Jogalatia 2 - Baibuli I Leb Kumam 2013

Paulo kede Joor Icegun

¹ Di do ingei mwakini tomon kiwie ongwon, ango bobo ako dok Yerusalem karacel kede Baranaba, oudo atero Tito da oupere keda.

² Ango aoto bala kite kame Rubanga onyuto na kede. Ango ako nyuto i nyim gi ejiri kame ango oudo atuco ne jo kalikame Iyudayan (do atimo manoni i cokere me mung kede jotel kame koworo), tetekeny gikame atie timo arabo kame atieko timo kur bed tic me nono.

³ Do likame oko dino akadi Tito da ngat kame oudo tie upere keda pi kepere, bed bala en oudo ebedo Ngagurik.

⁴ Do man otimere pi jo mogo kame oudo kokelo, kame oudo cukere be gin kiyei, jo kame olwidar but wa pi begao gonyere kame wan otie kede i Kirisito Yesu, tetekeny kimi wa odok bala ipasoi.

⁵ Do wan likame oko yei gamo kop gi akadi kicel moro, tetekeny ogwok ne wu ateni me ejiri.

⁶ Do jotel kame oudo kopoore woro (ki tetu buta, epone kame gin oudo kitie kede likame nyuto apokapoka moro; Rubanga likame tie kede apokapoka but jo), jotel nogo, ango awaco be, likame kimedo na gimoro.

⁷ Do akaka mano, gin kineno be Rubanga oudo ogena kede tic me tuco ejiri ne jo kalikame kokepo, bala kite kame oudo emio kede Petero da tuco ejiri ne jo kame kokepo.

⁸ (Pien ngat kotio kibut Petero di emie ebedo ngaor but jo kame kokepo, en kame bin otio kibut ada di eora pi ot but jo kalikame Iyudayan.)

⁹ Kakame kiniang kede i kom kisa kame komia, Yakobo kede Kepa kede Yokana, jo kame oudo koworo bala jotel, oko yango cinga kede cing Baranaba i nywak, di kiyei be wan opoore ot but jo kalikame Iyudayan, di gin kiko ot but jo kame kokepo.

¹⁰ Gin kikwao wa gi acel kenekene be, poore di wan oyutuno jocan, gikame cunya da oudo mito timo ateteni.

Paulo Oronkino Petero i Antiokia

¹¹ Do kakame Kepa obino kede Antiokia, ango ako ronkino en obe, pien kop oudo loe kakaler.

¹² Pien di oudo pwodi cuo mogo kame Yakobo ocwao likame otuno, Kepa oudo nywako cam kede jo kalikame Iyudayan. Do kakame cuo nogo otuno kede, en eko wutakino, di eko pokere tenge kikom gi pi lworo ekodet kame bin gango tam me kepere.

¹³ Iyudayan ace da oko donyo i tim mere me ecuke noni. Man oko mino akadi Baranaba da odonyo i tim gi me ecuke nono.

¹⁴ Do kakame ango aneno kede be gikame gin oudo kitie timo likame upere kede ateni me ejiri, ango ako waco ne Kepa i nyim gin dedede be, “Ka kong in Ngayudaya lem ibedo bala jo kalikame Iyudayan, do weko bala Ngayudaya, epone mene kame in ikaruno dino kede jo kalikame Iyudayan pi bedo bala Iyudayan?”

Iyudayan kede Jo kalikame Iyudayan Udo Alako pi Yei

¹⁵ Wan ikom wa obedo Iyudayan i anywali wa, do weko jo kalikame Iyudayan kame obedo jodubo.

¹⁶ Do wan ongeunu be dano likame bedo ngat kopoore i nyim Rubanga be pien etimo gikame Iswil mito, do ebedo ngat kopoore i nyim Rubanga ka etie kede yei i kom Yesu Kirisito. Akadi wada oyeunu Kirisito Yesu tetekeny obedunu jo kopoore i nyim Rubanga pi yei wa i kom Kirisito, do weko pi timo gikame Iswil mito. Pien timo gikame Iswil mito likame mio dano moro bedo ngat kopoore i nyim Rubanga.

¹⁷ Do ka i cane wa pi bedo jo kopoore i Kirisito, di oko udo be wan ikom wa otienu jodubo, mam udo Kirisito do tie ngatic kame mio jo dubo? Ateteni likame kamanono!

¹⁸ Do ka ango agero bobo gikame ngoce areto piny nogo, udo atie nyuto be ango ngatur Iswil.

¹⁹ Pien i kom kop kame mako Iswil, ango atieko to, tetekeny abed kuo ne Rubanga. Ango kogura karacel kede Kirisito,

²⁰ omio likame doko ango en kame pwodi akuo, do Kirisito en kame kuo i ango. Doko kuo kame nan ango atie kede, akuo pien atie kede yei i kom Wot ka Rubanga, ngat kame omara di eko jalo kuo mere pira.

²¹ Likame ango adagi kisa ka Rubanga, pien ka kono dano bedo ngat kopoore pi Iswil, koto to ka Kirisito do obedo me nono.