Jogalatia 6 - Baibuli I Leb Kumam 2013

Konyerenu Kenu Kenu

¹ Imiegu kede amiegu na, ka ngatamoro otimo gikarac, wun jo kame Tipo telo wu ipoorenu dwoke kakare kede cuny me mwolo. Gwokerenu kenu tetekeny kur wuda ipotunu i atama.

² Konyerenu kenu kenu, pien iepone noni udo icobunu gikame iswil ka Kirisito mito.

³ Pien ka ngatamoro paro be pire tek do di en kony mere li, udo engalere kene.

⁴ Ngat acelacel poore ngingico tice mege, di do gikame mie epoore wakere ko bedo bute kene, do likame but ngakio mere.

⁵ Pien ngat acelacel poore yeno yec mere.

⁶ Jo kame kotie pwonyo kop ka Rubanga poore nywako kede ngapwony gikame beco dedede.

⁷ Kur ngalu; Rubanga likame konywaro, pien gikame dano cuo en kame ekao da.

⁸ Pien ngat kame cuo i kome, gikame ekao ki kome en to; do ngat kame cuo i Tipo, gikame ekao ki Tipo en kuo kame bedo nakanaka.

⁹ Doko kur oolunu timo gikaber, pien ka kare otuno obinunu kac ka likame okwanyunu cuny wa.

¹⁰ Aso, tek ka otienu kede kare, otimunu gikaber ne jo dedede, twatwal mere ne jo kame tie i ekodet me jo koyei Kirisito.

Ikwenyar me Ajikini kede Amot

¹¹ Nenunu inyukutan adongodongo kame atie iwandik kede butu kede cinga kikoma.

¹² Jo kame dio wu kepere gin jo kame mito nyutere twatwal i kuo me kom gi. Gin kitimo kamano tetekeny kur kotidilo gi pi kop me to ka Kirisito i kom musalaba.

¹³ Pien akadi jo kame kokepo da likame lubo Iswil. Gin kimito be kep wu me wek kiwakere pi komu.

¹⁴ Do ewaka nono miero bed bor keda, kwanyo ango abino wakere kenekene pi musalaba ka Rwot wa Yesu Kirisito. Pi musalaba mere, ki tetu buta kotieko guro piny di eko to, doko kibut piny da kotieko guro ada di ako to.

¹⁵ Pien akepo arabo bedo abongo akepo likame tie gikame pire tek, do bedo giacwea kanyen en kame pire tek.

¹⁶ Mulem kede kisa bed but jo dedede kame lubo iswil noni, kede but Isirael ka Rubanga.

¹⁷ Cako nan kur ngatamoro bobo lola; pien ango atie kede alama ka Yesu i koma.

¹⁸ Imiegu kede amiegu na, kisa ka Rwot wa Yesu Kirisito bed i cunyu. Amen.