Jongolkop 12 - Baibuli I Leb Kumam 2013

Yeputa kede Jo Epuraimu

¹ Cuo me Epuraimu oko iikere pi yi di kiko ngolo ecilet me Yorodan tuno Sapon di kiko waco ne Yeputa be, “Pinyo komio ingolo ikor iko ot yi kede jo Amon abongo lwongo wan upere kedi? Wan obino wangi i ot!”

² Yeputa oko dwoko negi be, “Ango kede jo na oudo ongoi kitek kede jo Amon. Ango ako lwongo wu do likame wun ikounu laka ki cing gi.

³ Kakame ango ako neno kede be wun likame ibinunu laka, ango ako yei jalo kuo na di ako ot yi kede jo Amon, di Rwot oko mina abwono gi. Aso, pinyo komio nan wun ibinunu pi yi keda?”

⁴ Di Yeputa oko coko cuo dedede me Gilead di kiko yi kede jo Epuraimu, di jo me Gilead oko bwono jo Epuraimu. (Jo Epuraimu oudo owaco be, “Wun jo Gilead kame bedo i dier Epuraimu kede Manase, wun ibedunu jo kopokere weko jo Epuraimu.”)

⁵ Di do jo me Gilead oko mamako kabedere kame jo Epuraimu oudo poore ngolo kede ecilet me Yorodan. Tek ka dano moro me Epuraimu kame oudo tie lwi openyo akarunikin me ngolo ecilet, jo me Gilead oudo ko penye be, “Benyo, in ibedo dano me Epuraimu?” Kame en eko waco be, “Li,”

⁶ gin oudo kiko waco ne pi waco be, “Sibolet”. Do kite kame en likame oudo ekaruno tuco kede kop nono kiber, en eko do waco be, “Cibolet”. Di do gin oudo kiko make di kiko neke kanono kakame kongolo kede ecilet me Yorodan. I kare nono gin kiko neko jo Epuraimu tutumia ot ongwon kiwie are (42,000).

⁷ Yeputa oko telo jo me Isirael pi mwakini kanyape, di do en eko to di oko yike i bomba me tur gi i Gilead.

Ibisan, Elon kede Abidon

⁸ Ingei tel ka Yeputa, Ibisan me Betelem en oko doko ngatel me Isirael.

⁹ En oudo enywalo awobe ot adek kede anyira da ot adek. En eko mino anyira mege ot adek onyomere ooko me dogola me ekeko gi me anywali, doko da eko kelo mon ot adek ki ooko me dogola me ekeko gi me anywali pi nyomere kede awobe mege. En eko bedo ngangolkop i Isirael pi mwakini kanyaare.

¹⁰ Ibisan oko to di oko yike Betelem.

¹¹ Ingei tel ka Ibisan, Elon me Sebulun en oko telo Isirael pi mwakini tomon.

¹² Elon oko to di oko yike Aijalon i lobo me Sebulun.

¹³ Ingei tel ka Elon, Abidon wot ka Kilel me Piraton en oko telo Isirael.

¹⁴ En oudo etie kede awobe ot ongwon, kede awobe kobedo ikwae mege ot adek, gin dedede oudo kiringo kede pundan ot kanyaare. En eko bedo ngangolkop i Isirael pi mwakini kanyauni.

¹⁵ En eko to di oko yike Piraton i adul me Epuraimu i piny kobedo imukuran me jo Amalek.