Joepeso 6 - Baibuli I Leb Kumam 2013

Idwe kede Jonywal gi

¹ Idwe, worunu jonywal wu i Rwot, pien manoni tie gikame opoore.

² “Wor papa ni kede toto ni” en kame obedo cik me agege kame Rubanga ocikere iye be,

³ “tetekeny gi dedede bed ni kiber di iko romo bedo i wi lobo pi kare alac.”

⁴ Wun joapapi, kur iwangunu cuny idwe wu, do gwokunu gi kidongi kede iponeso abeco kede pwony ka Rwot.

Ipasoi kede Jodongo gi

⁵ Ipasoi, worunu jodongo wu me piny kan di itienu kede lworo, kede mielkom, kede cuny acel, bala kame iworunu kede Kirisito.

⁶ Kur itimunu kamano i kare kame jo tie neno wu kede kenekene be tetekeny iyomunu cuny gi, do bala ipasoi ka Kirisito timunu gikame Rubanga mito.

⁷ Timunu tic di cunyu tie iye bala itienu timo ne Rwot do likame ne jo,

⁸ di ingeunu be gi dedede kabeco kame ngatamoro timo, ebino da udo gikame cal kamanono kibut Rwot, bed bala etie epasoit arabo li.

⁹ Wuda jodongo, timunu kamanono ne ipasoi wu. Wekunu mino gi lworo di ingeunu be, wun dedede itienu kede Ngadwong acel kenekene i malo, ngat kame li kede apokapoka.

Angapito me Ngakirisito me Yi kede Gikarac

¹⁰ Me ajikini, bedunu di itekunu i Rwot, doko di itienu i teko me twer mere.

¹¹ Ngapunu angapito ka Rubanga me yi, tetekeny itwerunu cungo di itekunu pi yi kede Sitani i angalo mere me rieko.

¹² Pien wan likame otienu yi kede jo, do wan otienu yi kede jopug kede akarunikin mogo apat, kede tipere kame nataman pugo wi lobo kan i kare me colo noni, kede tipere me twer kareco kame pugo i wi yamo.

¹³ Pi mano, ngapunu angapito ka Rubanga me yi, tetekeny kame ceng arac otuno, ibinunu karuno yi kede ngakwor, di kame yi otiek, ikounu dong cungo di itekunu.

¹⁴ Pi mano, cungunu di itiekunu iikere, di itienu kede ateni bala rakoba me tweno pieru, kede di itienu kede poore bala ebuku me gano koru.

¹⁵ Bala amuka kame ingapunu i tienu, ngapunu gi dedede kame mitere me tuco ejiri kame kelo mulem.

¹⁶ Medo i wi magi dedede, bedunu kede yei bala ebuku kame mio wu itwerunu kweno emal kame Ngarac gweo.

¹⁷ Di ikounu mino alako bed bala ocoro atek kame gwoko wi wu, kede kop ka Rubanga di ko bedo epima kame Tipo mio.

¹⁸ Legunu i kare dedede bala kame Tipo telo wu kede i ilega kede kwac acelacel but Rubanga. Pi mano, bedunu di wangu bit di ikanyakinunu i ilega pi jokacil dedede.

¹⁹ Doko da kwaunu Rubanga pira, tetekeny kame atie yamo wek emia kop kame abino yamo, di ako mino jo ngei gikame omungere me ejiri di ali kede lworo moro.

²⁰ Ejiri noni en kame ango abino pi timo tic mere, doko da en kame emio kotwea kede irikoi i otkol. Aso, kwaunu Rubanga tetekeny atuc ejiri noni kede nwangcuny bala kame apoore timo.

Amot me Ajikini

²¹ Tukiko, kame obedo omin wa me amara kame genere i tic ka Rwot, bino waco ne wu gi dedede tetekeny wuda ingeunu kop i koma kede i kom gikame atie timo.

²² Ango acwae butu pi kop noni, pi mino wu ngeno kite kame wan otie kede, doko pi dino cunyu.

²³ Mulem kede amara karacel kede yei kame wok kibut Rubanga Papa, kede kibut Rwot wa Yesu Kirisito, bed but imiegu kede amiegu dedede i Kirisito.

²⁴ Kisa ka Rubanga bed but jo dedede kame amara gi i kom Rwot wa Yesu Kirisito likame jik.