Jogalatia 3 - Baibuli I Leb Kumam 2013

Iswil arabo Yei

¹ Wun Jogalatia imingunu! Ngai kologo wu? Bin koporo ne wu kiber kite kame koguro kede Kirisito i kom musalaba.

² Wek apenyu kaman kenekene be: bin iudunu Tipo pien oudo itimunu gikame Iswil mito arabo pien iwinyunu ejiri di ikounu yei?

³ Mam wun imingunu adikinicel? Oudo igeunu kede Tipo, nan do mam imitunu jiko kede kom?

⁴ Gi dedede atot kame ibeunu iye mam do oudo otimere me nono? Ateteni likame kibedo me nono.

⁵ Benyo, Rubanga mio wu Tipo kede etimo giaura i diere wu be pien itimunu gikame Iswil mito, arabo pien iwinyunu ejiri di ikounu yei?

⁶ Bala kite kame Aburaam “bin oyei kede Rubanga omio oko tere be ngat kopoore,”

⁷ aso miero ingeunu be jo kame tie kede yei en kame obedo ikwae ka Aburaam.

⁸ Doko da di bin iwandik kacil ogeo neno sek be Rubanga bino mino jo kalikame Iyudayan bedo jo opoore pi yei, en eko cako tuco ne Aburaam ejiri di pwodi likame kare otuno, di ewaco be, “Kibuti kobino mino atekerin dedede winyo.”

⁹ Pi mano, jo kame tie kede yei komio gi winyo karacel kede Aburaam ngat kame bin oyei.

¹⁰ Pien jo dedede kame gengere i timo gikame Iswil mito tie kede ilam; pien kowandiko be, “Ilam mak ngat acelacel kalikame lubo gikame kowandiko i itabu me Iswil, kede di likame etimo gi.”

¹¹ Nan etie do kakaler be likame tie dano kame bedo ngat kopoore i nyim Rubanga pi Iswil; pien kowandiko be, “Ngat kobedo dano kopoore pi yei bino kuo.”

¹² Do Iswil likame cungo i yei, pien kowandiko be, “Ngat kame timo gi dedede kame Iswil mito bino kuo pirgi.”

¹³ Kirisito olako wa ki ilam kame Iswil kelo, ingei en doko ilam pirwa. Pien kowandiko be, “Ilam mak ngat acelacel kame koliero i kom yat.”

¹⁴ Man otimere tetekeny i Kirisito Yesu, winyo kame bin komio Aburaam bin i kom jo kalikame Iyudayan, me wek pi yei, oudunu Tipo kame kocikere pi mino wa.

Iswil kede Cikere

¹⁵ Imiegu kede amiegu na, ber ami wu apor me kuo me ceng dedede: ka kotieko moko isikan ka ngatamoro, likame tie dano moro kame turo isikan nono, arabo medo iye gimoro.

¹⁶ Aso, cikere nogo oudo komio Aburaam kede akware. Likame ewaco be, “Kede ikwae,” pi nyuto be kitot; do enyuto dano acel kenekene be, “Kede akware,” en Kirisito.

¹⁷ Dwong me gikame ango atie waco en ine be: Iswil kame bin obino ingei mwakini 430 likame karuno turo isikan kame Rubanga oudo otieko moko, pi mino cikere mere bedo gikame kony mere li.

¹⁸ Pien ka giamia ka Rubanga cungo i Iswil, udo likame etie do pi cikere; do Rubanga bin omio giamia mere but Aburaam kede cikere.

¹⁹ Iswil do tie pinyo? Oudo komede pi nyuto be turo Iswil en nyo, tuno kede ka akwar Aburaam obino, en ngat kame bin komio cikere pire; doko imalaikan en okele di ebeo kibut ngairucakin.

²⁰ Aso ngairucakin likame tie pi dano acel, do Rubanga en acel.

Tic me Iswil

²¹ Mam do Iswil likame nywako kede cikere ka Rubanga? Ateteni likame kamano; pien ka Iswil kame komio oudo mio kuo, ateteni udo Iswil mio dano doko ngat kopoore pi lube.

²² Do iwandik kacil oketo gi dedede i loc me dub, me wek mi jo kame tie kede yei gikame oudo kocikere pi mino, di lubere kede yei gi i kom Yesu Kirisito.

²³ Aso, di pwodi likame oudo yei obino, wan oudo oguraun i twer me Iswil, di kocego wa daro yei kame oudo kobino nyuto.

²⁴ Pi mano, Iswil oudo obedo ngadar wa tuno Kirisito bino, me wek odokunu jo kopoore pi yei.

²⁵ Do nataman bala kite kame yei nono otieko bino kede, likame pwodi bobo otienu i cing ngadar.

²⁶ Pien i Kirisito Yesu, wun dedede itienu idwe ka Rubanga pi yei.

²⁷ Jo kame kobatiso i Kirisito kibutu otieko ngapo Kirisito.

²⁸ Likame bobo tie Ngayudaya amoto Ngagurik, likame bobo tie epasoit arabo ngat kogonyere, likame bobo tie icuo arabo dako; pien wun dedede itienu acel i Kirisito Yesu.

²⁹ Aso ka wun ibedunu me ka Kirisito, udo do itienu kodi kowok kibut Aburaam, jo kame bino udo gikame Rubanga ocikere pi mino.