Jokolosai 3 - Baibuli I Leb Kumam 2013

¹ Bala kame kotieko yaruno wu karacel kede Kirisito, mounu do jamini me malo kakame Kirisito tie iye, di ebedo i bad tetu cam ka Rubanga.

² Ketunu tam wu i kom jamini me malo do weko i kom jamini kame tie i wi lobo.

³ Pien wun itiekunu to, nan do kuo wu okanere karacel kede Kirisito i Rubanga.

⁴ Ka Kirisito ngat kame obedo kuo wu bino neeno, wuda ibinunu neeno karacel kede en i deyo.

Kuo Kacon kede Kanyen

⁵ Pi mano, jikunu atwal mit me lobo kame itienu kede, bala caro, tim me emuna, bedo jomit, kede mit areco, kede eranga (gikame rom aroma kede mino cal jwogi wor).

⁶ Tim nogi omio lilo ka Rubanga tie bino i kom jo kalikame lubo kop mere.

⁷ Wuda bin ibedunu kede tim nogi i kare kame oudo pwodi itienu kede i kuo nono.

⁸ Do nan ketunu gigi dedede tenge: gero, lilo, cuny me nyeko, dubo nying jo kede kope areco kame wok ki dogu.

⁹ Kur ingalerenu kenu kenu, pien wun itiekunu gonyo kuo kacon kede tice mege,

¹⁰ di ikounu ngapo kuo kanyen, kame kotie mino doko nyen i ngec pi doko cal kede ngat kame ocwee.

¹¹ Pi mano, likame tie doko apokapoka moro i diere me Jogurik kede Iyudayan, jo kame kokepo kede kalikame kokepo, jogero kede wegi asonya, ipasoi kede jo kogonyere; do Kirisito en gi dedede, doko etie i gi dedede.

¹² Aso, bala kame wun jo kame Rubanga oyero, jokacil kame en emaro, bedunu kede cuny me isasir, mwolo, mwolere, bedo mot, kede dire.

¹³ Kanyakinunu kede dano acelacel, doko ka ngatamoro tie kede kop moro arac kede dano ocelu, ngat acelacel poore sasiro dano ocelu; bala kame Rwot osasiro wu kede, wuda ipoorenu sasiro jo icegun.

¹⁴ Do akalamo magi dedede, bedunu kede amara. Amara en kame tweo gi dedede karacel di kiko bedo kiber.

¹⁵ Miunu mulem ka Kirisito pug cunyu, mulem noni en kame bin kolwongo wu iye i kom acel, doko bedunu kede pwoc.

¹⁶ Wekunu kop ka Kirisito pong i cunyu. Pwonyerenu di icorakinunu kenu kenu kede rieko me epone dedede. Werunu Sabuli kede were me ilega karacel kede were kame Tipo mio, di cunyu pwoyo Rubanga.

¹⁷ Doko gi dedede kame itimunu, i kop amoto i tic, timunu i nying Rwot Yesu, di imiunu Rubanga Papa pwoc i en.

Epone me Bedo karacel i Kuo Kanyen

¹⁸ Mon, jalerenu i loc ka cuog wu, bala kame etie kede gikame opoore i Rwot.

¹⁹ Cuo, marunu mon wu, doko kur ibedunu ger kede gi.

²⁰ Idwe, winyunu jonywal wu i gi dedede, pien man yomo cuny Rwot.

²¹ Wun joapapi, kur iwangunu cuny idwe wu, man mio cuny gi kwanyere.

²² Ipasoi, winyunu joadongo wu me wi lobo kan, likame pi timo gikaber kame gin kitie neno wu, arabo pi yomo cuny gi, do timunu kede cunyu dedede di itienu kede lworo but Rwot.

²³ Gi dedede kame itimunu, timunu gi kede cunyu dedede bala itienu tic ne Rwot do weko ne jo.

²⁴ Ngeunu be Rwot bino mino wu bala giamia wu me pwoc winyo kame en ekano pi jo mege, pien wun itienu tic ne Rwot Yesu Kirisito.

²⁵ Ngat kame timo raco kobino cule da pi raco kame etimo, pien Rubanga likame tie kede apokapoka.