Jolebi 12 - Baibuli I Leb Kumam 2013

Lonyo Mon i ngei Nywal

¹ Rwot oko mino Musa iswilia

² amako jo me Isirael kaman: Ka dako oyac di eko nywalo atin awobi, dako nono bino bedo dano kopwokere pi ceng kanyaare bala i kare kame etie kede tuwo me mon.

³ I ceng me kanyauni di oko bino kepo kom atin me cuo.

⁴ Di do en eko bino tieko ceng ot adek kiwie adek di etie lonyere pi remo kame eonyo; i kare nono likame en epoore mulo gimoro kobedo gikacil, akadi donyo i Eema kacil, tuno di ceng mege me lonyere otiek.

⁵ Ka enywalo atin nyako, dako nono bino bedo dano kopwokere pi sabitin are, bala i kare kame etie kede tuwo me mon. Ceng mege me lonyere mere pi remo kame eonyo ko bino bedo ceng ot kanyape kiwie kanyape.

⁶ Kame kare mere me lonyere otiek ingei nywalo atin awobi amoto nyako, en ebino tero ne ngasaseredoti i ekeko me Eema kacil atin romo me mwaka acel pi bedo giayala awanga, kede eluke amoto amam pi bedo giayala me kwanyo dub.

⁷ Ngasaseredoti bino mino giayala ka dako nono but Rwot, di eko timo pwola me kwanyo pwokere mere, di eko doko dano kolonyere. Manoni en gikame dako poore timo kame enywal.

⁸ Ka en ebedo ngacan likame etwero kwanyo oromo, poore ekwany amam are amoto ilukei are; acel bino bedo giayala awanga kede acel bino bedo giayala me kwanyo dub; di ngasaseredoti ko timo pwola me kwanyo pwokere mere di en eko bino doko dano kolonyere.