Jongolkop 14 - Baibuli I Leb Kumam 2013

Samuson kede Nyako me Timina

¹ Ceng moro acel Samuson oko ot elor Timina, di eko neno nyako moro me Pilistia.

² En eko dok paco di eko waco ne papa mere kede toto mere be, “Ango aneno nyako moro me Pilistia Timina, omenu ne ango edok dako na.”

³ Do papa mere kede toto mere oko waco ne be, “Benyo, likame tie nyako moro i kom joawade nin, arabo i kom jo wa, en komio ioto mono dako kikom jo Pilistia, jo kalikame kokepo?” Do Samuson oko waco ne papa mere be, “Wun kelenu nango, en eyomo cunya.”

⁴ Papa mere kede toto mere oudo likame ngeo be Rwot en oudo otelo Samuson timo kamanono, pien Rwot oudo tie mono yongayo me suro jo me Pilistia. I kare nono jo me Pilistia oudo tie pugo jo me Isirael.

⁵ Di do Samuson oko upere kede papa mere kede toto mere kilor Timina. Kakame kituno kede i poti me olok kame oudo tie kunono, en eko winyo di engu dorano.

⁶ Twer ka Rwot oko donyo i kome, di en eko nyinyilo engu nono kede cinge acinga, ineno bala atin diel. Do en likame eko waco ne papa mere amoto toto mere gikame etimo.

⁷ En eko ot di eko yamo kede nyako nono, di nyako nono oko yomo cunye.

⁸ Ingei kare moro acecek, Samuson oko dok kunono pi nyomo nyako nono, di en kong eko parao pi neno engu kame oudo eneko. En eko udo kic onur i kom engu nono, doko da mokic oudo tie iye.

⁹ En eko wado mokic nono i cinge di eko donyo camo di eoto. Di eko tero mokic mogo da ne papa mere kede toto mere eko mino gi, gida kiko camo. Do en likame eko waco negi be en oudo ewado mokic nono ki kom engu oto.

¹⁰ Papa mere oko ot paka but nyako nono, di Samuson oko timo ebaga kanono bala kame awobe oudo onao timo.

¹¹ Kakame jo me Pilistia onene kede, gin kiko cwano awobe ot adek pi ot tagalo wange.

¹² Samuson oko waco negi be, “Ber kong amito penyo wu agole moro. Ka ikounu twero tuco na dwong mere di pwodi ceng kanyaare me ebaga likame otiek, abino mino wu igoen ameny ot adek, kede da igoen ot adek kame kongapo i ceng adongo.

¹³ Do ka wun likame ikounu twero tuco na dwong mere, wun ibinunu mina igoen ameny ot adek, kede da igoen ot adek kame kongapo i ceng adongo.” Gin kiko waco ne be, “Peny wa agole ni nono; wan omito winye.”

¹⁴ En eko waco negi be, “Ki kom ngacam jo, owok kiye gi me acama; ki kom ngateko, owok kiye gikame winyiwinyi.” Do ceng adek oko kato di pwodi likame kitwero gonyo dwong me peny me agole nono.

¹⁵ I ceng me ongwon gin kiko waco ne dako ka Samuson be, “Bitao cuny cwari egony ne wa dwong me peny me agole noni. Aso ka li, wan oyaro cwinyi kede mac i ot ka papa ni. Mam wun ilwongunu wa kan pi yako wa?”

¹⁶ Dako ka Samuson oko donyo koko i nyime kitek di ewaco be, “Likame in imara! In cunyi daga. In ipenyo jo nango agole do likame iko gonyo nango dwong mere.” Samuson oko waco ne be, “Neningo, ango likame agonyo dwong mere ne papa na akadi ne toto na da, do pinyo mio ango apoore gonyo nin dwong mere?”

¹⁷ Nyako nono oko bedo koko kamanono pi ceng kanyaare me camo ebaga nono dedede. Do i ceng me kanyaare, en eko do tuco ne dwong me peny me agole nono, pien dako mere oudo do ocobuno en. Di do nyako nono oko tatamo ne jo mege dwong me agole nono.

¹⁸ Aso, i ceng me kanyaare di pwodi likame ceng odonyo, jo me bomba oko waco ne be, “Nyo amit kalamo mokic? Nyo atek kalamo engu?” Samuson oko dwoko negi be, “Koto oudo likame ipurunu kede diang na, koto oudo likame itwerunu ngeno dwong me agole na.”

¹⁹ Di twer ka Rwot oko donyo i kome, di eko ot elor piny tuno Asikelon. En eko neko cuo ot adek me bomba nono, di eko gonyo igoen gi, di eko mino igoen kame jo ngapo i ceng adongo but jo kogonyo dwong me agole mere. En eko dok i ot ka papa mere kede twon gero.

²⁰ Di oko mino nyako kame Samuson oudo onyomo nono but ngawote koudo olwoke.