Jolebi 21 - Baibuli I Leb Kumam 2013

Josaseredoti Poore bedo Jokacil

¹ Rwot oko waco ne Musa pi waco ne josaseredoti, awobe ka Aaron be, “Likame tie ngatamoro kikom josaseredoti kame miero mul kom wad gi moro oto di eko munaun,

² kwanyo ka dano nono obedo toto mere, papa mere, wode, nyare, omin mere,

³ arabo amin mere kalikame onyomo, kame en egwoko.

⁴ Likame ebino munao kome ka ore moro oko to.

⁵ “Josaseredoti likame bino lielo kakamogo i wi gi di ko dong ler, arabo ngolo yer me tik gi, amoto teteo kom gi pi nyuto iturur.

⁶ Gin kibino bedo jokacil but ango Rubanga gi, doko likame kibino kelo acae i nyinga. Pien gin kimio giayala awanga me cam buta, gin poore kibed jokacil.

⁷ Gin likame kibino nyomo mon kame otieko timo malaya arabo kame kotieko buto kede gi, amoto kame cwog gi oriamo gi, pien gin kibedo jokacil but Rubanga gi.

⁸ Jo poore ter gi bala jokacil, pien gin kimio giayala me cam but ango Rubanga wu. Ango Rwot abedo ngat kacil, doko alonyo jo na kibedo cil.

⁹ Ka nyar ngasaseredoti moro oko doko malaya, en ekelo ne papa mere acae; kobino wange paka to.

¹⁰ “Ngasaseredoti kame oko tingo ne dwongo kikom jowote, en ngat kame kowiro kede mo, di oko kwere pi ngapo igoen me ngasaseredoti, likame ebino weko yer wie bedo di likame ekuro, akadi nyinyilo igoen me kome bala dano kame tie koko ngat oto.

¹¹ En likame ebino ot kakame dano oto tie iye; en likame ebino munao kome akadi di ngat oto nono obedo papa mere arabo toto mere.

¹² En likame ebino yai ki Kabedo Kacil di eko ot kakame dano oto tie iye, pien manono bino mino ekelo acae Kabedo na Kacil; piento en kotieko kwere buta di owire kede mo na. Ango en Rwot.

¹³ En ebino nyomo dako kame icuo moro pwodi likame obuto kede.

¹⁴ En likame ebino nyomo apuserut, dako kame cware oriame, arabo dako kame kotieko buto kede, amoto malaya. En ebino nyomo nyako me ekeko kame en ewok kiye,

¹⁵ tetekeny kur emi idwe mege bed jo kopwokere kikom jo mege; pien ango en Rwot ngat kame alonye.”

¹⁶ Rwot oko waco ne Musa

¹⁷ be ewace Aaron be, “Likame tie akwari moro kame tie kede angwal moro, kame bino noka pi mina giayala awanga me cam. Manoni tie pi kare lung me anyim.

¹⁸ Likame tie dano moro kame tie kede angwal moro kame bino noka pi mina giayala: emuduk arabo engwalas, icuo kame tuo odudubo nyime, arabo kame tie kede peko moro i kome;

¹⁹ icuo kame cinge arabo tiene ongwalo;

²⁰ arabo dano kame ngee oguraun, amoto dano acecek twatwal, arabo icuo kame tie kede tuwo me wang amoto kame buge arabo gwenyu omako kome, arabo icuo moro kame ilem me mane odudubun.

²¹ Likame tie akwar Aaron ngasaseredoti moro, kame tie kede angwal moro, kame bino noka pi mina giayala awanga; piento en etie kede angwal, en likame ebino noka pi mino ango Rubanga mere giayala me cam.

²² En ekaruno camo cam dedede kame komio but ango Rubanga mere, cam kacil kede kacil kalamo.

²³ Do piento en etie kede angwal, en likame ebino noko egoe me isenge akadi alutari, tetekeny kur epwok kabedo na kacil; ango en Rwot ngat kame alonyo gin.”

²⁴ Aso, Musa oko yamo kope nogo ne Aaron kede awobe mege kede but jo me Isirael dedede.