetekeny omi i cing jo Pilistia.” Samuson oko waco be, “Kong kwongerenu buta be wun kikomu likame ibinunu neka.”

¹³ Gin kiko dwoko be, “Li, wan oyaro kenekene tweni di oko mini i cing gin; wan likame obino neki.” Aso gin kiko twene kede aunoi are anyen di kiko kele kidwoke ki lela.

¹⁴ Kakame etuno kede Leki, jo me Pilistia oko ringo bute di kiwoo kitek. Twer ka Rwot oko donyo i kome, di aunoi kame oudo tie i ngut cinge oko doko cal bala ausi kowang, di kiko cocotun.

¹⁵ En eko udo cogo me itinyo me punda koudo pwodi oto inonono inonono, en eko kwanye di eko neko kede jo tutumia acel.

¹⁶ Samuson oko waco be, “Kom aneko jo tutumia acel kede cogo me itinyo me punda; kom cogo me itinyo me punda omio akumemo gi atukit kede atukit.”

¹⁷ Kakame etieko waco kede kop noni, en eko uco cogo me itinyo nono. Oko donyo lwongo kakame gi noni otimere iye be Ramat Leki.

¹⁸ Di do orio oko neko Samuson adikinicel, di eko lwongo Rwot di ewaco be, “Itieko mina abwono yi bwon kalikame wacere; do nan benyo, mam atoi orio di ako poto i cing jo me Pilistia, jo kalikame kokepo?”

¹⁹ Rwot oko mino lobo obarere i Leki kunono di pii oko wok kiye. Samuson oko mato pii di eko udo teko. Omio kolwongo atan nono be Kakore; pwodi etie Leki tuno tin.

²⁰ Samuson oko telo jo me Isirael pi mwakini ot are di oudo jo me Pilistia en apugo lobo nono.