Jolebi 7 - Baibuli I Leb Kumam 2013

Giayala me Timo Cul

¹ Magi en iswilia amako giayala me timo cul; manono obedo gikacil twatwal:

² Le me giayala me timo cul kopoore ngolo i kakame kongolo iye giayala awanga, di oko kikiro remo mere i kom alutari i bad dedede.

³ Kopoore yalo kakamio mere dedede, yibe kede mo mere dedede, mo kame umo amontena,

⁴ engalur are kede mo kame umo gi, kede lak emany.

⁵ Ngasaseredoti bino wango gi kiduny yiro i wi alutari bala giayala awanga but Rwot; manoni obedo giayala me timo cul.

⁶ Cuo ace kobedo anywali me ude me josaseredoti da bino camo ringo nono; en ebedo gikacil twatwal.

⁷ Giayala me timo cul cal acala bala giayala me kwanyo dub; gin kitie kede iswil acacal, pien josaseredoti ayalo gin dedede tero ringo me le kame koyalo.

⁸ Doko da lau me le kame koyalo bala giayala awanga dong ne ngasaseredoti.

⁹ Giayala me alos kame konyongo di oko tolo i keno oko doko mugati, arabo kame kotedo kede sepula amoto itatany, poore dong ne ngasaseredoti kotimo yalo nono but Rwot kawang wone.

¹⁰ Do giayala me alos ace kalikame kotedo, bed bala konyonge kede mo amoto li, josaseredoti dedede awobe ka Aaron bino popoko en di rorom.

Giayala me Nywak

¹¹ Iswilia kame mako giayala me nywak kame dano yalo but Rwot tie kaman:

¹² Ka dano tie mino giayala mere bala giayala me pwoc but Rwot, en epoore tero le kame eyaro yalo karacel kede mugati kame kotimo abongo arup, mugati apek kame kotimo kede alos kame konyongo kede mo me olibeti, mugati aperepere kame kosuto mo i kome, kede mugati apepek kame kotimo kede alos apwot di onyonge kede mo atot.

¹³ Medo i wi magonogo, en epoore da tero mugati kame kotimo kede arup.

¹⁴ En eko bino kwanyo mugati acel ki buli egere apapat me cwec me mugati nogi, pi bedo giamia but Rwot; ngasaseredoti akikiro remo me giayala me nywak i kom alutari en kame tero magonogi.

¹⁵ Ringo me le kame koyalo bala giayala me pwoc nono kopoore camo ceng kame koyale kede nono, likame dul moro poore buto paka odiko.

¹⁶ Ka dano otero giayala me nywak pi cobo isikan mere, arabo bala giayala kame en ekwanyo i mit mere kene, kobino came i ceng kame koyale kede, do donge mere oko bino camo oru mere.

¹⁷ Do ringo ace kame bino dong paka i ceng me adek kobino wango.

¹⁸ Ka ocamo ringo me giayala nono i ceng me adek, Rubanga likame bino gamo giayala ka dano nono, doko da likame kobino tero be en emio gimoro; do manono bino bedo bala gi me kwer, ngat kame came bino bedo kede raco.

¹⁹ Ringo koriamo kede kom gimoro me kwer likame kopoore camo, do miero wange. Jo kame li kede pwokere kede gi me kwer twero camo ringo apat mere.

²⁰ Do ka dano kopwokere kede gi me kwer ocamo ringo me giayala me nywak, kobino riame tenge kibut jo me Isirael.

²¹ Doko da ka ngatamoro omulo gimoro me kwer atie i kom dano, amoto le moro me kwer, arabo giacwea moro me kwer, di eko camo ringo me giayala me nywak but Rwot, eda kobino riame tenge kibut jo me Isirael.

²² Rwot doko oko mino Musa iswilia

²³ kame jo me Isirael poore lubo kaman: Likame ibinunu camo kakamio me dok, diegi kede romini.

²⁴ Kakamio me le moro oto atoa arabo kame le me obar oneko likame ipoorenu camo, do itwerunu timo kede gimoro ace.

²⁵ Ka dano moro kibutu ocamo kakamio me le kame kotwero mino but Rwot bala giayala awanga, likame kobino riame tenge kibut jo me Isirael.

²⁶ Likame ibinunu camo remo me gimoroni dedede, me winyo amoto me le, i kabedo dedede kame ibinunu bedo iye.

²⁷ Ngatamoro kibutu kame bino camo remo kobino riame tenge kibut jo me Isirael.

²⁸ Rwot doko oko mino Musa iswilia

²⁹ kame jo me Isirael poore lubo kaman: Ngatamoro kame mio giayala me nywak but Rwot poore en kikome eter but Rwot dul moro me giayala mere nono;

³⁰ en kikome en kame cinge poore mako gi nono tero but Rwot bala giayala awanga. En ebino tero kakamio kede kapumito di eko mino but Rwot, di eko kiarao en i nyim Rwot.

³¹ Ngasaseredoti atie tic bino wango kakamio nono i wi alutari, do kapumito dong ne Aaron kede awobe mege, gin josaseredoti.

³² Amuro me bad tetu cam me le me giayala me nywak kopoore mino bala giamia

³³ but ngasaseredoti koyalo remo kede kakamio me giayala nono me nywak.

³⁴ Pien kapumito kame koyalo but Rwot di kokiarao en, kede amuro me bad tetu cam, obedo giamia kame Rwot gamo kibut jo me Isirael, ki giayala gi me nywak, di en eko mino Aaron kede awobe mege, gin josaseredoti. Magonogi poore bedo iner gin kame jo me Isirael poore mino gi i kare dedede.

³⁵ Manoni obedo iner kame kopoore mino Aaron kede awobe mege ki giayala awanga but Rwot, tek kame kotieko wiro gi kidoko josaseredoti kame tio ne Rwot.

³⁶ Bin di Rwot owiro gi, en eko ciko be poore mino gi iner noni. Jo me Isirael poore lubo iswil noni i kare dedede me anyim.

³⁷ Magonogi en obedo iswilia amako giayala awanga, giayala me alos, giayala me kwanyo dub, giayala me timo cul, giayala me wiro ngasaseredoti, kede giayala me nywak.

³⁸ Rwot bin omio Musa iswilia nogi i moru me Sinai i ceng kame bin ewaco ne kede jo me Isirael pi tero giayala gi bute, di oudo kitie i wi tim me Sinai.