Jokolosai 4 - Baibuli I Leb Kumam 2013

¹ Wun wegi ipasoi, terunu ipasoi wu i yore aber, di ingeunu be wuda itienu kede Ngadwong wu i malo.

Acora

² Meedenu ilega nakanaka, di iketunu tam wu iye kede di imiunu pwoc.

³ Doko legunu ne wada, me wek Rubanga yab ne wa ekeko me pwonyo kop mere, tetekeny otuc mung i kom Kirisito, gikame kotwea i otkol pire,

⁴ di ako mine engere kiber bala kame apoore timo.

⁵ Timunu gi dedede i yore me rieko i nyim jo apat, di itiunu kiber kede kare dedede kame iudunu.

⁶ Wek kope wu bed mit nakanaka, bala gikame koketo iye munyo, tetekeny ingeunu epone kame ipoorenu dwoko kede kop ne ngat acelacel.

Amot me ajikini

⁷ Tukiko bino waco ne wu kope dedede i koma. En ebedo omin wa kame amaro, egenere i tic, doko en ngatic wad wa.

⁸ Ango acwae butu pi kop noni, me wek ingeunu epone kame wan otie kede, kede da wek en emi wu nwangcuny.

⁹ Ango acwae kede Onesimo, omin wa me amara kame genere, kame obedo dano acel kikom wu. Gin kibino waco ne wu gi dedede kame otimere kan.

¹⁰ Arisitaku ngat kame tie keda i otkol moto wu, kede Marako ocen ka Baranaba (ngat kame kotieko waco ne wu kop i kome, ka ebino butu gamenu),

¹¹ karacel kede Yesu kame kolwongo be Yusito da omoto wu. Magi kenekene en jo kame kokepo kikom jotic jowota, gin jo kame otimo kede gi tic me Ajakanut ka Rubanga. Gin kibedo kweno cunya.

¹² Epapura, ngat kame obedo dano acel kikom wu, ngatic ka Kirisito Yesu moto wu. En eyutuno wu nakanaka i ilega mere, me wek ibedunu kede yei kocato kede di gen wu likame kwanyere ki kom gikame Rubanga mito.

¹³ Ango ajurao en be, en etimo ne wu tic atek kede ne jo kame tie Laodikia kede Kerapoli.

¹⁴ Luka, emuron kame jo maro, kede Dema omoto wu.

¹⁵ Motanu imiegu kede amiegu kame tie Laodikia, kede motanu Nampa kede jokirisito me ode dedede.

¹⁶ Kame kotieko somo ne wu baluwa noni, nenunu be kosome ne ekodet me jokirisito kame tie Laodikia da; doko nenunu be isomunu baluwa kowok ki Laodikia da.

¹⁷ Wacenu Arakipu be miero enen be ecobo tic kame etieko gamo i Rwot.

¹⁸ Ango Paulo, awandiko amot noni kede cinga kikoma. Yutununu be ango pwodi atie i otkol. Kisa ka Rubanga bed kede wu.