Jogalatia 5 - Baibuli I Leb Kumam 2013

Gwokunu Gonyere wu

¹ Kirisito ogonyo wa me wek obed jo kogonyere; pi mano, cungunu di itekunu di likame ikounu bobo yei ayoko me ipasun.

² Winyunu! Ango Paulo, awaco ne wu be, ka iyeunu kepere, udo Kirisito do kony mere odoko li kibutu atwal.

³ Ango bobo akwenyaro ngatamoro kame yei kepere be, en do etie kede banya me lubo Iswil lung.

⁴ Wun ipokerenu tenge kikom Kirisito, wun jo kame imitunu bedo jo kopoore pi lubo Iswil; likame itienu i kisa ka Rubanga.

⁵ Pien pi twer me Tipo, kame tio i yei wa, wan otienu daro kede gen bedo jo kopoore.

⁶ Pien i Kirisito Yesu, akepo arabo bedo abongo akepo likame timo gimoro, do gikame pire tek en yei kame tio di ebeo i amara.

⁷ Oudo itienu timo kiber; ngai bobo kogengo wu lubo kop me ateni?

⁸ Epone me esupe nono likame owok kibut Rubanga ngat kolwongo wu.

⁹ Arup atitidi me mugati romo mino alos lung kame konyongo buuno.

¹⁰ Ango atie kede niang aber i Rwot be, wun likame ibinunu bedo kede tam apat kede mera; doko da ngat kame tie lolo wi wu kobino ngolo ne kop, akadi di en ebedo ngai.

¹¹ Imiegu kede amiegu na, do ka ango pwodi atie pwonyo be kepere mitere, pinyo kara komio pwodi kotie tidilo ango? Ka etie kamanono, udo kotieko kwanyo kop kame koto wango cuny jo ki pwony kame mako to ka Kirisito i kom musalaba.

¹² Oudo cunya mito be koto jo kame tie rubo wi wu nogo miero gelemekin da.

¹³ Pien, imiegu kede amiegu na, wun oudo kolwongo wu pi bedo jo kogonyere; kenekene kur doko itiunu kede gonyere wu bala gikame mio wu kare me cobo mit me komu, do pi amara bedunu bala ipasoi but ngat acelacel.

¹⁴ Pien Iswil lung ribere i cik acel be, “Mar ngakio ni bala kame imaro kede komi keni.”

¹⁵ Do ka isurerenu di iwanerenu bala leini ager, gwokerenu me wek kur itiekerenu.

Tipo kede Kuo me Anywali ka Dano

¹⁶ Do ango awaco ne wu be, miunu Tipo tel wu di likame ikounu cobo mit me kom.

¹⁷ Pien mit me kom likame riamo kede gikame Tipo mito, doko gikame Tipo mito likame riamo kede mit me kom; pien gin are nogi, ngat acelacel piemo kede ocelu, pi gengo wu timo gikame imitunu timo.

¹⁸ Do ka Tipo en kame telo wu, udo likame itienu i loc me Iswil.

¹⁹ Tice me kom neeno kakaler, gin ige: caro, tim me emuna, mit me lewic,

²⁰ woro cal jwogi, jwok, ading, piem me lilo, nyeko, gero, lok, apokapoka, pokere i ikodeta,

²¹ ingobel arac, amera, ebaga me yomcuny arac, kede apat mege kame cal kamagonogi. Akwenyaro wu, bala kame oudo atieko kwenyaro wu kede sek be, jo kame timo epone me gi nogi likame bino donyo i ajakanut ka Rubanga.

²² Do anyakini me Tipo en amara, kilel, mulem, dire, mwolo, bero, genere,

²³ bedo mot, kede dino mit me kom. Likame tie iswil moro kame dagi gi nogi.

²⁴ Jo kame obedo me ka Kirisito Yesu otieko guro kuo me anywali karacel kede par mege kede mit mege i kom musalaba.

²⁵ Ka Tipo en kame mio wa okuo, wek Tipo da en kame tel wa.

²⁶ Owekunu deng, mono kolo, kede bedo kede nyeko wan kenwa kenwa.