Jogalatia 4 - Baibuli I Leb Kumam 2013

¹ Gikame ango atie waco en ine be, ngat kame poore lunyo jame ka papa mere, ka en pwodi atin udo erom aroma kede epasoit akadi bed bala en won jame dedede.

² Do en edong i cing jo kame gwoke kede jo kame lo jame mege tuno kede i ceng kame papa mere ociko.

³ Etie kamanono kede wada; i kare kame wan oudo pwodi otienu idwe, oudo wan ipasoi me tipere kame pugo wi lobo.

⁴ Do kakame kare oromo kede kiber, Rubanga oko cwano Wode, kame dako onywalo, kame konywalo di eko bedo i loc me Iswil,

⁵ me wek elak jo kame oudo tie i loc me Iswil, tetekeny Rubanga mi wa odok idwe mege.

⁶ Doko pi wun ibedunu idwe mege, Rubanga otieko cwano Tipo ka Wode i cuny wa, Tipo kame kok but Rubanga be, “Aba! Papa!”

⁷ Aso, pi Rubanga, likame in pwodi itie epasoit, do in atin mere, doko ka in atin mere udo in ibedo ngat kame en ebino mino winyo mere.

Paulo Paro pi Jogalatia

⁸ I kare kokato di oudo pwodi likame ingeunu Rubanga, oudo ibedunu ipasoi me tipere mogo, kame iekite me cwec gi likame kibedo rubangan.

⁹ Do bala kite kame nataman itiekunu ngeno kede Rubanga, arabo awac be Rubanga otieko ngeno wu, benyo benyo kame idokunu kede bobo but tipere kame goro kede kame jocan, kame pugo piny? Benyo bo komio imitunu bobo bedo ipasoi gin?

¹⁰ Wun igwokunu ceng kede dwete kede kare, kede mwakini!

¹¹ Ango atie kede lworo be abungo timo tic me nono piru.

¹² Imiegu kede amiegu na, ango akwao wu be, dokunu cal bala ango, pien ada atieko doko cal bala wun. Likame wun itimunu na raco moro.

¹³ Wun ingeunu be aramo kame omako koma en kame bin omio ango atuco ne wu ejiri tien me agege.

¹⁴ Doko bed bala aramo na oudo obedo atama butu, likame ibedunu kede acae buta arabo idaganu, do igamanu bala malaika ka Rubanga, bala kite kame oudo koto igamunu kede Kirisito Yesu.

¹⁵ Nyo doko oko timere i kom yomcuny kame oudo itienu kede? Ango ajurao wu be ka koto oudo twerere, oudo koto iromunu golo wangu di ikounu mina.

¹⁶ Benyo, nan do mam ango adoko ngakwor wu pi waco ne wu kop me ateni?

¹⁷ Jo mogo mire ken gi kitek butu, likame pi tien kop moro, do kenekene pien gin kimito gengo wu kibuta, tetekeny wuda imirenu kenu kitek but gi.

¹⁸ Eber mire kitek pi tien kop kopoore i kare dedede, do weko i kare kame ango atie kede wu kenekene.

¹⁹ Idwe na, ango aramere bobo piru tuno kede kame idokunu cal kede Kirisito i kuo wu.

²⁰ Oudo cunya mito be koto abed kede wu nataman tetekeny alok epone me yamo kede wu, pien kop wu ocungo wia.

Apor i kom Agar kede Sara

²¹ Wacanu, wun jo kame imitunu bedo i loc me Iswil, benyo, likame iwinyunu gikame Iswil waco?

²² Pien kowandiko be Aburaam oudo bin tie kede awobe are, acel enywalo kede dako kame oudo obedo apasoit, kede ocelu en eko nywalo kede dako kalikame oudo obedo apasoit.

²³ Wot ka dako kame oudo obedo apasoit riki konywalo di lubere kede ekite me kom, do wot ka dako kalikame oudo obedo apasoit oudo konywalo pi cikere kame bin Rubanga omio.

²⁴ Aso, man tie apor kaman: mon are gi cungo pi isikan are. Dako kame cungo pi isikan kame kotimo i moru me Sinai en Agar, kame nywalo idwe mege pi pasuno.

²⁵ Aso Agar en kame cungo pi moru me Sinai kame tie Arabia; en ecal acala kede Yerusalem kame nataman tie, piento en etie pasuno kede idwe mege.

²⁶ Do dako ocelu ca cungo pi Yerusalem me i malo, en ebedo ngat kame tie kede gonyere, doko en toto wa.

²⁷ Pien kowandiko be, “Leli, in ngat kame ili kede atin, in ngat kalikame inywal! Mwoc wer di ilelemo, in ngat kalikame ikanyo aramo me nywal. Pien idwe me dako kame koweko tot kalamo idwe me dako kalikame koweko.”

²⁸ Aso imiegu kede amiegu na, wan otienu idwe me cikere ka Rubanga bala bin Isaka.

²⁹ Do bala kame i kare nono atin kame oudo konywalo di lubere kede ekite me kom oko tidilo atin kame konywalo pi Tipo ka Rubanga, nataman da tie kamanono.

³⁰ Do iwandik kacil waco benyo? En ewaco be, “Riam apasoit kede atin mere, pien atin me apasoit likame bino nywako sikao jame karacel kede atin me dako kame tie kede gonyere.”

³¹ Pi mano, imiegu kede amiegu na, wan likame obedunu idwe me apasoit, do me ka dako kame tie kede gonyere.